VOV4.M'nông: Ôi 13/12, tâm rnôk hăn khâl ngăn Hàn Quốc, Kruanh Quốc hội Vương Đình Huệ hŏ wơt kruanh rđău kan ăp Tập đoàn, doanh nghiệp dâk bôk năp bah Hàn Quốc. Ta rơh wơt ăp tập đoàn, Kruanh Quốc hội Vương Đình Huệ lah rjăp, Việt Nam n'hanh Hàn Quốc dôl nsrôih ndơ̆ tâm boh bar ding hao prêh mhe nkhêp geh nar nkah ndray 30 năm njêng tâm boh tâm brê.

Tâm boh wăng sa lah n'gâng tơm khlay yor kơt nê̆ tâm rnôk hăn khâl rơh dja an saơ nău nsrôih ntrŭt ntrôl tâm boh wăng sa, tăch rgâl bar ding tât rnoh 100 rmen đôlar tâm năm 2023. Ta rơh wơt Kruanh rđău kan Tập đoàn Samsung Electronics, Kruanh Quốc hội Vương Đình Huệ an gĭt, Việt Nam ŭch tĭng trong nchrăp pơk hvi ntuh kơl tăch rgâl bah Công ty tâm let năp tay; rnê âk trong nchrăp ntop kơl doanh nghiệp Việt Nam râng tâm rêng pă an tơm ndơ tăch lam ntŭr neh bah Samsung; nkre dăn đă Công ty geh trong kan têh jong n'hanh geh trong nkra na nê̆ gay ntop kơl doanh nghiệp Việt Nam n'hao nău dơi ƀư njêng n'hanh tâm rlong gay tŏng nău dơi râng tâm rêng pă an tơm ndơ tăch lam ntŭr neh bah Tập đoàn Samsung n'hanh Công ty lah êng./.

Nuĭh rblang: Điểu Thân