VOV4.M'nông: Tâm rnôk hăn khâl ngăn Hàn Quốc, ôi 15/12/2021, Kruanh Quốc hội Vương Đình Huệ hŏ wơt Kruanh nkre ƀư Tổng Giám đốc Tập đoàn Amkor Technology Ji Jong-rip n'hanh kruanh Tập đoàn tài chính Hana Kim Jung-tai. Aơ lah bar nău kan n'glĕ dŭt, lôch jêh uĕh lăng hăn khâl ngăn Hàn Quốc bah Kruanh Quốc hội Vương Đình Huệ n'hanh Mpôl ntơh măt gưl têh Quốc hội Việt Nam. Ta rơh pah kan đah Amkor Technology, Kruanh Quốc hội Vương Đình Huệ mbah rhơn Tập đoàn dơi pă an si ƀŭt kơp dơn đăng ký ntuh kơl ƀư nhih máy ntrŭp n'hanh rlong ndơ dŏng ntrŭp bán dẫn ta n'gor Bắc Ninh rnoh ntuh kơl rlău 1,6 rmen đôlar. Kruanh Quốc hội Vương Đình Huệ lah rjăp, Việt Nam ŭch kơl n'hanh ton ndrel hăn đah Tập đoàn Amkor Technology tâm nău an  ƀư n'hanh mât dŏng trong nchrăp kan, nta trong dơh gay Tập đoàn ntuh kơl ƀư njêng tăch rgâl nâp jŏ ta Việt Nam.

Ta rơh wơt Tập đoàn tài chính Hana (Hana Financial Group), Kruanh Quốc hội Vương Đình Huệ dăn đă Hanabank tâm pă tay nău tă ơm gĭt kan mât bôk kan mhe, ăp trong ƀư tăch rgâl mhe nsing ta jâng công nghệ, ntrŭt ntrôl ăp băl tâm boh đah Hàn Quốc pơk hvi ntuh kơl ta Việt Nam.

 Nuĭh rblang: Điểu Thân