VOV4.Mnông-Lôch tă âk tơ̆ ntoch ton nar, tât aƀaơ, nău doh ntrơn rhiăng ha ngih jay bil ƀư ta nkual neh bri mô geh an ƀư ta Lâm Đồng ê hŏ geh ƀư đŏng. Tĭng nău uănh nđôi, uănh kơp bâh ntŭk kan têh bâh n’gor Lâm Đồng, lam n’gor aƀaơ geh rlău 227 ha ngih bil, ngih jal rdâk njêng mô tâm di ta neh tăm bri.

Tâm nĕ, rgum dŭt âk lah ta nkuăl ƀon têh Đà Lạt đah bơi tât 185ha, lôch nĕ lah nkuăl Lạc Dương rlău 21ha, Đơn Dương 16ha, hôm e geh ta ăp nkuăl Đức Trọng, Đam Rông n’hanh Di Linh. Bol ma ta năp UBND n’gor Lâm Đồng lĕ geh săm ƀŭt ntrŭnh ntĭm đă ăp nkuăl, nkuăl ƀon têh n’hanh ntŭk kan geh tât ƀư nău kan pah kan ntrơn lôch ta năp nar 30/9/2021, yơn tât aƀaơ lĕ rnoh neh ngih jay bil lĕ doh jăng kanŭng ba dâng 10%. Tĭng ntŭk kan tuch tăm n’hanh hun hao n’gor Lâm Đồng, geh nău mbrơi kơt aơ lah yor nău nchâp đă ntrơn jêr, nuĭh ƀon lan dôl pah kan jêng lah ntoch jong nar gay ma rgŏ jă, mbơh rblang.

Nuĭh rblang: Thị Đoắt