VOV4.M’nông: Nkual mât ndrăy bri hon êng Ea Sô ta nkuăl Ea Kar n’gor Dak lak ntŭk geh âk si khlay geh mro tâm nău nuĭh joi trong sreh kăl. Yor rĭ, rmôt mât bri ntŭk aơ mâp âk jêr jŏt ntŭl rlong tâm nău uănh nđôi, nking n’gang ăp nău nchron pănh, sreh kăl si khlay.

          Nkual mât ndrăy bri hon êng Ea Sô ta nkuăl Ea Kar, n’gor Dak Lak geh rnoh bri bơi 27.000ha, kâng n’har đah 2 n’gor Gia Lai n’hanh Phú Yên. Aơ lah nkual mât ndrăy hôm e âk ntil mpa dơi nchih tâm sam ƀŭt chăng Việt Nam n’hanh âk ntil si khlay kơt: N’ho dak, cẩm lai, giáng hương, cà te... Yor rĭ ma âk năm bah năp, nkual mât ndrăy bri hon êng Ea Sô lah duh jêr đah nău tih luật. Hăn ndrel đah Nkual mât ndrăy bri hon êng Ea Sô bah nar mhe ndâk njêng, wa Trần Kim Châu nuĭh kan trạm kiểm lâm mrô 8 an gĭt, trạm geh 5 nuĭh mât uănh, njrăng n’gang bơi 4.000 ha bri, tâm nĕ geh tiểu khu kâng n’har đah n’gor Gia Lai. Way tâm yan wai, ngăn lah dŭt năm nu nău tih bah nuĭh ƀon lan rêh wăr nkual mât ndrăy hao âk. Khân pơng joi ăp trong lăp tâm bri gay nchron pănh mpa bri, sreh kăl si khlay tăch an ăp nuĭh êng.

          “Nuĭh gŭ ta bri dŭt ŏk r’ah rnôk hăn kan mô kơp knŭng măng nar. Rnôk hăn uănh nđôi mâp ntŭk sreh kăl ri an gŭ âk nar mro tâm bri, ji ŏk rdâng đah ăp nuĭh phah si, nchon pănh. Yơn lah ŏk r’ah, prăk khay geh mô âk yơn oh nô ta aơ dŭt lĕ nuih n’hâm, lah mô nsrôih mô dơi gŭ jŏ jong”.

Rmôt mât bri Ea Sô ta trong hăn uănh nđôi

          Ta Trạm kiểm lâm mrô 4, ntŭk kan mât uănh, njrăng n’gang rlău 3.000 ha bri, nuĭh ntŭng na nao lăp đah trong jâng n’hanh trong dak gay ntŭng si. Wa Nguyễn Trung Dũng, Groi trạm kiểm lâm mrô 4 an gĭt: Aƀaơ sóng điện thoại geh ăp ntŭng jêng khân pơng đă nuĭh uănh nđôi ăp ntŭk, rnôk saơ rmôt mât bri ƀư hăn uănh nđôi ri kuăl điện mbơh jêng ƀư an trong kan mât uănh, njrăng n’gang bri bah ăp nuĭh kan mâp dŭt âk jêr jŏt.

          “Trong kan mât njrăng bri bah mpôl hên mâp âk jêr jŏt, ntŭk ntô jêr jŏt, dak diăng âk, nuĭh ntŭng ta aơ dŭt dăng. Nuĭh ntŭng ƀa ƀơ đă nuĭh kâp njrăng trạm mpôl hên, groi nđôi uănh geh ndâng âk nuĭh gay rlăm rnôk geh mih sial, mpôl hên uănh nđôi mô ngăch ri khân pơng lăp. Geh nar mpôl hên an ndeh, dăp âk nuĭh, pơk ŭnh hăn rgăn bri hăn kâp gay nhŭp. Mpôl hên nsrôih gay lôch uĕh ăp nău kan”.

Mông rlu rlău bah nuĭh kan mât bri ta trong hăn uănh nđôi

          Tĭng wa Lê Minh Tiến, Kruanh nkual bri mât ndrăy hon êng Ea Sô, năm 2021 rmôt kan mât njrăng bri ta nkual mât ndrăy lĕ saơ, rmal 23 nău tih đah 30 nuĭh, tâm nĕ ndơ̆ an Hạt kiểm lâm Ea Kar 17 nău đah 24 nuĭh gay rmal tĭng nău ntrŭnh pháp luật.

          “Ta nkual kâng n’har đah 2 n’gor băl ri rmôt nuĭh ƀon lan ta nkual njônh dŭt têh rlău 20.000 nuĭh. Nău rêh nuĭh ƀon lan ta ntŭk aơ dŭt jêr jŏt, tâm rgop đah nar khay bah năp geh srê Covid-19 lŏ ƀư an nău rêh bah nuĭh ƀon lan lơ jêr jŏt. Nău nuĭh ƀon lan joi nău rêh ta bri bah nĕ ƀư an nău jêr ndơ tâm bri bah ntŭk kan dŭt têh. Tal 2 đah rmôt mât njrăng bri lŏ đêt. Nkual mât ndrăy lĕ geh dŭt âk nuĭh, oh nô lĕ geh ăp nuĭh ntŭng pănh, ntâp âk tong tâm săkl yơn bah kơi aơ mô geh nău kơl du ntil. Lĕ dŭt âk âk nuĭh ŭch dăn trong pah kan, dăn rlu kan. Mpŏng đŏng ăp gưl ăp nău kan uănh mĭn tay geh âk nău kơl nkra rgâl di trong ƀư an tâm di”.

Sa piăng măng n’gul bri bah ăp nuĭh mât bri

          Ta nkual mât ndrăy bri hon êng Ea Sô, trong kan mât uănh, njrăng n’gang bri bah rmôt aƀaơ hin hôm e mâp âk jêr jŏt. Du đêt cán bộ mât bri lĕ geh nău tih n’hanh an mhal dôih rnôk kơl rgop đah nuĭh ntŭng si. Yơn đah nău ŭch bri uĕh jêng 70 viên chức, nuĭh pah kan Nkual mât ndrăy bri hon êng Ea Sô ăp nar hôm e krêp dêh nsrôih rlet rlău jêr jŏt gay uănh nđôi mât njrăng lôk bri krŏng Ea Sô.

                    Nuĭh rblang: Y Sưng Phê Ja