VOV4. M’nông: Nuh srê têh Covid-19 hŏ ntưp rêng lĕ rngôch tât ăp dak n'hanh nkual neh lam ntŭr neh, khuch hô tât ăp ntil nău rêh jêng wăng sa- kon nuĭh. Tâm rnôk nê, Đảng n'hanh Ngih dak Việt Nam mô dơn mât uănh, đăp mpăn nău dơi an nuĭh ƀon lan tâm dak ma hôm tĭng ƀư năn ngăch pah kan mât njrăng đah nuĭh ƀon lan Việt Nam ta dak bah dih đŏng.

Bol ma prăk ngân sách mpêt đê̆, jêr jŏt ntul rlong ăp âk ntil, dak he hŏ kơl hang rbăn nuĭh ƀon lan Việt Nam gŭ dak bah dih đăp mpăn nău rêh, mât nkrum săk rêh, drăp ndơ n'hanh ăp nău dơi, nău geh di; nkre lah ngoăy tâm rnoh đêt dak ƀư dơi ăp trong mpăr hăn wơt ƀon lan geh nău rêh jêr jŏt, nău ŭch geh khlay sĭt dak du trong ăp tŏng rêng, đăp mpăn n'hanh lam lĕ rngôch pah kan njrăng, n'gang nuh srê geh nău tam. Kơp êng tâm năm 2020, Bộ Ngoại giao hŏ kan nsum đah ăp n'gâng kan: Dak si, tahen njrăng n'gang neh dak, Công an, ntung trong nchuăn rdeng n'hanh ăp n'gor geh tât an ƀư rlău 300 bôk ndeh păr, wơt bơi 85 rbăn nuĭh ƀon lan sĭt bah 59 dak, nkual neh lam ntŭr neh plơ̆ sĭt dak nơm đăp mpăn. Wa Phạm Bình Minh - Groi Thủ tướng Chính phủ, Bộ trưởng Bộ Ngoại giao an gĭt:

“Rnôk dŭt têh tâm rơh nuh srê têh Covid-19 nê lah Việt Nam lah rnoh dŭt đêt dak geh ăp ndeh păr hăn wơt ƀon lan Việt Nam geh kol khan sĭt dak, nê lah nău dŭt n'hâm khlay".

Rnoh âk nuĭh Việt Nam hăn kan dak bah dih nklăp rlău 500.000 nuĭh n'hanh rlău 100.000 kon se hăn nti dak bah dih. Bu ur Việt Nam gŭ sŏk sai dak bah dih nklăp 200.000 nuĭh. Đah ƀon lan ăp rnoi mpôl đê̆, lơn âk lah hăn kan dak bah dih ta ăp dak Trung Quốc, Nhật Bản, Hàn Quốc, Ả-Rập-Xê-Út, Malaysia, Đài Loan, Hàn Quốc, Singapore, Lybia, Trung Ðông, Qatar, Cộng hòa Séc..., du đêt hŏ dơi plơ̆ sĭt dak, tâm nê dŭt ntoh lư lah bôk ndeh păr wơt nuĭh ƀon lan Việt Nam sĭt bah tơm nuh srê Vũ Hán - Trung Quốc plơ̆ sĭt nar 10/2/2020.

Đah ăp nuĭh ƀon lan hôm dôl gŭ rêh, kơt nti n'hanh pah kan ta dak bah dih, Bộ Ngoại giao n'hanh ăp nhih pah kan ntơh măt Việt Nam gŭ ta dak bah dih way tâm ôp, ntrŭt ntrôl, tâm boh lhăt đah mpeh dak bah dih, nhih pah kan dơi kan ta ntŭk gay đăp mpăn gŭ rêh, mât chăm n'hâm suan, kơt nti, pah kan...dŭt uĕh an nuĭh ƀon lan. 

Ntoh lư kơt ta Nhật Bản - ntŭk âk nuĭh rnoi mpôl đê̆ hăn kơt nti n'hanh hăn pah kan, Đại Sứ quán hŏ tâm ôp đah ntŭk rgum mbơh nti bah ăp n'gor, gay dăn đă n'hao âk trong ôp duh ndal nău ngơi Yăn. Nău dja dŭt khlay yor tâm mpôl 200.000 nuĭh lah thực tập sinh, tâm rnoh nê geh nuĭh rnoi mpôl đê̆ hăn kan dak bah dih, nău ngơi man ma rklŭ rklă bar pe tong gĭt nău ngêt sa dơm, lah geh ntưp ji ri mô tŏng mông nar gay ma rblang. Aƀaơ thủ đô Tokyo n'hanh bơi du n'gul rnoh n'gor hŏ n'hao âk trong ôp duh ndal geh nău ngơi Yăn. Bơi 20 mpôl nuĭh Việt ta 20 n'gor bah Nhật Bản ntop kơl an sứ quán kơl mpôl. Cán bộ, nuĭh kan bah Đại sứ quán Việt Nam ta Nhật Bản hŏ rong ăp nuĭh 1 nar prăk khay gay rvăt ndơ ngêt sa an ăp nuĭh ach o mô geh nău dơi trok tâm. He mbra dơi lah, lah nău kan geh nkô̆ khlay mpơl nuih n'hâm tâm mât tâm kơl, ơm nău way uĕh lăng bah nuĭh Việt he. Wa Vũ Hồng Nam - Đại sứ Việt Nam ta Nhật Bản nkoch:  

“Năm 2020 lah du năm dŭt jêr jŏt, ntơm bah bôk năp mpôl hên hŏ ntrŏng pah kan mât njrăng nuĭh ƀon lan lah dŭt n'hâm khlay, mpôl hên ntrŏng dơi nău dơn kan nê đah neh dak, đah ƀon lan n'hanh kơl mpôl hên rlău dơi ăp ntil jêr jŏt gay ƀư lôch jêh nău kan dơi jao".  

Pah kan mât njrăng nuĭh ƀon lan Việt Nam gŭ dak bah dih hŏ n'hanh dôl rdâk tay nău nsing nơm bah ăp nuĭh kon gŭ bri bu tu rbư tâm ăp trong kơl bah Đảng, Ngih dak; kơl kônh wa geh tay nuih n'hâm "răm mƀak", geh tay nău dêh rŏng n'hanh rƀŏng sĭt mpeh ƀon tơm neh dak. Oh Vũ Thị Tuyên, nuĭh rnoi Thái ta Bắc Giang, Hà Giang, dôl hăn nti ta Mỹ nkoch:

“Mpôl hên dăn rvăt vé ndeh păr dŭt âk tơ̆ hôm, yơn mô dơi sĭt Việt Nam, dŭt rngot yơn dŭt lah uĕh ăp kônh yơ đại sứ quán ta aơ, ta bang Sanfransico, Texas kơl mpôl hên joi ăp bôk ndeh păr, joi ntŭk gŭ ntŭk sa rlu rlău gay geh suan hăn joi ăp bôk ndeh păr êng ƀa ƀă".

Aƀaơ âk dak n'hanh nkual neh dôl hôm mpăng đêt n'hanh ntĭl mpông ăp trong ndeh păr hăn dak bah dih đŏng, mô an jŭr rlu mô lah đă sek uănh si ƀŭt kơt si ƀŭt kơp dơn ngăch dăng n'hâm suan ƀư âk nuĭh geh kol khan tay ta ăp tach ndeh păr hăn dak bah dih. Gay der bah ăp kol khan kơt nê̆, njrăng đă nuĭh ƀon lan Việt Nam lah nsum n'hanh nuĭh ƀon lan rnoi mpôl đê̆ lah êng dôl gŭ dak bah dih lơi ir rsong hăn, der bah geh ma nău ntưp rêng nău ji, tĭng jăp ăp trong njrăng der nuh srê tĭng nău njrăng đă bah dak tơm jay ta ntŭk he gŭ, way hăn uănh năl n'hanh pơk uănh ăp nău lư mpeh ăp ndeh rklư rsong hăn, trong mpăr hăn dak bah dih kơt quy định mpeh ăp si ƀŭt khlay gay tĭng ƀư ăp trong mpăr gay mô geh nău kol khan tay ta dak bah dih./. 

VOV 4- Nuĭh rblang: Điểu Thân