VOV4.M’nông - He nchrăp tâm nar lam ƀon lan hăn săch gay sơch luh ăp nuĭh ntoh lư, ngăch prăl ntơh măt an nău ngơi bah cử tri ta ntŭk rgum nchră Quốc hội, ntŭk rgum nchră HĐND ăp gưl. Du nkô̆ nău ma nuĭh ƀon lan uănh khlay, lah lôch dơi sơch lăp, nuĭh ntơh măt mbra ƀư nău ton bah he đah cử tri mhâm ƀư, nău groi nđôi nău ton bah đại biểu mhâm jêng. Nkô̆ nău dja mbra dơi nkoch tâm nău nchih: “Mhâm trong ƀư gay groi nđôi nău ton bah nuĭh ntơh măt đah ƀon lan ?

Nteh bah nău ƀư mprơ karaoke, bah nău ƀư thùng tăch kĕo kéo têh ƀư dơi Kruanh Ủy ban Mặt trận Tổ quốc nkual ƀon têh HCM rgum nău rgop bah nuĭh ƀon len n’hanh ndơ̆ an ta rơh rƀŭn tal 20 bah HĐND nkual ƀon têh HCM khóa 9 lĕ jêng nar ôp khuh n’gôr. Wa Nguyễn Thành Phong-Kruanh UBND nkual ƀon têh HCM n’hanh lah nuĭh ntoh măt HĐND khóa 9 dơn geh nău njuăl bah nuĭh ƀon lan lah nău ji nuih bah lơ. Wa Phong an gĭt rnôk dơn njuăl nău lah bah nuĭh ƀon lan, wa lĕ njuăl tay an kruanh ăp ntŭk geh lah gay uănh nđôi n’hanh mkra. Nkual ƀon têh HCM ndăn gay geh du bôk nău kan ƀư na nê̆ gay nking n’gang nău mprơ karaoke, loa kĕo kéo... têh nteh khuch nuĭh ƀon lan. Tĭng wa Nguyễn Thành Phong, wa nsrôih mro mkra tĭng nău tâm nău dơi mkra, mô an bah kơi nuĭh ƀon lan nkah tay:

         “Way rnôk mâp nuĭh ƀon lan ri jêh rgop nău bah kônh wa ƀon lan jêh nĕ văn phòng ủy ban rgum tay n’hanh njuăl ăp nău dăn đă nuĭh ƀon lan nĕ tât tĭng n’gâng kan, moh nău dơi mkra quận ri quận mkra; nău mpeh dơi mkra n’hanh rgop tâm ôp tâm nchră bah n’gâng kan geh ơh n’hanh rblang gay bah kơi mâp mô geh nu nău nău, nu nău kônh wa nkah tay rgop lĕ nkoch ntơm bah năp nĕ”.

         Nĕ lah ngoay tâm âk nău ton bah nuĭh ntoh măt đah ƀon lan dơi ƀư. Yơn hôm e mô đêt nău ton jŏ jong. Âk năm aơ, rnăk wa Phạm Thị The dôl rêh ta nău nchrăp ƀư n’gul gâl Bình Quới-Thanh Đa. Rnăk wâl wa mô dơi nkra jay, tăch jay mô lah mô dơi an oh kon yor mô dơi ƀư sam bŭt sam tra pháp lý. Tĭng wa The, nău aơ dơi ndơ̆ ta âk rơh mâp bah nuĭh ntoh măt ƀon lan đă đah nuĭh ƀon lan yơn tât aƀaơ knŭng dơi dơn nău ton. Wa The n’hanh rbăn rnăk ta aơ knŭng kâp n’gâng kan mkra ngăch nău dăp rgum gay đăp mpăn nău rêh.

         Đa nuĭh ƀon lan, nău ma khân pơng rvê, nĕ lah ndơ lơh âk nuĭh ntoh măt ndơ̆ nău ton đah nuĭh ƀon lan yơn tât dŭt năm kan ri mô dơi ƀư kơt bôk nău kan ƀư, nău ton kơt rnôk dơi săch. Đah nău groi nđôi nău ton bah nuĭh ntoh măt, tĭng Luật sư Trương Thị Hòa-Ủy viên Mặt trận Tổ quốc Việt Nam Nkual ƀon têh HCM ri tă bah nău mbơh ta ăp rơh mâp đah nuĭh ƀon lan. Nău mbơh kơl nuĭh ƀon lan dơi ton bah nuĭh ntoh măt lĕ ƀư ntŭk tât, wăk kol ntŭk bah yor mô di nău ton dơi ƀư tŏng ăp, mô di nău ton dơi ƀư du năng du nar. Yơn lah, nău aơ ta ăp rơh mâp nuĭh ƀon lan mô hŏ dơi ƀư uĕh:

         “Groi nđôi aơ gâp an lah he ntrŭnh mbơh m’hâm ƀư tâm rơh mâp đah nuĭh ƀon lan. Ri he mbơh nkôp đah bôk nău kan ƀư ri nuĭh ntoh măt moh ndơ lĕ dơi ƀư ? Ri gâp saơ nkô̆ nău tâm ăp rơh mâp nuĭh ƀon lanmô tŏng mông mô lah mô geh nău aơ. Rlău ma mâp nuĭh ƀon lan an geh trong ƀư gay nuĭh ntoh măt dơi ƀư nău nĕ mbơh an nuĭh ƀon lan gĭt. He mô hŏ nta an”.

         Wa Trần Việt Anh-Ủy viên Ủy ban Trung ương Mặt trận Tổ quốc Việt Nam an gĭt: Măt trận Tổ quốc Việt Nam ăp gưl tâm rgop đah ăp ngih pah kan ntoh măt nuĭh ƀon lan đă bah Quốc hội n’hanh ntŭk ƀa ƀơ uănh lah tay ăp bôk nău kan ƀư bah ăp nuĭh ntoh măt. Yơn lah, wa Trần Việt Anh dăn đă an nê̆ đah nău ntrŭnh n’hanh mĭn njêng rgâl di nău ton. geh kơt nĕ nkre kơl nuĭh ƀon lan dơi gĭt nău ton bah ntoh măt lĕ ƀư tĭng m’hâm ƀư n’hanh rlơ̆ tay nuĭh ntoh măt dơi an nuĭh ƀon lan gĭt, nău ton bah nơm dôl wwăk kol moh ndơ:

         “Luật ndâk njêng tĭng nău ƀư bah nuĭh ntoh măt Quốc hội n’hanh nuĭh ntoh măt HĐND. Nĕ kuăl lah luât nău kan bah nuĭh ntoh măt ƀon lan. Aơ lah nău gâp mĭn dŭt khlay, yơn lor lah an geh ntrŭnh gay ƀư tĭng n’hanh ăp nău ntrŭnh aơ an ƀư tâm ban kơt du nău kan he an ƀư”.

                   N’gluh an nău ƀư tĭng nău ntrŭnh đah nău groi nđôi nău ton bah đại biểu, Tiến sĩ Vũ Trung Kiên-Groi kruanh khoa Xây dựng Đảng-Học viện Chính trị nkual 2 an lah nău groi nđôi bah nuĭh ƀon lan lah khlay ngăn. Lah nuĭh ƀon lan ƀư uănh mĭn mbra ôp nuĭh ntoh măt; đă mbơh tay nkô̆ nău ôp tâm rơh mâp êng:

         “He lơi kâp ăp nuĭh ƀon lan geh nău ji nuih đah chính trị, yơn he ŭch du đêt nuĭh kơt ăp đồng chí rlu ranh, ăp đồng chí tahen, ăp nuĭh gĭt blău, ăp đồng chí tahen ơm.... Nsrôih gay tĭng ăp nuĭh ntoh măt n’hanh ôp ăp nuĭh ntoh măt”.

         Dơi an lah nuĭh ntoh măt ƀon lan lah têh ngăn bah ăp nuĭh, yor khân pơng lah nuĭh rkeh rkeh nuĭh ƀon lan nsing nơm an rnơm ƀư nuĭh ntoh măt an nău mĭn, nău ŭch bah nuĭh ƀon lan; ndơn măt nuĭh ƀon lan ƀư tĭng nău dơi têh bah ngih dak. Nău ntrŭnh săch săch dŭt rjăp, nău ŭch ngăn lah an mât uĕh nuih n’hâm ƀon lan ƀư tơm tâm rmôt kan, tâm ƀon lan gay săch geh ăp nuĭh ntoh măt ngăn ngên tâm di; ăp nuĭh ntoh măt ngăn ngên đah neh dak đah nuĭh ƀon lan.

Nuĭh rblang: Y Sưng Phê Ja