VOV4.Mnông- Roh nău kan, mô geh nău geh, an geh rgâl nău kan lah ăp nău ma nai nti mầm non bah dih ngih dak ta Dak Lak dôl tâm rdâng lôch tă geh jŏ khay nuh srê Covid-19 ntoh luh. Nău mât nai nti rnôk mô geh prăk khay lah nău dŭt jêr bâh n’gâng kan ntĭm nti mầm non bah dih ngih dak ta ntŭk aơ.

  Bơi tât 10 năm krêp bên đah nău kan ƀư nai nti mầm non mât nti oh kon se jê̆, nai nti Trần Thị Hải, ngih nti mầm non tư thục Tuổi thơ, ta phường Tân Tấn, nkuăl ƀon têh Buôn Ma Thuột mô mĭn lah geh rnôk rlu nti mô geh prăk khay tâm âk khay kơt aơ. Mô kơt nai nti ta ăp ngih nti ngih dạ, ăp nai nti bah dih ngih dak kơt nai nti mô geh dơn nău kơl an bâh ăp ngih nti. Rlu nti lah mô geh prăk khay. Gay ma geh prăk dŏng tâm nău rêh, nai nti joi nău kan tăch ndơ Online n’hanh ŭch ơm plơ̆ tay đah nău kan mât nti oh kon se jê̆. Nai nti Trần Thị Hải nkoch:

“ Bâh ntơm rlu njrăng nuh srê tât aƀaơ nai nti hên rlu nkre. Nău way ăp ntil prăk dŏng tâm rnăk vâl knơm ma prăk khay dơm, bar pe khay bôk năp hôm geh prăk ma dŏng jŏ kơt aơ hên mâp jêr jŏt ngăn. Aƀaơ ndơ geh ndơ ƀư dơm, kâp uănh tay du đê̆ nar tay gĭt dơi hăn nti tay đŏng lah mô”.

  Mô dơn nai nti geh nău jêr jŏt, ma ăp ngih nti, rmôt nti bah dih ngih dak lĕ geh nău jêr jŏt âk ngăn đŏng rnôk ma ngih nti lĕ rlu âk khay ba năp. Nai nti Đồng Thị Thuận, Hiệu trưởng ngih nti mầm non Tây Nguyên, ta phường Thành Nhất, nkuăl ƀon têh Buôn Ma Thuột an gĭt, ngih nti dŭt ji bôk tâm nău uănh kơp dŏng gay ma mât rnoh prăk tâm rnôk jêr jŏt aơ.

Ngih nti geh rlău 40 cán bộ, nai nti, nuĭh kan. Ăp oh kon hoc rlu nti, ngih nti mô geh prăk yơn hôm nha geh trok âk rnoh prăk dŏng. ăp khay ngih nti trok ăp rnoh prăk kơt lah: prăk manh, prăk kon an ngân hàng, ndơ̆ BHXH, BHYT, bảo hiểm roh nău kan an nai nti, nuĭh kan tĭng nău ntrŭnh. Năi nti Đồng Thị Thuận mĭn rvê.

“âk khay aơ ngih nti mô geh prăk gay ma trok prăk khay an nai nti jêng lah ăp nai nti dŭt jêr ngăn. Ŭch ăp gâl kan an geh nău kơl êng an n’gâng kan hên. Ngăn lah nai nti mầm non geh nău kơl kan êng an ăp nai dơi geh gŭ tay ngih nti rnôk tât kon hoc hăn nti. Nău tay lah, ăp rnoh kơl an ngăch geh gay ma nuĭh pah kan ơm geh dơn tâm rnôk mâp jêr jŏt bâh nuh srê aơ”.

      Lam n’gor Dak Lak aƀaơ geh 70 ngih nti mầm non bah dih ngih dak n’ưhanh rlău 80 ntŭk mât oh kon se mât kan bah dih êng. Nău way bâh gâl nti mần non lah mât rong jêng lah jêr ma ƀư nti trực tuyến. Ngih nti mô dơi nti gay ma njrăng rdâng nuh srê Covid-19, nai nti mầm non bah dih ngih dak mô geh nău kan, kơt lah lĕ rngôch mô geh prăk dŏng. Mpeh nău kơl an aơ, wa Phạm Đăng Khoa, Giám đốc sở giáo dục n’hanh đào tạo Dak Lak an gĭt.

“Mpeh ăp nău jêr jŏt đah n’gâng kan ntĭm nti bah dih ngih dak, ngăn lah ntĭm nti mầm non rĭ UBND n’gor lĕ ntĭm đă an ntŭk kan ntĭm nti n’gor uănh kơp lĕ ăp nai nti pah kan tâm ăp ngih nti bah dih ngih dak đah gâl nti mầm non gay ma mbơh dăn đah UBND n’gor mbơh tơih an chính phủ gay ma geh dơn nău kơl an tĭng Nghị quyết 68 bâh chính phủ lah mô geh nău kơl an bâh chính phủ rĭ ăp ntŭk kan ntĭm nti bah dih ngih dak, ngăn lah ntĭm nti mầm non mô dơi geh  prăk dŏng đah âk khay nuh srê ma ăp ngih nti mô dơi hăn nti”.

        Ăp ntŭk kan ntĭm nti mầm non mât kan bah dih ngih dak geh nău kan khlăy gay ma kơl an ăp ngih nti mầm non ngih dak, ngăn lah ta ntŭk âk ƀon lan gŭ, nkre lah ntop âk ta nău kan rêh jêng ntĭm nti ta Dak Lak. Yơn nău tât bâh nuh srê Covid-19 jêr njrăng kơt aƀaơ, ăp ntŭk kan ntĭm nti mầm non bah dih ngih dak ndrel đah mpôl nai nti dôl dŭt jêr tâm nău kan mât nău rêh jêng n’hanh nău kan bâh ăp ngih nti. Yor nĕ, ăp nău kơl an ntŭk kan ntĭm nti mầm non bah dih ngih dak mpeh ndơ dŏng, mô sŏk, n’huch soăy, manh prăk an geh mât kơl âk tay lơn.

Nuĭh rblang: Thị Đoắt