VOV4.M'nông: Năm aơ lah năm lor bôk năp rlău 150 rnăk ƀon lan nuĭh Mông ta ntŭk ƀư dak bât Krông Pách thượng, n'gor Dak Lak dơi wơt năm mhe ta ƀon mhe ntrơn du. Ăp gưl n'gâng kan bah xã tât n'gor dôl an nău uănh khlay mha êng n'hanh tĭng kơn njêng luh ăp jâng nsing nâp gay kônh wa đăp mpăn gŭ rêh, đăp mpăn pah kan jan sa, ton geh du nău rêh uĕh lăng lơn.  

Nar bôk năm mhe 2022, nô Ma Văn Cỡ, rnoi Mông, thôn Yang San, xã Cư San, nkuâl Ea Kar, n'gor Dak Lak hăn chop lŏ. Blah lŏ hvi 5 sào mhe srih tăm khay puh wai hŏ rlău n'gul khay, nô dơi pă neh tĭng săk ntrơn du ntŭk gŭ mhe, rong an ntŭk ƀư dak bât Krông Pách thượng. Du ding lah n'hong dak bât lir lam dak, du ding lah dâng sre uĕh jêng, ba ntơm hao jêng nđĭr uĕh, nô Cỡ lah rjăp kônh wa mbra mô hôm rvê mô tŏng phe. Dâk kalơ tôr lŏ, nô n'gơr let ƀon, rhơn an gĭt, Ngih dak an ntrơn du ntŭk gŭ mhe kơt nê̆ lah dŭt tâm di, nkual tuch tăm mir ba bah meng ntŭk ƀon lan gŭ, dŭt dơh an kônh wa. Lôch 6 khay thôn ntrơn du ntŭk gŭ mhe, rnăk nô hŏ ntơm đăp mpăn nău rêh, nhih jay têh uĕh. Nô Cỡ nsing nơm đah nău ntop kơl bah Ngih dak ndrel đah nău nsrôih bah ăp rnăk, nău rêh bah kônh wa nar lơn ma geh mbơm oi:

“Kônh wa lăp ta aơ gŭ rêh ri uănh nsum ntrŏng năl lah gŭ rêh mbro mbrăng hôm, aƀaơ nsrôih pah kan jan sa dơm, rgâl geh nău rêh. Dăn an lĕ rngôch ăp oh nô, kônh wa ntrơn gŭ ta aơ lah geh nău rêh đăp mpăn n'hanh wăng sa geh nău lap.”

Wa Vàng Seo Sàng, kruanh thôn ntrơn du ntŭk gŭ mhe Yang San, xã Cư Ea Lang, nkuâl Ea Kar, n'gor Dak Lak an gĭt, kônh wa gĭt dơi nău ntrơn du ntŭk gŭ mhe, đăp mpăn lơh mir jan sa du tơ̆ an hang rhiăng rnăk, đah hang rbăn nuĭh lah nău jêr jŏt n'hanh ân geh âk mông nar. Mhe aơ nơh, ăp gưl n'gâng kan ta ntŭk hŏ nsrôih gay ntop kơl an kônh wa n'hanh ăp rnăk ntrơn du bah ntŭk rong an ƀư dak bât Krông Pách thượng, mpeh xã Cư San, nkuâl M’Đrăk hăn rlău xã Cư Ea Lang, nkuâl Ea Kar. Bôk năp, ăp rnăk ƀon lan ntrơn du ntŭk gŭ mhe hŏ đăp mpăn nău rêh. Lơn lah, nău ntuh kơl trong điện, trong hăn, nhih nti, nhih dak si bah nkual ntrơn du ntŭk gŭ mhe dŭt ăp dăp, oh kon hăn nti ta ntŭk, kơl kônh wa đăp mpăn pah kan jan sa. Aƀaơ ăp rnăk ƀon lan ntrơn du ntŭk gŭ mhe hŏ dơi pă an neh tăm ba n'hanh dôl kâp pă tay neh mir. Yơn kônh wa mô geh ndrât ndal kâp nơm ntop kơl, đah rnoh trok tâm rĭng geh rlău 1 rmen prăk/rnăk rnôk ntrơn du luh bah ntŭk ƀư dak bât, âk rnăk hŏ lor nchrăp hăn rvăt tay neh mir. Nău tuch tăm ta aơ dŭt dơh soih yor tơm dak âk mpưm bah dak bât Ea Rớt, du gâl bah Trong nchrăp ƀư dak bât Krông Pách thượng, dơi weh ƀư tŏ an nkual ntrơn du ntŭk gŭ mhe, dŭt geh nkô̆ khlay n'hanh rŏng kơl kon nuĭh. Dâk ta nklang ntŭk ntrơn du ntŭk gŭ mhe, wa Vàng Seo Sàng nsing nơm an lah, jêr ma geh ntŭk ntrơn du ntŭk gŭ mhe geh jay têh uĕh kơt ntŭk ntrơn du ntŭk gŭ mhe dja. Ăp ntŭk ntô dơh uĕh mpeh ăp ntil kơl kônh wa geh nău nđơr wăng sa, hun hao:

“Gâp mĭn lah kônh wa nsrôih pơk hvi, nsrôih an oh kon he nơm. Kônh wa gŭ rêh ta aơ geh gung trong rsong hăn n'hanh lĕ ma trong rse điện, trong dĭng dak n'hanh nhih nti ăp tŏng đŏng, kônh wa mbra nsrôih gay wăng sa hun hao uĕh lơn".

Wa Mã Văn Cương, Groi kruanh UBND xã Cư Ea Lang, nkuâl Ea Kar, n'gor Dak Lak an gĭt, aƀaơ hŏ geh 160/230 rnăk ƀon lan ta xã Cư San, nkuâl M’Đrắk ntrơn du tât ntŭk gŭ mhe mbrô 1 rong ntŭk nchrăp ƀư dak bât Krông Pách thượng. Lĕ rngôch ăp rnăk ntrơn du ta aơ dơi n'gâng kan xã tâm mpă nuĭh gay ntop kơl nuĭh ƀon lan rdâk jay, tĭng kơn đăp mpăn nău rêh ta ntŭk gŭ mhe. Săk wa Cương nơm dơi tâm pă ƀư nkre Bí thư bah thôn ntŭk gŭ mhe, lôch nê, rƀah gĭt nău ŭch rŏng bah kônh wa, nkra ngăch mô lah dăn đă hao gưl bah lơ. Aƀaơ, lĕ rngôch ăp nkô̆ nău têh mpeh nău geh ntŭk gŭ rêh bah nkual ntŭk gŭ mhe hŏ dơi nkra kloh rvah. Aƀaơ dơn hôm nkô̆ nău nkra neh tuch tăm dơm, kônh wa hŏ dơi pă an 5 sào neh ba, hôm 5 sào neh mir dôl hôm kâp dơi pă an đŏng. Lôch jêh pah kan dja đŏng lah nkual ntrơn du ntŭk gŭ mhe hŏ tŏng ăp dăp hôm. Gay ƀư an nuih n'hâm kônh wa rhơn nđơr rnôk wơt năm mhe lor bôk năp ta nkual ntrơn du ntŭk gŭ mhe, nkuâl n'hanh xã hŏ sŏk prăk ngân sách, rgum tơm prăk bah lam rêh jêng kon nuĭh, nchrăp ăp nklâm ndơ, rvăt sŭr, rvăt djăr kơl kônh wa wơt năm mhe tâm răm mƀak:

“Nkuâl kan nsum đah xã n'hanh lam trong kan chính trị bah thôn, ta aơ njêng bôk năp hŏ ăp tŏng hôm, ntơm bah chi bộ, ban mât njrăng êng hŏ njêng ntơm bah khay 9/2021 hôm, bôk năp hŏ ăp tŏng lĕ. Ntop kơl kônh wa drăp ndơ, rgum tay du đêt doanh nghiệp ta ntŭk gay geh ăp nklâm ndơ. Nsrôih gay kônh wa wơt Tết, rhơn năm mhe răm mƀak”

Năm mhe 2022 hŏ goh mpông, nău rêh bah kônh wa ta nkual ntŭk gŭ mhe mbrô 1 dak bât Krông Pách thượng, xã Cư Ea Lang, nkuâl Ea Kar, n'gor Dak Lak dôl mbrơi dơi mpơl săk nsing ta nău geh ntŭk gŭ đăp mpăn. Ăp mblâm jay têh uĕh hŏ n'hanh dôl dơi rdâk tay, ăp mir ba hŏ hao jêng nđĭr uĕh, ăp mir cam, mir play bŭng n'hanh ăp ntil tơm sa play dôl ma tăm hao jêng, đah nău nsing nơm mpeh du nău rêh uĕh lăng lơn bah kônh wa ntŭk ntrơn du ntŭk gŭ mhe ta Cư Ea Lang./.

Nuĭh rblang: Điểu Thân