VOV4.M’Nông: Ntơm khay 10/1990, tâm rơh rƀŭn “Tâm rgop dak si tahen ƀon lan” lam dak tal bôk năp, N’gâng kan dak si ndrel n’gâng kan neh dak tâm ban nau leo nau tâm rgop nsum ma tahen ndrel ƀon lan jêng bôk nau kan geh moh “Bôk nau kan dak si mrô 12-tâm rgop tahen ndrel ƀon lan ndâk njêng n’gâng kan neh dak lam ƀon an ndrel kơl an n’hâm soan ƀon lan”. Rlet 30 năm, bôk nau kan geh hŏ ndâk dơi ntrong ƀư, ngih dak si tâm rgop nsum tâm ăp nkuăl gôl dak lêng bah neh dak ndrel kơp dơn nau săk tam tâm nau mât chăm n’hâm soan bah ƀon lan ndrel tahen tâm ăp gôl dak.

Wa Nhan Thị Lùng-du hê nŭih ƀon lan tâm xã gôl dak Long Vĩnh, nkuăl Duyên Hải, n’gor Trà Vinh nkoch mpeh nau saơ bah nơm ân ăp cán bộ bah ngih dak si tâm rgop nsum dak si tahen ndrel ƀon lan tâm Đồn Biên phòng Long Vĩnh kơt aơ:

‘Gâp ji tâm nting vay lêt rgănh ngăn ri kŏ hăn tât tâm Đồn biên phòng. Gâp hăn mô dơi ri cán bôk hăn tâm ngih gâp gay ma chuh dak si ân. Dak si cán bộ ân gâp ri ngêt lah nơm saơ bah, bah ji, hăn pah kan dơi tâm rnăk nơm. Đồn ta aơ kơl ƀon lan âk ngăn”.

Nê mô êng lah nau rŏng bah wa Lùng ma đah ƀon lan tâm xã, Ngih dak si ndrel ăp nai dak si tahen hŏ jêng ntŭk rnơm lah saơ ji kuet. Lôch âk năm, cán bộ nai dak si ta aơ mô êng mât chăm ân tahen nơm ma hôm kơl an, mât chăm n’hâm soan ân ƀon lan tâm xã gôl dak. Thiếu tá Lê Văn Sơn, Kruanh ngih dak si tâm rgop nsum Đồn Biên phòng Long Vĩnh, nŭih gŭ kan 24 năm đah nau kan dak si tâm aơ nkoch:

‘Aơ lah xã nkuăl jru ngai ri ma nơm tât ta aơ pah kan ri saơ kônh wa mâp âk nau jêr ngăn mpeh dak si, ŭch khám ri hăn ngai, hăn choat dak đŏng. Ri ma gâp kŏ tĭng nti nau kan, kơt tĭng nti gay ma khám ndrel ma săm ân kônh wa”.

Mô êng trâm xã gôl dak Long Vĩnh, nkuăl Duyên Hải n’gor Trà Vinh ma tâm 30 năm ma aơ, nau kan ngih dak si ndrel ntŭk kan tâm rgop ƀư ndrel ƀư geh săk tam ngăn tâm ăp nkuăl, gôl dak bah neh dak kơt Bạch Long Vĩ, nkuăl ƀon têh Hải Phòng, gôl dak Cồn Cỏ, n’gor Quảng Trị, gôl dak Lý Sơn n’gor Quảng Ngãi, gôl dak Phú Quý n’gor Bình Thuận...ndrel ngăn lah tâm nkuăl gôl dak Trường Sa n’gor Khánh Hoà. Ăp ntŭk aơ tă geh ngai ngăn ma neh kơh, ri ma ƀon lan mô dơi der ăp rnôk ji kuet...ăp nŭih hăn joi ka rnôk hă kan ri kŏ mâp khuch mpeh n’hâm soan, khuch rmanh tâm dak lêng. Ndri ma ăp ngih dak si tâm rgop nsum ma ƀon lan ma tahen kŏ jêng ntŭk nsing ngăn ân ƀon lan tâm dak lêng, gôp dak, tâm rgop mât nâp nau ƀư tơm bah neh dak. Nô Sầm Văn Lương, tâm gôl dak Trường Sa, n’gor Khánh Hoà, mbơh:

‘Lah du hê tâm xã gôl dak ri gâp kŏ geh mâp nau ji ndul, ji bôk. Rnôk hăn khám ri geh nai dak si mât chăm, kơl an ueh ngăn. Tă bah nê, gâp kŏ đăp mpăn lơn rêh tâm dak lêng”.

Nau kan tâm rgop dak di mô knŭng kơl an ƀon lan tâm xã nkuăl gôl dak, dak lêng ma hôm geh nau ueh tâm nau kơl an đah nai dak si. Giáo sư, Tiến sĩ, nai dak si Phạm Mạnh Hùng, Kruanh n’gâng kan dak si, Groi Kruanh Ban tuyên giáo Trung ương lah rjăp nau tâm rgop aơ lah nau ueh mpeh dak si. Yor tĭng wa, ntŭk kan dak si lah knŭng kơl an tahen dơm ri mô geh nau nkah blau mpeh nau kan nơm. Ndri ma nŭih ji mô âk, nau blau mhe mpeh nau kan mô dơi. Ndri đŏng, ntŭk ngih dak si râng nau kơl an n’ăp ƀon lan mơ dơi blau kan lơn ndrel mra geh kơl an tâm lơh.

Nau ngăn tă bah nau tâm rgop nsum mpeh dak si hŏ geh hun hao ueh, nai dak si geh n’hao nau blau ăp ding ndrel ntŭk kan, ndơ dŏng ân ăp ngih dak si, Ngih dak si tâm gôl dak kŏ geh nkra ueh nâp. Ăp ngih dak si tâm rgop hŏ săm âk nŭih ji chôt ndal, ji proch rmeh, rmanh rnôk hăn kan. Đah âk nŭih ji jâk ri naui dak si hŏ kơl an bôk năp gay ma dơi kâp rnôk leo ntrơn tât neh kơh gay ma săm, kơl an nŭih ji ngăch nau bah lơh. Ăp năm êp aơ, ăp nai dak si tâm gôl dak Trường Sa hôm geh pă ndeh mpăr kung gay a kơl, dŏng Telemedicine tâm nthoi gay ma uănh năl ndrel săm tă bah ngai ndrel ăp nai dak si bôk năp tâm neh kơh. Thiếu thướng, Groi Giáo sư, Tiến sĩ, nai dak si Nguyễn Hồng Sơn, Giám đốc ngih dak si Quân y 175, nŭih tă pah kan tâm ngih dak si nkuăl têh Trường Sa ntơm ăp nar mhe ndâk, tât rnôk aơ ngơi:

‘Phung hên geh du rmôt nŭih mro tâm lơh ndrel kơl an leo lor tâm nau râng nau hăn kan tâm ngih dak si tâm gôl dak lêng. Tal bar phung nơm geh du ngih dak si nâp, ueh, mhe, nau dơi tâm lơh ri ueh, nâp, nau tam kơl an ueh jăp. Mô lah nê lah ntŭk ngih dak si ma nơm hŏ geh nau kơl an săm ân bah ân ăp nŭih dôl ma geh nau ji tât ndal”.

Gôl dak lêng ngai, yơn tâm dăch hŏ tâm rgop nsum đah play nuih, nuih n’hâm ndrle ngăn lah nau dơi bah ăp tahen nai dak si. Ăp nŭih tahen nsoh tâm nơm 2 ntil ao mra lŏ ƀư ueh nau kan nơm, kơl an tahen, kơl an ƀon lan tâm nau mât chăm n’hâm soan, rgop nau ndrel ƀon lan mât dak lêng, gôl dak, mât nâp nkuăl dak lêng gôl dak bah neh dak./.

Nŭih rblang: H’Thi