VOV4. M’nông: Nău dơi ntrŏng năl rnoi nuĭh n'hanh nău dơi ntrŏng năl di tay rnoi nuĭh lah du nău dơi săk jăn tơm bah êng du hê nuĭh dơi pháp luật mât njrăng. Luật pháp an ƀon lan neh dak geh nău dơi ntrŏng năl di tay rnoi nuĭh bah he nơm lah geh nău ŭch. Ndrĭ he mbra dơi saơ lah Đảng n'hanh Ngih dak he dŭt uănh khlay tât nău dơi săk jăn tơm dja kơl an ăp nuĭh geh trong sơch êng tâm di, tŏng đah nău ŭch geh nău rêh, tâm ban kơt nău kơt nti bah săk nơm đŏng.

Việt Nam lah du dak âk mpưm rnoi nuĭh. Aƀaơ, Việt Nam geh 54 rnoi nuĭh oh nô, ăp rnoi nuĭh geh du săk tơm, văn hóa êng. Rnoi nuĭh dŭt âk lah rnoi Yuăn, âk tât 86,2% rnoh nuĭh, gŭ rêh lơn âk ta ăp nkual ƀon têh, nkual bri dâng rđŭng. Lơn âk ăp rnoi đêt nuĭh hôm ƀa ƀă dja gŭ rêh ta nkual yôk yang n'hanh nkual jru ngai ta mpeh Bắc, Tây Nguyên, miền Trung n'hanh đồng bằng sông Cửu Long.

Ntrŏng năl di rnoi nuĭh lah nău ntrŏng lor bôk năp rnoi nuĭh an êng du hê săk nuĭh (dŏng âk an kon se mhe deh rnôk ƀư si ƀŭt đăng kí khai sinh). Nău dơi ntrŏng năl di rnoi nuĭh bah êng du hê ntoh ntơm bah rnôk nuĭh nê deh, dơi ƀư jêng ngăn ta si ƀŭt nchih mbơh năm deh bah êng du hê nuĭh nê.

Nău dơi ntrŏng năl, nău dơi ntrŏng năl di tay rnoi nuĭh lah du nău dơi kơp dơn bah Bộ luật dân sự năm 1995 n'hanh dơi nđơn dŏng tay tâm Bộ luật dân sự năm 2005 n'hanh tât aƀaơ lah Bộ luật dân sự năm 2015. Nsing kalơ nđơn tay n'hanh rƀah ăp rnoh khlay bah ăp quy định tĭng ăp Bộ luật dân sự ntơm nơh ri Điều luật dja hŏ geh du đêt ntŭk rgâl nkra, kơi ntop tay bah kơi ntĭt kơt mpeh moh săk bah Điều luật: Điều 28 Bộ luật dân sự năm 2005 dŏng săk ntơ lah “Nău dơi ntrŏng năl di tay rnoi nuĭh" hôm Điều luật dja rgâl jêng moh săk kuăl jêng “Nău dơi ntrŏng năl, nău dơi ntrŏng năl di tay rnoi nuĭh". Yor nău dơi ntrŏng năl di rnoi nuĭh lah nău dơi săk jăn êng bah du hê nuĭh, geh ntơm bah rnôk nuĭh nê deh luh n'hanh dơi dŏng an ntrŏng năl di rnoi nuĭh lor bôk năp bah êng du hê nuĭh (nuĭh mô hŏ geh tĭng du rnoi nuĭh bah năp nê nơh).

Aƀaơ, nău rgâl n'hanh nău ntrŏng năl di tay rnoi nuĭh hŏ dơi ăp nhih pah kan pháp luật bah dak he uănh khlay n'hanh nta ăp trong dơh gay ăp nuĭh dơi ntrŏng năl di tay rnoi nuĭh bah he tâm ban kơt sơch rnoi nuĭh tĭng nău ŭch rŏng n'hanh nău mpŏng geh. Ăp nuĭh geh nău dơi tĭng rnoi me mô lah bơ̆ deh he nơm lah me bơ̆ rnoi nuĭh êng êng. Nkhêp me bơ̆ deh he nơm ndrel tâm gŭ ndrăng rnoi mpôl đê̆ he nơm ri oh kon mbra tĭng rnoi nê. Rnôk hăn nchih mbơh năm deh, nău kon moh tĭng rnoi nuĭh nsing tâm nău way mô lah nău tâm ban ŭch bah me bơ̆. i ngăn yor ăp nkô̆ êng êng ma nuĭh nơm nê ŭch rgâl tay rnoi nuĭh tĭng rnoi me mô lah bơ̆ ri hôm dơi nkra an ntrŏng năl di tay rnoi nuĭh he nơm đŏng.

Tĭng luật sư Nguyễn Anh Đức, mpôl luật sư nkual ƀon têh Hà Nội aơ lah nău dơi tơm bah kon nuĭh, rêng kan pháp luật Việt Nam dŭt nău rŏng kon nuĭh yor tâm nău rêh geh dŭt âk nuĭh ân ntrŏng năl di tay rnoi nuĭh he nơm. Tâm nê geh bar ntil nuĭh ân dơi ntrŏng năl di tay rnoi nuĭh geh me mô lah bơ̆ deh êng êng ân ntrŏng năl di tay rnoi nuĭh n'hanh du ntil đŏng lah hŏ dơn kon mât rnôk hŏ gĭt năl tay me mô lah bơ̆ deh bah he nơm ri geh nău dơi ntrŏng năl di tay rnoi nuĭh tĭng me mô lah bơ̆ deh hŏ ntrŏng năl.

  “Nău dơi ntrŏng năl rnoi nuĭh n'hanh ntrŏng năl di tay rnoi nuĭh hŏ dơi quy định dŭt kloh ta Bộ luật dân sự năm 2015. Ta điều 29 quy định êng du hê nuĭh geh nău dơi ntrŏng năl n'hanh ntrŏng năl di tay rnoi nuĭh bah he. Dơi quy định tĭng khoản 2, nuĭh mhe deh dơi ntrŏng năl rnoi nuĭh tĭng rnoi nuĭh me mô lah bơ̆. Nkhêp me, bơ̆ deh he nơm mpeh 2 rnoi nuĭh êng êng ri rnoi nuĭh bah kon, dơi tĭng rnoi nuĭh mpeh me mô lah bơ̆ deh mô lah tĭng nău tâm ban ŭch bah me mô lah bơ̆ deh nơm. Nkhêp mô geh tâm ban ŭch ri kon dơi ntrŏng năl tĭng nău way rnoi nuĭh nê, nkhêp mô geh nău way mô lah nău way êng êng ri rnoi nuĭh bah kon dơi tĭng nău way bah rnoi nuĭh đêt lơn. Nkhêp kon se geh ntlơi lêng mô hŏ năl dơi me mô lah bơ̆ deh n'hanh dơn ƀư kon mât, lah dơn geh me mô lah bơ̆ mât dơm ri rnoi nuĭh bah kon se dơi tĭng rnoi nuĭh bah nuĭh nê".  

Nkhêp kon se geh ntlơi lêng n'hanh mô hŏ dơi dơn ƀư kon mât , luật sư Nguyễn Anh Đức an gĭt tay.

“Hôm du ntil nuĭh đŏng lah nkhêp kon se geh ntlơi lêng, dơi rđău đă n'hanh mô hŏ dơi dơn kon mât ri ntrŏng năl rnoi nuĭh tĭng nău dăn đă bah nuĭh tơm mât bôk ntŭk pêt mât kon se nê mô lah tĭng nuĭh manh pêt mât kon se tâm rnôk nchih mbơh năm deh an kon se. Nău dơi ntrŏng năl di tay rnoi nuĭh quy định ta khoản 3 bah điều 29 lah 2 ntil nuĭh. Bôk năp ntrŏng năl di tay rnoi nuĭh bah me, bơ̆ deh, nkhêp me, bơ̆ deh mpeh bar rnoi nuĭh êng êng. Nuĭh tâl 2 lah ntrŏng năl di tay rnoi nuĭh bah me mô lah bơ̆ deh nkhêp kon mât hŏ gĭt năl tay me mô lah bơ̆ deh he nơm".

Đah ăp nău nkoch bah luật sư Nguyễn Anh Đức, mpôl luật sư nkual ƀon têh Hà Nội, aƀaơ nău dơi ntrŏng năl rnoi nuĭh n'hanh nău ntrŏng năl di tay rnoi nuĭh dơi an ƀư ta dak he du trong mbơh kloh rvah, mpơl nău tâm ban, mpơl kloh nău dơi bah ăp nuĭh ƀon lan tâm neh dak, uănh khlay rnoi nuĭh n'hanh khlay lơn nê lah nău tâm rŏng kon nuĭh bah Đảng n'hanh Ngih dak he đah ăp nuĭh ƀon lan gŭ rêh nsum tâm du mpôl 54 rnoi nuĭh.

VOV 4- Nuĭh rblang: Điểu Thân