VOV4.M’nông: Jêh 9 nar pah kan mro, ndak, rơh rƀŭn bôk năp, Quốc hội gưl XV hŏ jêh dĭng lĕ nau kan nchrăp luh ndrel geh nau dơi ueh. Ntoh nau ta nar lôch rơh rƀŭn, Kruanh Quốc hội Vương Đình Huệ jă ƀon an, tahen, cử tri tâm lam dak, ăp rmôt kan ntŭk kan, nŭih ƀon lan nơm tâm dak ba dih ƀư kơt tĭng ân ueh nau vay tâm rnglăp, rgum tu tơm gay ma nkân njrăng srê Covid-19, mât ân ueh nau rêh, n’hâm soan ân ƀon lan.

            Rơh rƀŭn tal bôk năp, Quốc hội gưl XV lah rơh rƀŭn bôk năp geh âk nau kan khlay, geh tâm rnôk geh srê Covid-19 dôl gah nau jêr, ntoh ngăn tâm nkuăl ƀon têh Hồ Chí Minh, du đê̆ n’gor mpeh ba dâng ndrel mra ntưp rêng âk. Ăp n’gâng kan, rmôt kan bôk năp ndrel lam ntrong kan chính trị dôl ma n’hao n’hâm rgum ƀư ăp nau kan njrăng, rdâng srê gay ma mât ueh ân nuih n’hâm, nau rêh bah ƀon lan. Bah năp nê, Quốc hội tâm ban nau nsôih ntrŭt dăng nau rhuăt ân gleh nar rƀŭn 8 nar rđil nau nchrăp gay ma rgâl bôk nau kan, nau tâm nchră ndrel ntop tây nau ntrŭnh nsum bah rơh rƀŭn ăp nau kan ndal, njrăng rdâng srê Covid-19. Nau nê ân saơ Quốc hội hŏ ơm ntrŭnh kơt tĭng nau kan, nau pah kan ngăch, năn yor nau geh num ê lor lah nau mât chăm n’hâm soan ân ƀon lan:

            ‘Nau mĭn jru ngăn bah ăp nau jêr, nau ntul rlong têh ngăn bah năp srê Covid-19, Quốc hội, ăp nŭih kan ntoh măt Quốc hội ƀư an ueh nuih n’hâm kan ndrel nau kơp, nau nsôih ndăn mông nar, pah kan bah dih mông ndrel ƀư ntop tay tâm ăp nar rlu, rgâl mhe, blau mhe, rgop âk nau kan ueh mhe, jru, tâm di gay ma Quốc hội uănh, nchră đah nau tâm ban prêh ngăn ndrel ntrŭnh 29 nau ntrŭnh. Mhe năn rklaih ăp nau kan njăch ndăn bah năp măt, nkre ntrŭnh ăp nau kan khlay geh nau dơi, jŏ jong, rgop nau ƀư jêng du rơh rƀŭn geh nau dơi tâm ăp ntrong, geh ƀon lan ndrel cử tri kơp dơn, tâm ban nuih n’hâm, rnê prêh”.

            Ta rơh rƀŭn bôk năp bah năm kan mhe, Quốc hội ƀư jêh nau kan ntrong kan tơm lah nau uănh, ntrŭnh nau ƀư, ân dŏng nŭih kan gưl prêh bah trong kan Ngih dak, đăp mpăn nau dơi, nau tŏng, nau kan, nau ƀư tĭng nau ntrŭnh bah Đảng ndrel pháp luật bah Ngih dak. Đah nau tâm ban ndrel nau rnơm prêh, Quốc hội hŏ săch Kruanh dak, Kruanh Quốc hội, Thủ tướng Chính phủ ndrel ăp rđau kan êng. Ndrel ma nê, Quốc hội uănh, ntrŭnh nau kan nchrăp tâm 5 năm 2021-2025. Nau nchrăp ntuh kơl jong năm. Nkre lah, uănh, ntrŭnh ntuh kơl Bôk nau kan bah neh dak đah nau ndâk njêng ƀon lan mhe ndrel Bôk nau kan bah neh dak mpeh nau n’huch ach o nâp nâl lvang năm 2021-2025.

            Kan uănh, ntrŭnh rgum ăp nau nchrăp kan, bôk nau kan gleh năm 5 năm tâm rơh rƀŭn bôk năp lah nau nôih ngăn bah Quốc hội, Chính phủ, ăp ntŭk kan geh tât, geh nau khlay tâm nau nsôih hao bah neh dak, njêng nau dơi gay chính phủ, ăp ntŭk kan, ăp gưl kan, ăp rmôt kan ơm nchrăp nau ƀư ăp nau ntrŭnh bah Quốc hội kơt nau ntrŭnh Đại hội tal XIII. Tâm nchră ăp nau tă dơi geh ƀư tâm nau nchrăp hun hao văng sa rêh jêng tơm prăk Ngih dak 6 khay bôk năm ndrel nau kan tâm 6 khay dŭt năm 2021, Quốc hội rnê nau nsôih bah Chính phủ tâm nau rđau kan ƀư 2 ntil kan: Nkre njrăng, rdâng srê Covid-19, nkre hun hao văng sa mât nau hun hao, mât chăm nau rêh, mât chăm n’hâm soan ƀon lan.

            Quốc hội đă jêh rơh rƀŭn, Chính phủ, Thủ tướng Chính phủ, ăp ntŭk kan tâm ntrong kan Ngih dak lŏ rgâl mhe, n’hao nau nâp, săk tam nau kan, ntrŭt dăng nau pă gưl, pă nau kan, nau dơi ân tâm di, hăn nsum ma nau uănh n’ôi, mêt uănh ndre nau mbơh bah ntŭk kan, êng nŭih, ngăn lah nŭih dâk bôk. Kruanh Quốc hội Vương Đình Huệ đă, ăp ntŭk kan bah Quốc hội, rmôt kan ntoh măt Quốc hội ndrel ăp rmôt kan ntoh măt Quốc hội lŏ rgâl ân nâp, n’hao nau dăng, săk tam nau kan, n’hao nau mêt uănh ƀư ăp nau ntrŭnh bah rơh rƀŭn:

            ‘Đă ăp ntoh măt Quốc hội ndal mbơh cử tri tâm lam dak mpeh nau ta ưgeh dơi bah rơh rƀŭn, vay mât nau tâm boh mâp ngăn đah cử tri. Quốc hội kuăl jă ƀon lan, tahen, cử tri tâm lam dak, ăp ntŭk kan, kônh wa nơm tâm dak ba dih mât ân ueh nau tâm rnglăp, tâm kơl, nkre ƀư nau tâm rnơm, kơt tĭng ân rjăp ăp nau ntrŭnh, ntrong kan bah Đảng, pháp luật bah Ngih dak, rgum nar kan, tu tơm ndrel n’hâm soan gay ma nkân uănh dơi geh srê Covid-19, mât n’hâm soan, nau rêh, đăp mpăn ân ƀon lan”.

            Nau dơi bah rơh rƀŭn tal bôk năp, Quốc hội gưl XV lah nau ndâk njêng geh nau ueh ân năm kan mhe. Tâm nau ƀư nau kan geh jao tĭng ăp nau ntrŭnh bah hiến pháp ndrel pháp luật, kơt tĭng ân ueh ăp nau kan khlay, ăp trong rƀŏng khlay tâm nau nkoch mbơh ta rơh rƀŭn bah Tổng Bí thư Nguyễn Phú Trọng, ƀư jêh nau kan ƀư nau ntrŭnh Đại hội Đảng lam dak tal XIII, đah nuih n’hâm mro rgâl mhe, mro ƀư ân jêh, kơt tĭng nau vay ueh ơm 75 năm, đah nau rđau kan bah Đảng, nau tâm ban hăn nsum bah lam ntrong kan chính trị, nau nsum n’hâm, nsum nau mĭn ndrel nau kơl an bah ƀon lan, bah cử tri lam dak, kônh wa nơm tâm dak ba dih ndrel băl bên lam ntur neh, Quốc hội gưl XV mra geh jêh nau kan geh Đảng ndrel ƀon lan jao ân./.

            Nŭih rblang: H’Thi