Yuh Hoàng Thị Tiếng, tâm xã Đình Phong tât nttŭk ƀư kan hành chính công xã Trùng Khánh, n’gor Cao Bằng ƀư săm ƀŭt ntrơn nau dơi dŏng neh. Mhe lăp tâm mpông, yuh geh cán bộ ntĭm, n’hêl ăp nhoat ntơm bah ăp săm ƀŭt  dŏng tât đăng ký trực tuyến. Rnơm nau ntĭm kloh, nơih gĭt ndrel nau kơl bah cán bộ, yuh Tiếng hŏ ƀư jêh săm ƀŭt ngăch ma mô mâp nau nkol:

            ‘Cán bộ mpeh nau kơl an nau kan hành chính công vơt ƀon lan ueh ngăn ndrel ƀư săm ƀŭt hành chính ngăch, rtŭt gleh lơn bah năp nơh. Yor lăp lah cán bộ ntĭm mbơh nau tâm ntŭk mâp gay ma rklaih ăp nau kan hành chính, tâm di ma nkô̆ nau bah nơm gay ma rklaih săm ƀŭt. Nkoch mbơh kloh ăp ntil ri ma ƀư ueh ngăch ngăn”.

            Kơp nsum lam dak, tâm 3 khay leo lăp dŏng n’gâng kan 2 gưl, nklăp 7 rkeh hồ sơ trực tuyến geh ndơn, rnoh rklaih tâm di nar geh rlau 90%. Rlau 3.100 ntŭk kơl an nau kan hành chính công gưl xã geh leo lăp dŏng, dŏng nau kan du mpông mhe, âk ntŭk dŏng nau blau njêng mhe ndrel nau mbơh ma điện tử. Ăp ntŭk aơ bôk năp geh ƀư ueh, pơk trong nơih ân ƀon lan ƀư nau kan hành chính. Âk rbăn cán bộ gưl xã geh ntĭm nti nau blau mrô, rgop nau n’hao nau mât.  Wa Trịnh Ngọc Trâm, Groi Kruanh UBND Phường Cửa Nam, Nkuăl ƀon têh Hà Nội, mbơh:

            ‘Hên năl nau kơl an lah nau khlay đah du n’gâng kan tâm dâng lah tâm êp ma ƀon lan, kơl an ƀon lan ueh ngăn, ndri ri nau ƀư nau kan hành chính mhâm ƀư gay ƀon lan đah n’gâng kan hăn kan tâm êp tâm dăch ngăn nê ân geh tâm di nuih n’hâm. Ndri ri hên hŏ janh ƀư, leo robot AI kơl an nau kan hành chính công. Hên ŭch n’gâng kan tâm dâng ân tâm dăch ma ƀon lan, êp kơt lah  du ntŭk ngăn ngên tâm dăch dơh ma ƀon lan ngăn”.

            Tĭng nau mbơh bah N’gâng kan Nội vụ, jêh 3 khay ƀư, nau kan n’gâng kan tâm nkuăl 2 gưl hŏ ăp nhoat ueh. Ntrong kan hành chính geh ƀư rtŭt gleh, rnoh ntŭk kan tâm nklang n’gul ndrel ăp bôk nau tơm ƀư ri huch, bah nê têm nkrem tơm prăk ngih dak, rhuăt gleh mông rklaih nau kan.

            Yơn lah, tĭng N’gâng kan Bộ nội Vụ Phạm Thị Thanh Trà, bol geh âk nau ueh, yơn nau jêr kŏ hôm âk đŏng:

            ‘Mpeh rmôt cán bộ, công chức gưl xã ri âk ntŭk ê geh tŏng dơi nau đă ƀư nau kan mhe, ê năn rklaih nau rmeh, mô tŏng, ngăn lah nŭih kan bah du đê̆ ntŭk kan công nghệ thông tin, ntrong nkoch mbơh rklaih nau kan hành chính ndrel ăp phần mềm ƀư nau kan bah ăp ntŭk kan pah kan mô đăp mpăn, ƀa ƀơ mâp nau nkol, nau ƀư n’ho ro ăp rnoh mrô đah ntŭk mbơh nau bah neh dak mpeh rnoh nŭih, mpông trong kan bah neh dak tât ăp n’gor ê geh tâm ban ƀư jêng nau jêr ân n’gor tâm nau kan kŏ kơt lah ƀon lan ndrel ntŭk kan tăch rgâl.

            Tâm rơh rƀŭn Chính phủ bôk khay 10, Thủ tướng Chính phủ Phạm Minh Chính lah rjăp, n’gâng kan 2 gưl mô knŭng lah rgâl mhe ntŭk kan, ma ân geh njêng nau rgâl ngăn tâm nau kan kơl an ƀon lan. Lah ƀon lan hôm geh nau đă, nau mbơh, phong ri rnôk nê nau kan bah Chính phủ hôm jêr, ŭch ân geh kan ân tam. Thủ tướng Phạm Minh Chính, đă:

            ‘Nau dăng dơi bah cán bộ rnôk aơ ê geh tâm ban mpeh nau kan. Ntrong kan bôk năp lah săk ăp nŭih kan ân geh nsôih hao lơn gay tŏng dơi nau ŭch đă; nau kan tal bar lah nơm ân geh nchiăr nti, ntĭm mbơh ân khân păng ri mơ khân păng geh nau dơi ndrel dơi ƀư. Ndrel nuih n’hâm pă nau kan, nau dơi ri nơm ân geh uănh tay, ntă nŭih blau ƀư ri nơm jao. Jao ân nkual nê, nkuăl nê ƀư, nkuăl nê nơm ndơn nau kan, mô dơ ƀư rgâl, ndrel n’hao nau mêt uănh. Ăp ntŭk kan, n’gâng kan, n’gor ân geh rgum tu tơm ndrel ndơn nau kan. Ntă nkuăl hôm vĭ vĕ ri nơm ân geh ntĭm nti”.

            Ăp nau tă dơi geh tâm nau dŏng kan n’gâng kan 2 gưl ân saơ aơ lah nhoat hăn tâm di ngăn tâm nau rgâl mhe hành chính, rƀŏng tât kloh, săk tam, geh. Nau tă geh dơi tâm 3 khay rlau aơ tâm rnôk mhe ndâk, mpeh bah năp hôm âk nau jêr, ntul rlong ân geh rlet rlau. Gay ngăn ngên lah n’gâng kan kơl an, ŭch geh nau nsôih tă bah Trung ương tât nkualư, pă gưl kan, nau dơi hăn nsum ma nau kan ndrel nau mêt uănh rjăp. Ndrel rlau ma nê, ân geh mro leo nau tâm ban nuih n’hâm bah ƀon lan hao ba lơ, uănh nê lah mâng veh ueh ngăn ân nau tam bah ntrong kan n’gâng kan./.