Nău nchih bôk năp: Jut jăng jay truh sat, nkưp nde – rdâk nău nsing nơm tât ăp ƀon lan Tây Nguyên. Pơk uănh tĭng trong link ta aơ: https://cms-vov4.vov.vn/mnong/nau-mhe-ntuk-reh-jeng-thoi-su-xa-hoi/jut-ngih-truh-sat-ndak-nau-rom-tam-ap-bon-lan-tay-nguyen-492118.vov4

Nău nchih gâl 2: Suan rhôp nău rŏng nuĭh- nđơr n’groh an bah bôk nău kan jut jăng jay truh sat

Nău nchih bôk năp bah du rut nău nchih “jut jăng jay truh sat – nkưp nde – rdâk nău nsing nơm ta ăp ƀon lan Tây Nguyên”, hŏ nkoch nău khlay ƀư tơm, dâk leo lor bah n’gâng kan Công an, rnôk mbăk anh nău dơn kan rnă njrăng, du ding ti mon mhe- jut jăng jay truh sat, nkưp nde kơl ăp rnăk geh nău rêh jêr jŏt tâm ăp ƀon lan. Gâl 2 bah du rut nău nchih, nkoch suan rhôp nău rŏng nuĭh bah Bôk nău kan jut jăng jay truh sat, nkưp nde tă bah Thủ tướng Chính phủ rgŏ jă hŏ rdâk tay nuih n’hâm “lha uĕh nkrum lha sat”, “nău tâm rŏng ƀon lan” tâm ăp nuĭh ƀon lan Việt Nam. 

Wa Nguyễn Đức Lực, nuĭh tơm ndranh ƀư jay ta xã Ia Ko, n’gor Gia Lai dôl mon 10 mblâm jay an rnăk ach o đah rnoh khlay 60 rkeh prăk/mblâm jay. Ăp mblâm jay dôl tâm rnôk ƀư lôch jêh yơn mhe dơn prăk ntĭt dơm. Wa Nguyễn Đức Lực nkoch, jut jăng jay truh sat lah bôk nău kan dŭt âk, jêng păng mô kơp roh geh:

“Lam ƀon lan nsum ti jut jăng jay truh sat, ngăn ma lah he kơt tĭng ƀư dơm. He dŏng du rnoh prăk ntuh kơl an kônh wa rnon prăk lŭ loih n’hâp mbrơi. He mbra nta joi nău kan gay kônh wa râng luh kan, jik pih mô lah klêh cà phê ta mir rnăk he, kơp prăk nar gay khân păng n’hâp mbrơi tĭng năm. Khân păng trok mbrơi bar pe năm ri lĕ rnon”

Krêp dêh đah n’gâng kan ta ntŭk, hăn ndrel nuĭh ƀon lan rlău dơi jêr jŏt, Viettel Kon Tum âk âk năm rlău aơ way nsrôih râng ăp nău kan tŏng ăp nău rêh jêng, lơn lah trong leo ƀư jut jăng jay truh sat, nkưp nde- du bôk nău kan têh geh nău rŏng nuĭh jru tă bah Thủ tướng Chính phủ rgŏ jă. Wa Diệp Trung Kiên – Groi Giám đốc Viettel Kon Tum (ơm) nkoch:

“Tĭng nău kuăl jă, tâm năm 2025, Viettel Kon Tum hŏ lor nchrăp dăn đă Tập đoàn ntop kơl n’gor 5 rmen prăk gay ƀư bôk nău kan jut jăng jay truh sat, nkưp nde n’hanh rgâl geh jay gŭ an ăp rnăk ƀon lan geh nău rêh jêr jŏt ta ntŭk.”

Ăp doanh nghiệp lăp kan âk nău dơn kan đah bôk nău kan jut jăng jay truh sat, nkưp nde, ri nău ntrŭt ntrôl nău dơn kan đah lam trong kan chính trị ăp n’gor Tây Nguyên nar lơn ma dăng. Bol joi âk trong nkra jêr mpeh tơm ndơ n’hanh siƀŭt neh tu an mon mhe- jut jăng jay truh sat, yơn Gia Lai n’hanh Dak Lak ra uănh tay na nê̆ n’hanh ăp n’gor njêng đề án jut jăng rlău 8.100 mblâm jay. Rnoh jay âk mpưm, rnoh jâk kan dŭt têh, hôm di tâm rnôk n’glăp nsum đŏng, ăp n’gor nha hôm ƀư lĕ nuih n’hâm an ƀư bôk nău kan, rgum lĕ rngôch tơm ndơ bah Trung ương tât tâm dâng đŏng. Wa Siu Trung – Groi kruanh Ủy ban MTTQ Việt Nam n’gor Gia Lai, an gĭt:

“Ban rđău đă mpeh tĭng ƀư jut jăng jay truh sat n’gor hŏ geh siƀŭt kuăl jă ăp doanh nghiệp, ăp nuĭh tâm n’hanh bah dih n’gor rgŏ jă gay râng rgop tay bah dih tơm ndơ ntop kơl bah Trung ương. Bah nê, wat jêh rnoh kan dơi jao geh tay tơm ndơ ƀư wat jêh bôk nău kan. Du đêt n’gor hŏ lor nchrăp đor lor prăk năn ngăch gay an ƀư. Bah meng nê, mpôl tahen hŏ dơi rgum tât, rgop nar luh kan gay đăp mpăn rnoh ngăch ƀư đŏng.”

Kơp ntơm bah 1/7, n’gâng kan 2 gưl lăp kan ngăn, ăp n’gor Dak Lak, Gia Lai, Lâm Đồng ra uănh tay lam lĕ rngôch bôk  nău kan jut jăng jay truh sat, ntrŏng năl hŏ an ƀư bơi 20 mblâm jay n’hanh rlău 1.900 mblâm hôm wăk kol. Ăp xã, phường mhe hŏ dơi jao nău dơn kan, mông nar na nê̆ an nău ƀư wat jêh ăp mblâm jay n’glĕ dŭt gay bôk nău kan jut jăng jay truh sat ƀư lôch jêh di rnoh ngăch.

 Wa Nguyễn Thị Hồng Hạnh – Kruanh Jrô kan wăng sa xã Cuôr Đăng, n’gor Dak Lak – an gĭt, tâm năm 2025, lam xã geh 31 rnăk dơi ntop kơl mon mhe ri mâp wăk kol geh tât neh ntu n’hanh siƀŭt rdâk njêng da dê. Rnôk rgâl jêng n’gâng kan 2 gưl n’hanh dơi jao nău dơn kan na nê̆ mpeh bôk nău kan jut jăng jay truh sat, xã hŏ tĭng ƀư ryôt ryiăt ăp gâl kan bah he:

“Jêr jŏt dŭt têh bah kônh wa mpeh neh ntu lah tă bah me bơ̆, yuh nô an  mô lah nđơn tay yơn mô hŏ rgâl săk, tăch blah neh; du đêt nuĭh dôl gŭ ta neh tuch tăm mô hŏ rgâl neh gŭ. Yor kơt nê̆, mpôl hên hŏ ntop kơl kônh wa ƀư siƀŭt rgâl, lôch nê tăch luh blah neh, lôch nê mơ ƀư ăp njuat rgâl săk mô lah ntlơi an tay mô lah rgâl neh gŭ. Hôm đah ăp siƀŭt rdâk njêng, công chức mbra njêng hồ sơ, ăp rnoh sŏk soăy geh tât rdâk njêng jay gŭ dôl dơi ƀư dơm”.

Ăp nău nsrôih bah n’gâng kan, nuĭh ƀon lan n’hanh doanh nghiệp, bôk nău kan jut jăng jay truh sat ta Tây Nguyên hŏ dơi an ƀư ăp kôp. Bí thư tỉnh ủy ăp n’gor ƀư kruanh ban rđău đă, đăp mpăn nău rgum dŭt âk an droh rklaih ăp wăk kol, ntrôl ngăch ƀư bôk nău kan. Wa Nguyễn Đình Trung, Ủy viên trung ương Đảng, Bí thư Tỉnh ủy Dak Lak, nkoch, hŏ geh ăp rnôk ntôn lah mô dơi ban rnoh ngăch bôk nău kan jut jăng jay truh sat, yor nuĭh ƀon lan dơn geh neh tuch tăm mô lah neh hôm geh săk kônh wa. Yơn đah nău dơn ngoăy bah lơ jŭr tât tâm dâng n’hanh nău rđău đă năn ngăch, ăp kŏ kol way dơi droh rklaih:

“Thường vụ Tỉnh uỷ way uănh khlay nkô̆ nău dja. Nsing tâm nău geh ngăn ngăn ta n’gor, Tỉnh uỷ hŏ njêng Ban rđău đă mon jay an rnăk ach o n’hanh ăp rnăk dơi kơl. Tỉnh uỷ hŏ rđău đă UBND n’gor, ăp n’gâng kan lĕ nuih n’hâm tĭng ƀư bôk nău kan dja, mhâm ƀư an geh nău tam, đăp mpăn di rnoh ngăch, di nuĭh.”

Tĭng chor jay mhe nâp djhư̆n luh hon ta ăp ƀon lan Tây Nguyên, mô dơn kơl nuĭh ƀon lan đăp mpăn ntŭk gŭ rêh, ma hôm bun dăp nău nsing nơm tâm ăp trong nchrăp di, dăch ƀon lan, yor an ƀon lan. Bah kơi ăp mblâm jay lah nău kan nsum lhăt đah Trung ương n’hanh n’gor, lah suan rhal bah ăp mpôl Công an, tahen, n’gâng kan tâm dâng, doanh nghiệp n’hanh nuĭh ƀon lan ndrel rgop suan.