Tâm n’hong hoch dăng bah nău rêh Cách mạng Công nghiệp 4.0, mhâm ƀư gay ăp rnoh khlay văn hóa way ơm n’hanh nău gĭt blău ƀon tơm ta ntŭk khlay mô geh roh chuêl? Mhâm ƀư gay păng nkre đah công nghệ têh mhe, njêng luh suan dăng mhe an jâng wăng sa nkual rnoi mpôl đê̆ n’hanh mpeh yôk yang? Nău ơh gŭ tâm nău năp nău blău wăng sa mbrô an bu ur rnoi mpôl đê̆.

Rnôk khoa học công nghệ n’hanh rgâl mbrô mô hôm ngai, ma hŏ jêng ndơ dŏng khlay, âk bu ur rnoi mpôl đê̆ hŏ rƀah ngăch nău dơh geh dja. Ma trong blău ƀư mhe, khân păng mô dơn ƀư geh ndrŏng an rnăk wâl he nơm ma hôm rêng lam rnoh khlay văn hóa uĕh êng bah rnoi nuĭh he đŏng, rgop ƀư jêng ngăn ngăn ăp rnoh tât kan bah trong nchrăp 8 "Tĭng ƀư tâm ban bu ur bu klô n’hanh nkra ăp nkô̆ nău jăch ndăn an bu ur n’hanh kon se" mpeh bôk nău kan gưl neh dak hun hao wăng sa rêh jêng kon nuĭh nkual rnoi mpôl đê̆ n’hanh mpeh yôk yang.

Ngoăy tâm ăp nău nkoch trêng nău nđơr nê lah njăr trong hăn bah Khà Thị Hạnh, bu druh rnoi Thái tât bah Lai Châu. Têh jêng ta nkual yôk prêh, Hạnh gĭt kloh rnoh khlay bah ăp ntil tơm dak si wăr he. saơ y học cổ truyền dôl mbrơi gĭt tât, păng nsrôih nti ăp tŏng ta Nhih nti Y Dược Lê Hữu Trác. Đah nău gĭt blău jru hvi, Hạnh mô dơn rƀah gĭt ăp ntil dak si ơm yău ma hôm gĭt dŏng khoa học gay ƀư an ndơ geh ƀư bah tơm dak si jêng dăch dêh n’hanh dơh dŏng lơn đŏng.

Ndăn suan dăng ring lam bah TikTok, Khà Hạnh hŏ njêng kênh "Tây Bắc TV". Ăp video geh ngăn rhôp tay rup rnôk hăn joi, rôk tôch, nkret njêng lha dak si ndrel đah ăp nău nkoch dơh wât mpeh nău tam hŏ wăch rgum âk mpưm nuĭh pơk uănh, kơl lha dak si Tây Bắc tât dăch lơn đah ăp nuĭh.

“Rnôk njêng mbrô pơk online Tây Bắc TV ri bôk năp mpôl hên rdâk njêng du mbrô pơk lor. Lôch nê, mpôl hên hŏ năl dơi ntŭk khlay kan bah he n’hanh tăch geh âk ndơ tuch tăm, lha dak si. Gâp saơ lah, dơn geh du hê he ƀư dơi dơm ri hôm ăp kônh wa êng ƀa ƀă ri mhâm ƀư?. Ndrĭ lah mpôl hên hŏ pơk tay âk mbrô n’hanh ntĭm nti an dŭt âk oh yuh ta nkual jru, nkual ngai lah ăp tơm mpôl Ocop gay gĭt mhâm ƀư gay ndơ̆ ndơ he geh ƀư ta online”.

Bôk năp, Khà Hạnh ŭch nkoch an gĭt dơm. Yơn nău plơng ơh uĕh bah năch, ăp nău nkoch mpeh nău ndơ geh ƀư bah he kơl ăp nuĭh ngăch dăng lơn hŏ kơl tay nuih n’hâm nđơr an păng. Hạnh năl saơ lah:

“Gâp saơ lah kon nuĭh rgâl n’hanh nău rêh rgâl đŏng. Lah kơt doanh nghiệp bah he ma mô ŭch rgâl tĭng ri jêng lah he mbra geh ntrâm jâng. Mô dơn nê Lai Châu lah du nkual neh geh âk ndơ tuch tăm kah khlay êng, lơn lah tơm dak si khlay. Yơn lah dơn kâp nơm tâm năch pâl nđaih hăn tât ntŭk dơm ri dŭt jêr jŏt ngăn, nkô̆ nău mpeh tăch păng geh mbrơi dŭt âk. N’hanh gâp saơ năch rvăt dôl ta online ri năch ta ah ntŭk ri he ân geh ta nê”.

Nkual rnoi mpôl đê̆ n’hanh mpeh yôk yang lah ntŭk gŭ rêh bah rlău 14,6 rkeh nuĭh, âk bơi 15% rnoh nuĭh lam dak, đah rnoh rnăk ach o âk bơi 22%, rlău âk tơ̆ rđĭl đah rĭng geh nsum lam dak. Bu ur rnoi mpôl đê̆ lah rmôt geh tât khuch dŭt hô bah mbăk anh jâk ji ngot ach o. Ntop tâm nê, tâm ƀah nău gĭt keh mbrô nha hôm mpơl kloh đŏng: rnoh âk nuĭh rnoi mpôl đê̆ dŏng Internet n’hanh dŏng máy tính hôm đêt rđĭl đah nău geh nsum, njêng  mpêr n’gar nking kol trong geh bah wăng sa mbrô.

Yơn lah, tâm ntul rlong way rŭ hôch săk geh. Bu ur rnoi mpôl đê̆ lah ăp nuĭh rƀah gĭt nău blău ƀon tơm ta ntŭk mpêt khlay, lah nuĭh tơm bah ndơ geh ƀư tuch tăm mha êng, thủ công mỹ nghệ uĕh jêr. Aơ lah tơm ndơ mpêt khlay uĕh êng, lah “tơm maih” lah dơi mât dŏng di trong tâm jâng wăng sa mhe. Nău nkoch bah wa Khà Hạnh lah ndơ an saơ ngăn an nău du hê bu ur rnoi mpôl đê̆ mbra buăt nthoi nău way ơm n’hanh têh mhe aƀaơ gay nsĭt tay ăp nău khlay an nsum mpôl. Ntơm bah nău he ƀư tơm êng mbrô pơk "Tây Bắc TV" n’hanh tăch geh nău dơi tam âk ndơ tuch tăm, tơm dak si, păng hôm lor nchrăp an ƀư tay âk trong pơk êng ƀa ƀă, ntĭm  nti oh yuh ta nkual jru, nkual ngai n’hanh ăp tơm nuĭh geh ndơ OCOP trong n’glăp ndơ tăch ta online.

Năl kloh ăp ntul rlong n’hanh trong dơh geh dja, Chính phủ hŏ geh dâk kan lĕ n’hâm suan. Trong nchrăp 8 tâm bôk nău kan gưl neh dak lah du ndơ an saơ kloh. Kruanh Hội Liên hiệp bu ur Việt Nam Nguyễn Thị Tuyến lah rjăp: "Nău ŭch bah trong nchrăp 8 lah n’hao nău gĭt êng, rgâl nău mưch rmot, mât chăm nău rêh drăp ndơ, nuih n’hâm, mât njrăng bu ur n’hanh kon se, tĭng ƀư geh nău tât dơi tâm ban bu ur bu klô n’hanh ntik n’hao nău khlay kan bah bu ur tâm hun hao wăng sa- rêh jêng kon nuĭh”.