VOV4.M’nông: Kơp tât n’gul khay 9 mhe rlău n’gor Kon Tum lĕ tăm mhe geh rlău 3.600ha bri. Aơ lah njoat bôk năp khlay gay n’gor Kon Tum ƀư dơi Nghị quyết Đại hội Đảng bộ n’gor rơh tal 16 tât năm 2025 tăm mhe geh 15.000ha bri. N’hêl na nê̆ an saơ nău ƀư săk rnglăy nău kơl trok nkhôm ntŭk ntô bri dôl rgop soan an trong kan mât njrăng n’hanh hun hao bri bah nuĭh ƀon lan Kon Tum.

          Xă dŭt jêr jŏt Đăk Pxi, nkuăl Đăk Hà geh 5 nsum mpôl dơn mât njrăng bri bah Ƀan mât uănh bri nchăng n’gang phŭt sial Đăk Hà. Năm mhe rlău ăp nsum mpôl aơ dơn geh dĭng lĕ nklăp 3,9 rmen prăk nu nău ntŭk ntô bri. Đah du xă ma nău rêh bah nuĭh ƀon lan hôm e jêr jŏt kơt Đăk Pxi, ri aơ lah du đêt prăk âk. Ndrel đah nău geh rgâl wăng sa ma prăk trok nkhôm ntŭk ntô bri nsĭt tay an nuĭh ƀon lan, nău geh bah bri lĕ an nuĭh ƀon lan ntop tay soan gay mât uănh njrăng bri. Wa A Sáo, ƀon Kon Pao Kla, an gĭt:

          “Kônh wa ƀa ƀơ hăn uănh nđôi mât njrăng bri, yan mih du khay 2 tât 3 tơ̆. Yan wai kônh wa hăn du khay 4 tŏ hăn uănh nđôi gay njrăng n’gang ŭnh sa bri n’hanh nking n’gang âk nuĭh phah bri mô tâm di drăp ndơ ta bri, kơt si n’hanh mpô mpa. Rnoh prăk bah kônh wa dơi geh tĭng nar hăn. Du nar lah 200 rbăn prăk. Xăng ndeh rmôt mât uănh njrăng n’gang bri trok prăk xăng an kônh wa hăn. Đah rnoh prăk kônh wa dơi geh ta rnăk wâl”.

          Gĭt saơ nău geh ma bri nsĭt tay an nău rêh, năm 2017 bah nău rgŏ jă bah n’gâng kan ƀon lan xă Đăk Ui, nkuăl Đăk Hà, nuĭh ƀon lan 2 ƀon tâm xă lah Kon Bông n’hanh Kon Năng Triang nsrôih tăm tay bri ta rnoh neh yôk hil. Tât aƀaơ đah nău mât chăm, njrăng n’gang bah nuĭh ƀon lan, 30 ha n’ho 3 n’ha tăm tă aơ 4 năm lĕ bơi tŏng di năm gay dơi sŏk prăk ntŭk ntô bri. Rlău ma nĕ nău geh bah sŏk ntăk n’ho n’hanh tăch si têh bah rnoh neh bri tăm aơ mbra geh nsĭt săk rnglăy uĕh an nuĭh ƀon lan tâm rgŏ năp. Wa A Bế, ƀon Kon Mriang, xă Đăk Ui, nkuăl Đăk Hà an gĭt, săk rnglăy bah nău mât njrăng bri n’hanh tăm bri lĕ kơl lôch nău nuĭh ƀon lan tâm xă phah bri ƀư mir:

          “Bah năp đaơ kônh wa hôm e muih yơn bah rnôk geh nău ntrŭnh aơ lah kônh wa mô geh muih tay. Khân pơng djăt tĭng nău ntrŭnh hun hao bri bu ƀư tĭng. Kônh wa dơi wât nău ntrŭnh geh bah ndơ nĕ dơi oi. Kăl e geh nar geh nar mô geh. Êng Đăk Ui mô geh muih bri tay”.

          Ƀư tĭng nău rƀŏng tăm mhe 15.000ha bri ma Nghị quyết Đại hội Đảng bộ n’gor Kon Tum rơh tal 16, năm kan 2020-2025 n’gluh an, tât lĕ n’gul khay 9 mhe rlău, lam n’gor Kon Tum lĕ tăm mhe geh rlău 3.600ha bri, rlet rlău 600ha nkôp đah trong nchrăp n’gluh an tâm năm aơ. Gay dơi tăm bri, n’gâng kan ƀon lan ăp nkuăl, nkual ƀon têh bah n’gor lĕ rgŏ jă nuĭh ƀon lan tăm tay bri đah rnoi neh yôk hil, rnoh neh tăm bum, ba mô sakư jêng; ƀư ntop kơl ntil, nuĭh kan, ntĭm kỹ thuật an nuĭh ƀon lan; rgŏ jă rmôt tahen, cán bộ phung pah kan viên chức.... ndrel hăn tăm bri. Wa Nguyễn Văn Tiến, Groi Chi cục trưởng Chi cục kiểm lâm n’gor Kon Tum, an gĭt âk trong mkra lĕ dơi ƀư gay nuĭh ƀon lan ntop tay nâp nâl mpeh săk rnglăy wăng sa rnôk râng tăm bri:

          “Nuĭh ƀon lan hăn tăm bri bah kơi dơi geh ăp nău kơl, kơt nu nău ntŭk ntô bri. Bri nuĭh ƀon lan tăm jêh aơ geh sa 100%. Chi cục kiểm lâm lĕ râng tâm ôp tâm nchră an ăp gưl n’gâng kan ƀon lan gay ntrôl ngăch jêng ăp ntŭk ê nkra si gay tăch si bri tăm an n’hao rnoh khlay gay nuĭh ƀon lan rnôk tăm bri dơi geh sa”.

          Nuĭh rblang: Y Sưng Phê Ja