Lôch nti Đại học chuyên ngành Luật kinh tế năm 2021, đah âk nău ƀư ntoh lư, khay 7 ndrel năm nô A Nguyên, nuĭh Ba Na, ƀon Kon Gung dơi nsing nơm săch ƀư Groi Bí thư Đoàn xă Đăk Mar, nkuăl Đăk Hà. Săk nơm lah nuĭh chroh Bap, mât uĕh nuih n’hâm n’hanh soan mom, khay 10/2022 ta thôn Đăk Mút, nô A Nguyên ndâk njêng câu lạc bộ Druh ndăm chroh bap hun hao wăng sa rgum geh 15 nuĭh râng. Bah ntrong ƀư mât rong, nkra mir ba, mât chăm tơm cà phê, tăm tơm sa play tĭng trong hữu cơ, Câu lạc lĕ nsĭt tay nău geh an ăp nuĭh kơt dơi uĕh dŭt n’hâm đah nsum mpôl. Wa Lê Xuân Hưng, Bí thư Đảng ủy xă Đăk Mar, an gĭt, Đảng ủy xă uănh lah săk rnglăy uĕh nău ƀư bah Câu lạc aơ.

Jêh uănh nđôi gâp saơ Câu lạc bộ pah kan dŭt n’hâm săk rnglăy. Abaơ ăp nuĭh bah Câu lạc bộ ntĭm nsum mpeh mât chăm tơm tăm, mpa rong kơt nău wât mpeh hun hao wăng sa. Nău ƀư aơ lĕ dơi Đảng ủy ntĭm rđău pơk hvi 2 thôn tâm xă. Nkuăl đoàn Đăk Hà lĕ pơk hvi ntrong kan Druh ndăm chroh rƀŭn hun hao wăng sa lam nkuăl”.

Dơi Đảng ủy xă Đăk Mar, nkuăl Đăk Hà saơ, ntim nti săk nơm nô A Nguyên mô rlu tiăr nti. Khay 7/2023, A Nguyên dơi ăp rnăk thôn Đăk Mút nsing nơm săch ƀư kruanh thôn. Tâm năm aơ đŏng A Nguyên lap na nê̆ dơi lăp tâm rmôt bah Đảng. Nô A Nguyên nkoch:

Săk gâp nơm ƀa ƀơ chop khâl ăp rnăk jêr jŏt đah wăng sa, jêr jŏt đah nuih n’hâm nkoch trêng tât kônh wa an rgâl nău mĭn, trong ƀư bah săk nơm. An rgâl mir mô jêng mô an neh nsoih dơm. Tât rnôk aƀaơ Đăk Mút mô hôm geh rnăk an nsoih. Aƀaơ ăp rnăk tăm cà phê, jêh nĕ tât sầu riêng, play đŭr.

Ăp gưl ủy đảng, n’gâng kan ƀon lan bah n’gor tât bah dâng ta Kon Tum uănh tât ndâk njêng rmôt cán bộ nuĭh rnoi mpôl đêt ngăn lah ta gưl bah dâng. Aƀaơ, tâm rlău 2.000 cán bộ công chức ta 102 xă, phường, nkuăl têh bah n’gor geh bơi 1.400 cán bộ công chức lah nuĭh rnoi mpôl đêt geh bơi 68%.

Ntoh lư kơt xă Măng Bút, nkuăl Kon Plông, tâm dĭng lĕ 22 cán bộ công chức xă geh tât 17 cán bộ công chức nuĭh Xơ Đăng. Nô A Dân, Groi Kruanh UBND xă Măng Bút, têh jêng bah Nău nchrăp rlong ƀư săch 600 nuĭh mom gĭt blău geh nti đại học sĭt ƀư groi kruanh UBND xă ta 63 nkuăl ach o ta lam dak, mĭn lah, tâm rnôk tiăr nti, nsrôih nô gĭt saơ nău uănh tât, ntop kơl bah gưl ủy đảng n’hanh n’gâng kan ƀon lan ta ntŭk. Nău aơ kơl nô ntop tay soan gay nsrôih tiărr nti n’hanh nsơr soan âk lơn an ƀon tơm.

Gâp râng Nău nchrăp ƀư 600 Groi Kruanh xă, dơi Đảng, Ngih dak uănh ndâk njêng lah rmôt cán bộ mom, cán bộ rnoi mpôl đêt nthoi tay, gâp nsing nơm nsrôih n’hanh dơi săch ƀư Groi kruanh xă năm kan tal 2. Gâp lĕ jêh nti trung cấp lý luận chính trị, jrô chuyên viên. Aƀaơ dơi gưl ủy đảng n’hanh n’gâng kan xă uănh tât gâp dôl nchrăp hăn nti jrô Cao cấp lý luận chính trị.

Jêh 33 năm ndâk njêng tay n’gor, Kon Tum lĕ ndâk njêng geh rmôt cán bộ, công chức, viên chức rlău 18.000 nuĭh, tâm nĕ cán bộ rnoi mpôl đêt rlău 4.100 nuĭh geh rlău 22%. Đah gưl n’gor Kon Tum geh 82 cán bộ rnoi mpôl đêt mât ƀư bah groi kruanh jrô kan n’hanh tâm ban let lơ; gưl nkuăl geh 225 cán bộ rnoi mpôl đêt mât ƀư bah groi kruanh jrô kan n’hanh tâm ban let lơ; gưl xă geh 397 cán bộ rnoi mpôl đêt mât ƀư bí thư, groi bí thư; kruanh, groi kruanh HĐND, UBND n’hanh gưl kruanh, gưl groi tổ chức chính trị rêh jêng. Wa Lê Viết Nam, Groi Giám đốc N’gâng kan Nội vụ n’gor Kon Tum an gĭt, trong kan ntĭm nti, dăp rgum, săch cán bộ rnoi mpôl đêt rnoi mpôl đêt dơi N’gor ủy n’hanh UBND n’gor uănh khlay:

N’gor lĕ an naư rgop tâm nchră mpeh ndâk njêng rmôt cán bộ nuĭh rnoi mpôl đêt. Jêh nĕ ăp gưl ủy đảng an sam ƀŭt ntĭm rđău gay tâm trong dăp rgum, săch geh tât rmôt cán bộ công chức lah nuĭh rnoi mpôl đêt. Aƀaơ nchrăp tât đại hội năm ka ndŭt âk cán bộ nuĭh rnoi mpôl đêt ta ăp ngih pah kan, ntŭk kan lĕ dơi dăp rgum n’hanh dăp rgum ăp gưl nău kan ntĭm rđău n’gâng tơm bah ăp gưl, lơn lah ăp n’gâng kan, nău kan, ăp nkuăl, nkual ƀon têh geh rnoh cán bộ nuĭh rnoi mpôl đêt dơi dăp rgum tâm ăp gưl nău kan aơ./.