Nar rgum “Ntô̆ n’hao kon hŏk, sinh viên Dak Lak” ƀư đah âk bôk nău kơt rgum nchră “Druh ndăm ngăch dăng”, nău ƀư “Tâm nđŭr văn hóa Việt-Ấn”, Rơh tâm rlong tâm nchră tih di “Ntô̆ n’hao Việt Nam”, Tâm nchră “N’hao uĕh ntrong leo sinh viên 5 uĕh”, Tâm nđŭr “Giai điệu tuổi trẻ”, ăp nău ƀư hăn ndrel đah “Sinh viên 5 uĕh”, “Kon hŏk 3 uĕh”, “Kon hŏk 3 tiăr nti” n’hanh bôk nău ƀư nkah gĭt 75 năm Nar way ơm kon hŏk, sinh viên n’hanh Rmôt sinh viên Việt Nam.

Nău uĕh bah nar rgum lah ăp nău ƀư sinh viên rgum nchră lam ntŭr neh, tâm nđŭr văn hóa Việt Nam-Ấn Độ. Ăp sinh viên dơi tâm nchră, nkoch mpeh văn hóa, lễ hội n’hanh ăp ntŭk pâl nđaih uĕh ta Dak Lak n’hanh Ấn Độ, tâm nđŭr đah sinh viên Ấn Độ dôl nti ta ngih sam ƀŭt Đại học Y Dược Buôn Ma Thuột. Sinh viên Lê Quốc Tuấn, Chuyên ngành Kinh doanh Thương mại, Ngih sam ƀŭt Đại học Tây Nguyên nkoch:

Aơ lah rơh bôk năp oh dơi râng bôk nău tâm nđŭr đah băl bên lam ntŭr neh kơt aơ. Săk oh dŭt đit prêng yơn rnôk râng oh saơ ăp băl nuĭh Ấn Độ dŭt rah rơih. Dơi geh râng ăp bôk nău rgum lăp lam ntŭr neh kơt aơ ri oh saơ dŭt ryơk yor nơm dơi nti nău ngơi, nsing nơm ta năp âk nuĭh lơn, tâm rnglăp đah âk băl, geh âk nău tâm boh mhe.

Rơh aơ, N’gor đoàn Dak Lak lĕ mbơh ndâk njêng Câu lạc bộ sinh viên 5 uĕh gưl n’gor, rnê rhơn “Kon hŏk 3 uĕh”, “Sinh viên 5 uĕh” ăp gưl năm nti 2023-2024, an prăk kơl hăn nti “Mpoh ang nău ŭch-Druh ndăm Dak Lak”, an prăk kơl hăn nti ăp sinh viên Lào dôl nti ta ăp ngih sam ƀŭt ta Dak Lak. Yuh Phan Thị Trinh, Groi Bí thư N’gor đoàn Dak Lak an gĭt, ăp nău ƀư gay nta an ntŭk pâl uĕh an kon hŏk, sinh viên, rdâk hao nuih n’hâm tâm rnglăp, gĭt wât lĕ đah nău kan bah rơh druh ndăm.

Du ntŭk pâl an ăp oh râng, tâm nđŭr nti nsơm, tiăr nti rgum lăp lam ntŭr neh đah ăp băl sinh viên Ấn Độ n’hanh Lào. Ban thường vụ N’gor đoàn geh âk nău uĕh gay hăn ndrel đah ăp oh kon hŏk 3 uĕh, sinh viên 5 uĕh, kon hŏk 3 tiăr nti, hăn ndrel ăp rnoh an ƀư gay ăp oh dơi săk soan n’hanh nău ƀư râng ndrel đah rmôt đoàn, rmôt kan tâm năm tât.

Ta năp nĕ, n’gor đoàn Dak Lak, Hội Liên hiệp druh ndăm Việt Nam n’gor n’hanh Rmôt sinh viên Việt Nam n’gor lĕ tâm rgop ƀư Bôk nău “Mâp măt n’hanh rnê rhơn sinh viên rnoi mpôl đêt ntoh lư” n’gor Dak Lak rơh tal 16.

Tâm ăp năm bah năp, ăp nău kơl hun hao wăng sa, văn hóa ta ăp ntŭk nkual jru ngai, nkual rnoi mpôl đêt bah n’gor Dak Lak geh âk săk rnglăy uĕh. Ndrel đah druh ndăm lam dak, druh ndăm ăp rnoi mpôl đêt Dak Lak mĭn lah tay ƀư tơm, mô rlu nti nsơm, tiăr nti, nsrôih hao tâm nău rêh. Nar lơ âk druh ndăm rnoi mpôl đêt geh nău blău n’hanh nău nti, djăt tĭng khoa học, tiăr nti blău tâm nău rêh, blău nău kan rêh jêng gay rhŏ an Neh dak, ndâk njêng ƀon tơm.

Ta bôk nău ƀư, sinh viên lĕ râng âk nău ƀư kơt: Mpoh su nhang ta Rup ndah nkah gĭt ăp tahen Nam Tiến n’hanh an nkao ta Rup ndah Wa Hồ; trong hăn “Mĭn joi văn hóa”, rgum nchră “Tâm nchră mpeh nău uĕh ơm sinh viên Dak Lak tâm rnôk rgum lăp n’hanh hun hao”, tâm nchră “Boăt nthoi sinh viên đah doanh nhân, doanh nghiệp”. Tă bah nĕ kơl sinh viên wât jru lơn mpeh nău khlay văn hóa n’hanh nău uĕh ơm bah ntŭk; janh tâm nchră, rgop an ăp nău ƀư văn hóa, rêh jêng, rgop an hun hao bah n’gor. Sinh viên H Uyên Byă, ngih sam ƀŭt Đại học Sư phạm Nkual ƀon têh Hồ Chí Minh nkoch:

 Ăp nău ƀư nar aơ kơl oh gĭt mpeh ăp nuĭh âk lơn, kơl oh wât tay mpeh nău khlay văn hóa ta ntŭk nơm deh. Nău nĕ lơ ƀư oh ŭch plơ̆ sĭt đah ƀon tơm n’hanh hun hao săk nơm lơn gay kơl ƀon tơm hun hao n’hanh nar aơ oh dŭt răm yor he lah ngoăy tâm âk sinh viên rnoi mpôl đêt dơi rnê rhơn.

Rơh aơ, Rmôt sinh viên Việt Nam n’gor Dak Lak lĕ rnê rhơn 50 sinh viên rnoi mpôl đêt ntoh lư ngăn tâm năm nti 2023-2024. Ƀư mbơh Câu lạc bộ Nău uĕh ơm sinh viên Dak Lak. Câu lạc bộ dơi ndâk njêng gay geh ntŭk pâl uĕh, kơl ăp băl mom dơi mĭn joi, joi nău mhe n’hanh mât ndrăy ăp nău khlay văn hóa way ơm bah rnoi mpôl nơm.