Kêng măng ntri (8/1) ta Nkual ƀon têh Hồ Chí Minh, Tổng Bí thư Tô Lâm tât khâl n’hanh ƀư tơm rơh pah kan đah Quân khu 7 mpeh nău kan tahen, njrăng n’gang neh dak năm 2024, trong rƀŏng nău dơn kan năm 2025. Ta rơh pah kan, Tổng Bí thư Tô Lâm mpư rnê mpôl tahen quân khu hŏ lôch jêh uĕh nău dơn kan tâm năm rlău aơ.

Mpeh nău dơn kan let năp tay, Tổng Bí thư dăn đă, quân khu ân đăm gĭt jru mbro trong nchrăp bah Đảng, trong kan, pháp luật Ngih dak, nghị quyết, nău ntrŭnh bah Quân Uỷ Trung ương, Bộ Quốc phòng n’hanh nô nău dơn kan bah mpôl tahen Quân khu, nsrôih ƀư geh nău dơi ăp rnoh tât kan, nău dơn kan Nghị quyết Đại hội 13 bah Đảng, Nghị quyết Đại hội Đảng bộ Quân khu tâl X.  Lor nchrăp, nsrôih nsŏng kơl Quân uỷ Trung ương, Bộ Quốc phòng n’hanh kan nsum đah gưl ủy, n’gâng kan ta ntŭk rdâk njêng jâng nsing njrăng n’gang neh dak lam ƀon lan, nsan ndăl njrăng n’gang neh dak lam ƀon lan nkre đah nsan ndăl rnă njrăng lam ƀon lan n’hanh rdâk njêng nkual njrăng n’gang lor nâp. Lơn lah ân rƀah gĭt nô nău, nkra ngăch ăp nău tât ndal, mô an geh ndrât ndal, mât đăp mpăn chính trị, nta trong dơh gay ăp n’gor hun hao wăng sa- rêh jêng kon nuĭh.