Ôi 7/1, ta Ntŭk kruanh dak, Groi Kruanh Võ Thị Ánh Xuân wơt wa Sin-vi-a Đa-nai-lôv, Kruanh ntoh măt Prăk nkrem kon se Liên hợp quốc (Unicef) ta Việt Nam tât wơt rhơn. Groi Kruanh dak Võ Thị Ánh Xuân nkoch kloh, Việt Nam uănh UNICEF kơt du dak kan ndrel hun hao dŭt khlay, geh âk nău rgop ngăn ngên an trong kan mât uănh, ntĭm nti n’hanh mât njrăng kon se Việt Nam tâm âk rach năm bah năp.

Groi Kruanh dak an git, nău mât uănh, mât njrăng n’hanh ntĭm nti kon se lah an lor bôk năp tâm nău kơl hun hao bah Việt Nam. Mpŏng ŭch tâm năm tât UNCEF n’hao rgŏ jă tơm prăk ntop kơl trong kan mât njrăng n’hanh mât uănh an kon se Việt Nam, ƀư tĭng ăp nău rƀŏng hun hao nâp nâl geh tât kon se, ngăn lah nău ntĭm nti, mât uănh an săk soan kon se, uĕh kah an kon se, ntop kơl vaccine an Bôk nău kan chuh pơk hvi, tŏng ăp tâm ban bu ur bu klô.