7/1, ta ngih Chính phủ, Thủ tướng Chính phủ Phạm Minh Chính ƀư tơm rơh rƀŭn chính phủ bôk nău kan ndâk njêng pháp luật khay 1/2025. Ta rơh rƀŭn ăp nuĭh Chính phủ tâm nchră mĭn uănh tay, an rgop nău, mbơh an đah 4 nău nchrăp ƀư Luật: Luật Tổ chức Chính phủ (nkra rgâl); Luật Tổng chức n’gâng kan ƀon lan (nkra rgâl); Luật Ban hành văn bản quy phạm pháp luật (nkra rgâl); Luật râng rmôt mât đăp mpăn Liên hợp quốc.

Ntoh ngơi ta rơh rƀŭn, Thủ tướng Phạm Minh Chính mĭn lah, aơ lah ăp nău nchrăp ƀư luật, nghị quyết khlay, gay ngăch rgop an ăp nău ntrŭnh têh bah Đảng mpeh rgâl mhe ndâk ƀư, nău kan bah Chính phủ, n’gâng kan ƀon lan tĭng trong “ngăch-dơh-dăng-tam nău kan-tam-săk rnglăy”. Mông nar đêt, nău đă âk, lam hvi, nkô̆ nău jêr, Thủ tướng đă ăp nuĭh chính phủ rgum bôk rngok, nkoch nău mbơh, ntoh ngơi nău rgop đêt, ngăch, kloh rah wah, hăn sŏng tâm nău khlay; rgum tâm rgâl mpeh ăp nău khlay, hôm e rgop êng êng an tâm nchră, dăn nău rgop Chính phủ; đăp mpăn ngăch, uĕh di bah rơh rƀŭn.