Ôi aơ 9/1, Thủ tướng Chính phủ Phạm Minh Chính ndrel mpôl pah kan gưl têh Chính phủ Việt Nam hăn khâl Lào n’hanh ndrel ƀư tơm rơh hop tâl 47 Ủy ban bar Chính phủ Việt Nam - Lào ntơm bah nar 9-10/1/2025, tĭng nău jă bah Thủ tướng dak Cộng hòa Dân chủ Nhân dân Lào Sonexay Siphandone. Tâm bah ri aơ nơh, tâm boh chính trị, tâm boh tâm brê Việt Nam-Lào hun hao tay uĕh lăng, krêp dêh, nsing nơm; bar ding hŏ ƀư geh nău dơi Rơh hop tâl 46 Ủy ban bar Chính phủ Việt Nam - Lào (7/1/2024) n’hanh Rơh mâp way ăp năm bar Đảng năm 2024 (26/2/2024); nsrôih ƀư ăp rơh tâm khâl nsum bah kruanh rđău kan gưl têh n’hanh ăp gưl.

Việt Nam aƀaơ geh 241 trong nchrăp ntuh kơl ta Lào đah lĕ rngôch tơm prăk đăng ký rlău 5,5 rmen USD, dâk tâl 3 tâm rnoh ăp dak/nkual neh (bah kơi Trung Quốc, Thái Lan). Nsĭt geh tăch rgâl bar ding Việt Nam - Lào 10 khay bah năm 2024 tât 1,7 rmen USD (hao rlău 28% rđĭl đah ndrel khay dja năm 2023). Bar ding kan nsum lhăt, tâm kơl nsum ta ăp rơh rgum nchră tâm boh ta nkual n’hanh lam ntŭr neh; lơn lah ta trôm ASEAN, Liên Hợp Quốc n’hanh ăp trong tĭng nkual jê̆. Tâm năm 2024, Việt Nam hŏ nsrôih n’grŏ tĭng n’hanh ntop kơl Lào dơn mât geh nău dơi nău kan khlay dak bah dih kơt Kruanh ASEAN 2024, Kruanh AIPA 45.