Tâm 3 năm, ntơm bah aơ tât lĕ năm 2028, Chính phủ Hàn Quốc mbra kơl 9,2 rkeh USD gay ƀư n’hong dak sor n’hanh trong n’hoch dak djơh nkual ƀon lan gŭ ta thị xã Buôn Hồ, n’gor Dak Lak. Tâm rnôk hăn uănh năl ntŭk nchrăp ƀư dja, mpôl pah kan bah Nhih pah kan tâm boh dak bah dih Hàn Quốc (KOICA) hŏ geh rơh pah kan đah UBND thị xã Buôn Hồ, n’gor Dak Lak kêng măng ntri (8/1).

Wa Jung Jaewoo, Groi giám đốc neh dak, văn phòng KOICA Việt Nam an gĭt, aơ lah du trong nchrăp kan dơi Chính phủ Hàn Quốc uănh an dŏng, ƀư ntơm bah năm 2025-2029. Trong n’hoch dak djơh bơi nchrăp ƀư ta thị xã Buôn Hồ n’gor Dak Lak, lĕ ma du Ntŭk ndjăt dak djơh rgum geh rnoh dăng nklăp 1.500m3/nar măng n’hanh ăp ndơ dŏng ntop kơl, ăp trong dĭng nthoi, rgum geh lĕ rngôch rnoh jong bơi 70km. Nău ŭch tât năm 2032 mbra geh nklăp 2.900 rnăk dơi nthoi chruh, rgop hŭch bah ir khuch djơh tât n’hâm suan nuĭh ƀon  lan n’hanh hŭch bah ir n’hôl ôm tât ntŭk gŭ rêh tă bah tơm dak djơh n’hoch luh mô hŏ rgum ndjăt kloh luh bah dih.