VOV4.M’nông – N’gâng kan ntĭm nti an gĭt, lĕ rngôch 63 n’gor, nkual ƀon têh ƀư an kon hŏk ăp gưl hăn nti ta ngih sam ƀŭt. Rnoh kon hŏk hăn nti kơp tât nar 18/4 geh 99,57%. Jêh ntĭm đă pơk mpông ngih sam ƀŭt, kruanh N’gâng kan ntĭm nti hăn uănh nu nău ƀư ta ăp ntŭk. N’hêl na nê̆ an saơ, dơi hăn nti tay lah mpŏng ŭch dŭt têh bah kon hŏk, nai n’hanh me bơ̆. Ăp ntŭk lĕ ndâk ƀư trong hăn, ƀư tiăr nti, nchrăp ăp ndơ đah nău nsrôih ndơ̆ kon hŏk plơ̆ tay ngih sam ƀŭt, nti nsơm đăp mpăn. Ăp ntŭk ntĭm nti nchrăp kơp tay, uănh lah, pă gưl jêh nti trực tuyến, tă bah ti vi bah ăp rmôt nuĭh kon hŏk gay nkra rgâl trong nchrăp ntĭm nti bah ngih sam ƀŭt tâm di nău geh ngăn n’hanh nu nău uănh nđôi Covid-19 ta ntŭk. N’gâng kan ntĭm nti an gĭt, tĭng trong nchrăp ntĭm nti bah ăp ngih sam ƀŭt, nău uănh nđôi, uănh lah ăp rơh tĭng trong ƀư nti ta ngih sam ƀŭt mbra dơi ƀư jêh âk khay kon hŏk lĕ dơi nti tay, nâp nâl, ntop tay nkô̆ nău nti.

Nŭih blang: Y Sưng Phê Ja