Jêh bơi 1 khay râng jrô nti re dak an dơm dơi ƀư ta xă, âk kon hŏk ta 2 xă Cư M’gar n’hanh Quảng Hiệp, nkuăl Cư M’gar, n’gor Dak Lak lĕ gĭt re dak n’hanh trong mkra nu nău rnôk mâp nuĭh geh rmok dak. Oh H Nhiêm Niê, ta ƀon Kna B, xă Cư M’gar, nkuăl Cư M’gar nkoch:

“Kon n’hanh ăp băl mô gĭt re dak n’hanh mpôl kon dŭt ŭch nti gay njrăng n’gang rmok dak rnôk hăn dak me, dak diăng. Jrô nti aơ kơl mpôl oh dơi blău re n’hanh njrăng n’gang rmok dak.

Oh Phan Hoàng Quý Phước, ta xă Quảng Hiệp, nkuăl Cư M’gar nkoch:

“Jay kon gŭ dŭt ngai gay hăn ntŭk êng gay nti re mô janh. Âk kônh yơn lĕ djôt hô re sĭt ta aơ, knơm nĕ kon lĕ gĭt re dak n’hanh mô hôm klach rmok dak kơt nar bah năp tay”.

Ăp jrô ntĭm re dak an dơm ta 2 xă Cư M’gar n’hanh Quảng Hiệp đah săk moh “Bể re hăn ăp ntŭk sĭt ƀon” lah nău ƀư yor câu lạc bộ Yor nău ŭch oh he nkuăl Cư M’gar tâm rgop đah ăp ntŭk kan n’hanh nuĭh lŏng bôk tôr ƀư tâm yan rlu nti năm aơ. Nău ƀư aơ lĕ dơi geh nău ntop kơl, hăn ndrel bah âk nai cô n’hanh nuĭh ƀon lan ta ntŭk. Nô Hà Mạnh Tuấn, nai ngih sam ƀŭt THCS Ngô Mây, xă Ea Mdroh nkoch:

“Tâm rgop đah nai way ntĭm nău re an ăp mon tâm rơh rlu nti an ăp mon ta ntŭk he dơi nti an dơm”.

Wa Hồ Thị Nhâm ta xă Cư M’gar, nkuăl M’gar, Dak Lak nkoch nău răm rnôk râng ntop kơl ăp mon dơi nti re:

“Gâp ntop kơl jâng gung, ntop kơl prăk điện an ăp mon gay kơl ăp mon geh ntŭk nti, gĭt saơ nău kơl uĕh ri gâp kơl”.

Nô Mai Văn Chuyền, nai ngih sam ƀŭt THCS Ngô Mây, Chủ nhiệm câu lạc bộ Yor nău ŭch oh he nkuăl Cư M’gar an gĭt, nău rvê đah nu nău âk kon se ta nkual jru ngai geh rmok dak, tâm 3 năm bah năp, câu lạc bộ lĕ nsrôih kuăl jă nsum mpôl, ăp nuĭh lŏng bôk tôr hăn ndrel ntop kơl prăk ƀư bể re hăn ta ăp ntŭk n’hanh pơk ăp jrô ntĭm re an dơm tât ăp xă. Tât aƀaơ, câu lạc bộ lĕ năp geh 3 bể re ta 2 nkuăl Cư M’gar n’hanh Krông Bông. Tâm rơh rlu nti, bể re hăn ăp ntŭk dơi tâm pleh ndơ̆ tât ăp xă gay ƀư an ăp oh nti re. Tâm 3 năm bah năp, lĕ geh bơi 600 oh dơi nti re dak an dơm tâm rơh rlu nti.

Ndrel đah nĕ, rnôk lăp năm nti, câu lạc bộ tâm rgop đah ăp ngih sam ƀŭt ƀư ăp nar tiăr nti, ntĭm kon hŏk nău blău njrăng n’gang rmok dak. Tĭng nô Mai Văn Chuyền đŏng, aƀaơ câu lạc bộ dôl pơk hvi tay nuĭh n’hanh ntŭk tiăr nti, tâm rgop ƀư tiăr nti an nai, tổng phụ trách đội ta ăp ngih sam ƀŭt gay khân pơng geh tay nău blău, nchrăp lor lơn tâm nău nkoch trêng, ntĭm kon hŏk. Nkre, câu lạc bộ rgŏ jă tay nuĭh gay an ăp ntrong kan, dŏng ndơ ƀư ngăn rhŏ an nău tiăr nti ta ăp ngih sam ƀŭt:

“Mpŏng ŭch đŏng kơl ăp oh gĭt tay ăp nău blău n’hanh nău wât an njrăng n’gang rmok dak săk rnglăy. Gâp mpŏng ŭch tâm năm tât n’gâng kan ƀon lan, ăp nsum mpôl, ăp me bơ̆ mbra uănh tât âk lơn tât nău njrăng dêr rmoh rmanh sôt săk, rmanh rmok dak an kon se, n’hanh mpŏng mbra geh âk lơn tay nău ndrel ty bah ăp doanh nghiệp, rmôt kan, ăp nuĭh lŏng bôk tôr, lơn lah ăp mpôl kan nău kan nsum mpôl ta ntŭk an dơi ƀư ăp jrô nti re an ăp oh ta ăp ntŭk nkual jru ngai”.

N’gor Dak Lak ŭch geh nău rƀŏng tât năm 2025 lĕ rngôch kon se ta rnoh năm tiểu học, trung học cơ sở dơi năp wât bôk năp mpeh rmanh, sôt săk; 50% gĭt ăp nău blău đăp mpăn tâm ntŭk ntô dak. Gay dơi geh nău rƀŏng aơ, nău ndrel ty, rgop soan bah ăp êng nuĭh, rmôt kan n’hanh ăp nuĭh rlong bôk tôr tâm nău pơk ăp jrô nti re dak lah dŭt n’hâm khlay. Lơn lah đah ăp ntŭk nkual jru ngai, nkual jêr jŏt, ăp jrô nti re dak an dơm mbra kơl an âk oh jêt dơi gĭt, năp nău wât, nău blău đăp mpăn njrăng dêr rmok dak.