Nkhêp geh Tết nguyên đán Ất tỵ 2025 bơi tât n’hanh rƀŏng tât nkah ndray 95 năm nar njêng Đảng Cộng sản Việt Nam, ôi 16/1 ta Nam Định, Tổng Bí thư Tô Lâm hŏ leo mpôl pah kan Trung ương tât mpoh nhang, n’hơr an kao si nkah gĭt Tổng Bí thư Trường Chinh ta Ndah rup n’hanh Jay nkah ndray Tổng Bí thư Trường Chinh. Tổng Bí thư Trường Chinh moh săk ngăn lah Đặng Xuân Khu, deh nar 9/2/1907, tâm du rnăk gĭt blău rŏng dak, geh âk nău way ơm văn hoá, khoa bảng ta ƀon Hành Thiện, xã Xuân Hồng (Xuân Trường).

 Rlău 60 năm kan cách mạng mbro (ntơm bah năm 1925 tât năm 1988), păng hŏ dơi nsing nơm jao mât âk nău kan khlay bah Đảng n’hanh Ngih dak…Ta ăp ntŭk gŭ pah kan, wa Trường Chinh way mpơl lah nuĭh cán bộ kruanh rđău kan dâk leo lor, rah rơch, dêh rŏng ndrăng băl, ƀon lan, du bông nău rêh, rlăch ndăng an nău đăp mpăn, dah rŏng bah neh dak, yor ma rhơn răm bah ƀon lan. Lah nuĭh kơt nti dŭt hăr blău bah Kruanh Hồ Chí Minh, nuĭh kruanh cách mạng đăng hăr, nuĭh kan chính trị, nău mĭn, Tổng Bí thư Trường Chinh hŏ ntlơi tay an Đảng n’hanh Ngih dak âk drăp ndơ ơm yău lý luận chính trị khlay, tâm nê geh bản "Đề cương mpeh Văn hóa Việt Nam" tât aƀaơ ăp nău mĭn mpeh văn hóa bah wa nha hôm geh rnoh khlay kơt ơm, lah ăp nău tă ơm gĭt kơt nti dŭt n’hâm khlay an Đảng he tâm n’gâng kan rdâk njêng n’hanh Mât njrăng neh dak Việt Nam xã hội chủ nghĩa.