Tâm rnôk hăn khâl ngăn Ba Lan, Thủ tướng Chính phủ Phạm Minh Chính n’hanh Mpôl đại biểu Việt Nam hŏ mâp cán bộ, nuĭh kan Đại sứ quán n’hanh mpôl nuĭh Việt Nam ta Ba Lan. Mpôl nuĭh Việt Nam ta Ba Lan aƀaơ geh nklăp 30.000 nuĭh, rgop âk tâm nău mât mbro, hun hao tâm boh way ơm, tâm rnglăp, tâm boh tâm brê âk ntil đah bar dak. Nkhêp geh năm mhe, ntơh măt kruanh rđău kan Đảng, Ngih dak, Thủ tướng njuăl nău mbah rhơn dŭt uĕh lăng tât nuĭh Việt Nam ta Ba Lan.

Thủ tướng an gĭt tâm trong hăn khâl dja, mbra râng bôk nău kan năm mhe ƀon tơm mbah rhơn Tết kônh wa ƀon lan ta Ba Lan. Thủ tướng hŏ rong an âk mông nar gay ơh ăp nău dăn đă bah kônh wa; rđău đă Bộ Ngoại giao, ăp nhih pah kan geh tât ra tay ăp quy định geh tât quốc tịch; ntrŭt ntrôl nău ntĭm nti Việt tâm nhih nti Ba Lan. Thủ tướng an gĭt tâm trong hăn khâl, hŏ tâm ôp đah Tổng thống n’hanh Thủ tướng Ba Lan mpeh nău ntrŭt ntrôl kơp dơn mpôl nuĭh Việt Nam lah rnoi mpôl đê̆, dăn đă kônh wa gŭ dak bah dih n’hanh Đại sứ quán nsrôih râng ntrŭt ntrôl tâm nău kan dja.