Nthoi tay rơh rƀŭn nchră tal 6, HĐND n’gor Dak Nông khóa 4 nar naơ 6/7 tâm nchră nău hun hao wăng sa, rêh jêng. Kruanh UBND n’gor Dak Nông Hồ Văn Mười ơh du đê̆ nău ma cử tri n’hanh đại biểu HĐND n’gor mât uănh, ngăn lah uănh khlăy ta nău kan nchrăp ƀư boxit, neh ntu. Ơh nău cử tri n’hanh đại biểu HĐND n’gor Dak Nông, wa Hồ Văn Mười mbơh 7 nău khlăy tơm, dŭt nkah lah tâm nău hun hao wăng sa rêh jêng bâh n’gor tâm 6 khay ba năp n’hanh tâm let năp tay. Tâm nĕ, nău bô xit lĕ geh âk đại biểu HĐND n’gor nkoch ta rơh rƀŭn nchră. Kruanh UBND n’gor Dak Nông an gĭt, tĭng nău uănh năl mhe ngăn, rnoh bô xit bâh Dak Nông geh tât 60% ta lam dak, lah nău dơi ta n’gor. Yơn nău aƀaơ lah dŭt jêr, âk nău kŏ văk. An tât rnôk aơ ê hŏ geh nău rgâl jêng 1062 nău nchrăp kan bâh n’gor geh tâm wĭ wĕ đah nău nchrăp ƀư bô xit, ta rnoh neh bơi tât 6.700ha. Nău aơ jêng tât lĕ rngôch ăp nău đă nău ntrŭnh ntuh kơl ta n;gor Dak Nông rlu le, khuch âk tât nău dơi mbra geh tât âk ntŭk kan tât ntuh kơ.

 Ntŭk tăch rgâl neh ntu kơt lah mô dơi tăch rgâl yơn lah nău dôl ƀư duh ta rơh rƀŭn nchră tal 5, HĐND n’gor Kon Tum khóa 12. Âk đại biểu mpơl nău mĭn rvê nău aơ mbra khuch âk tât nău geh bâh tơm prăk ta ntŭk tâm năm aơ. 6 khay bôk năm, rnoh geh bâh prăki dŏng neh bnâh n’gor Kon Tum nchroh geh ƀư 90 rmen prăk, kanŭng geh 22,5% đah nău nchrăp. Ta rơh rƀun nchră, đại biểu HĐND n’gor, Bí thư nkuăl ủy nkuăl ƀon têh Kon Tum Nguyễn Đức Tuy an gĭt, bâh aƀaơ tât dŭt năm aơ mbra hôm nha lah nău ntul rlong, rnoh geh bâh neh ntu mbra hŭch âk. Gay ma doh rklaih nău kŏ văk an ntŭk tăch rgâl neh ntu mât rnph geh tom prăk ngih dak, njêng nău ueh mhe an ăp n’gâng kan geh tât, nău tâm rgop bâh âk đại biểu HĐND n’gor Kon Tum an lah, an geh rgâl rnoh khlay neh ngăch tĭng nău tăch nsum, ngăch, tâm ban tâm nău nchrăp kan, doh rklaih nău kŏ văk tâm ƀư tĭng pháp luật mpeh neh ntu.

Nar nđaơ (6/7), tâm rơh ôp bôk năp ta rơh rƀŭn tal 13, Khóa 11, năm kan 2021-2026 bah HĐND n’gor Gia Lai, ăp đại biểu lĕ rgum ôp âk nău ndal tâm ntil nău ndâk njêng ta ntŭk. Tâm nĕ, nău ăp homestay, ngih wâl têh ndâk ƀư mô tâm di n’hanh mbrơi jêh ăp ntil dăp rgum ta ăp ntŭk tâm n’gor, jêng nău nking n’gang đah nău hun hao n’hanh mbơh ƀư ăp nău nchrăp ƀư ntuh kơl. Ơh nău ôp bah đại biểu mpeh nău kan bah ngih pah kan mât uănh nău an âk homestay, nkual rlu rlău, quán cà phê ndâk ƀư mô tâm di, wa Nguyễn Bá Thạch-Giám đốc N’gâng kan xây dựng Gia Lai an lah, trong kan mât uănh ngih dak mpeh đăp mpăn ndâk ƀư ta âk ntŭk tâm n’gor geh nău lhoi; rnôk ndơ ƀư mô tâm di lĕ jêh mư dơi saơ, jêng tât jêr mkra; nău wât bah nuĭh ƀon lan hôm e đêt, âk nuĭh gĭt tih yơn ndra ƀư tih, ƀư jêr jŏt, jŏ jong nar rmal hành chính an hôm e ndơ ƀư mô tâm di nău way.