VOV4.M’nông: Di nkah 92 năm nar ndâk rmôt kan bu ur Việt Nam, măng 18/10, ta Hà Nội, rmôt kan bu ur Việt Nam ƀư Bôk nau kan njroh mprơ “Nau ueh ao dai Việt”. Tât râng uănh geh Groi Kruanh dak Đặng Thị Ngọc Thịnh. Tâm bôk nau kan, ăp nŭih njroh, mprơ ta Ngih mprơ Kịch Việt Nam tâm rgop nsum gay nkoch mbơh ăp ntil ao dai bah nŭih nkra nkoch Đỗ Trịnh Hoài Nam ndrel ăp nŭih ê nkra kchoh ao dak bu ur tĭng 3 nkô̆: Tu tơm-Hà Nội kăl e, Nau ueh ndrel tâm rnglăp.

Aơ lah nau rgum ndrel bah ăp nau mprơ geh nsum nsoh nkoch n’hơ ao dai bah rup gui bu ur Việt Nam ndrel ăp nau ƀư ueh mpeh nau ŭch ndrel nau rŏng ngăn đah ao dai. Bôk nau kan njroh mprơ nkoch n’hơ aơ gay ma ndâk tay nau ŭch, nau ryơk ndrel nau kan mât, ƀư ueh ăp nau khlay mpeh ao dai ndrel nkoch mbơh rup ao dai, kon nŭih Việt Nam tât đah âk mpưm nŭih ƀon lan ndrel băl bên lam ntur neh.

Kruanh Hội LHPN n’gor Kon Tum an ndơ an mê̆ kơl mât rong n’hanh kon se kon đơi.

Lơ 18/10, Hội LHPN n’gor Kon Tum ƀư nău khlay đah ăp nău ƀư nkah gĭt 92 năm Nar bu ur Việt Nam. Ntoh lư bôk nău kan Mê̆ kơl mât rong-Boăt nthoi tâm rŏng; rgum nchră tâm ban bu ur bu klô; Nar bu ur rdâk njêng nău kan năm 2022 n’hanh N’glôch jêh rơh tâm rlong bu ur rdâk njêng nău kan; Rgum nchră ôp nău kơl n’hanh rgŏ jă ntrong leo tâm rlong “Ndâk njêng bu ur Việt Nam rnôk mhe”. Êng bôk nău kan Mê̆ mât rong-Boăt nthoi nău rŏng, ăp gưl rmôt rgŏ jă nuĭh ndrel ty kơl kon se kon đơi geh nău rêh jêr jŏt đah ding lĕ rnoh prăk rlău 2 rmen. Di rơh aơ Hội LHPN n’gor Kon Tum an nkhôm 10/23 nău mĭn ntơm ƀư tăch rgâl n’hanh rdâk njêng nău kan lvang 2021-2025; Ton ntop kơl 22 nău mĭn rdâk njêng nău kan bah oh yuh bu ur bah tơm prăk manh kơl an bâh Ngân hàng chính sách xã hội đah dĭng lĕ rnoh prăk rlău 5 rme. 

VOV Tây Nguyên/Nuĭh Rblang: H'Thi RơYa