VOV4.M'nông: Nău kan an kon se dôl an ƀư lam hvi lam dak. Ăp n'gor, ăp nhih pah kan, đơn vị...hŏ n'hanh dôl ƀư ăp nău kan ngăn ngăn gay nsum ti mât chăm, ntĭm nti n'hanh mât njrăng kon se; an âk nău mât uănh khlay mât chăm an kon se, lơn lah ăp kon se geh nău rêh jêr jŏt, geh nău rêh âk jêr jŏt. Nău ŭch bah nău kan dja nsĭt tay an kon se  du khay rlu nti rhơn mƀak, đăp mpăn.

N'gor Gia Lai aƀaơ geh rlău 451 rbăn kon se ta nâm 16 năm deh. Tâm nê geh kon se geh nău rêh dŭt jêr jŏt mha êng lah rlău 5.300 kon se (lah kon se kon đơi, kon se geh ntlơi êng, kon se mô geh ntŭk nsing nơm, kon se quet nte). Yơn lah tât aƀaơ mhe geh rlău 3.190 kon se geh nău rêh jŏt dơi geh ndơ kơl ăp khay.  

Đah nkô̆ "Nsum ti mât njrăng kon se, ân lah nău geh lơh tât kon se, dŏng prơ kon se, tom mpet kon se" khay kan an kon se năm aơ ta n'gor Gia Lai gay n'hao dăng nău gĭt êng, nău blău bah kon se, rnăk wâl, nsum mpôl mpeh nsum ti mât njrăng kon se; ngăch mbơh gĭt, lah phong ăp nău tih lơh tât kon se, dŏng prơ suan kan kon se; ƀư pơk ăp jrô ntĭm nti kon se mpeh nău blău rêh, nău blău mât njrăng êng săk nơm, tât rmoh rmanh n'hanh ăp nkô̆ nău geh tât.  

Rlău ma nê, khay kan an kon se ta n'gor Gia Lai rƀŏng tât nău đăp mpăn rơh rlu nti đăp mpăn đah âk nău kan tiăr nti, pâl rlưn; kuăl jă ăp mpôl, ăp nuĭh; nsum ti rgop kơl ƀư prăk nkrem an kon se geh nău rêh jêr jŏt. Wa Lò Xuân Trường, gŭ ta thôn 6, xã Gào, nkual ƀon têh Pleiku mpơl nău:

         “Mpŏng ăp kruanh rđău kan, ăp nhih pah kan nsum mpôl mbra dơi nta trong dơh kơl ăp kon se âk lơn đŏng gay ăp kon se rlău dơi nău rêh jêr jŏt gay geh nău rêh kơt ăp kon se êng ƀa ƀă. Gâp dŭt mpŏng ăp bôk nău kan an ma kon se bah n'gor Gia Lai rgŏ jă kơt nar aơ mbra ring lam tât ăp nkuâl, ăp xã, ăp nkual meng kiău ma gay nta trong dơh an lĕ rngôch ăp kon se geh nău rêh jêr jŏt dơi nsan hao tâm  nău rêh".

Khêp geh rnôk dja, Prăk nkrem kơl an kon se n'gor Gia Lai hŏ pă an 30 nklâm học bổng an kon se geh nău rêh jêr jŏt ta n'gor. Ăp đơn vị, doanh nghiệp, nuĭh lŏng nuih n'hâm hŏ rgop kơl prăk nkrem ntop kơl kon se n'gor Gia Lai rlău 300 rkeh prăk.

Khay kan an kon se ta n'gor Lâm Đồng dôl ƀư đah ăp nău kan rgum tơm kơt: Khâl, pă nklâm ndơ an kon se ta ăp ntŭk kơl nuĭh tâm n'gor; pă an học bổng an ăp kon se jê̆; ƀư ăp nău kan rgŏ jă lam nuĭh ndrel râng ntop kơl kon se ach o;  kon se rnoi mpôl đê̆, kon se geh nău rêh jêr jŏt mha êng , kon se geh tât khuch bah nuh srê Covid-19...Nkhêp geh rnôk dja Công ty cổ phần Tập đoàn Hoa Sen hŏ pă an 1 rmen prăk an Prăk nkrem kơl an kon se n'gor Lâm Đồng, Mpôl kan Dillon International pă an 100 nklâm học bổng (ăp nklâm rnoh khlay 1 rkeh prăk) an kon se geh nău rêh jêr bah nkuâl Đạ Huoai.

Tĭng khay kan an kon se năm aơ, Trung ương Đoàn thanh niên cộng sản Hồ Chí Minh hŏ ƀư ăp nău kan khay rlu nti an kon se đah âk rmôt trong nkra, nkre đah nău kan hăn chŏl lor trong bah đoàn viên druh ndăm tâm trong kan druh ndăm hăn kơl êng khay rlu nti; ntrôl dăng ƀư ăp nău kan njrăng, n'gang rmok dak an kon se, rdâk njêng ăp n'glău re, ƀư ăp jrô nti re dơm an kon se. Yuh Nguyễn Phạm Duy Trang, bí thư Trung ương đoàn, Kruanh Hội đồng đội Trung ương an gĭt:

       “Khay rlu nti năm aơ, Trung ương đoàn n'hanh ăp gưl bộ đoàn, rmôt rdâk njêng n'hanh pă an 1.000 ntŭk pâl rlưn an ăp kon se jê̆ lam dak; pă an 140 n'glău re ntrơn hăn n'hanh gŭ du ntŭk gay tĭng ƀư nău kan njrăng, n'gang bah rmoh rmanh n'hanh rmok dak ta kon se; nkra rlău 700 jay ăch chrach tâm ban kơt rdâk njêng ƀư mhe 300 jay ăch chrach ta nhih nti ntŭk jêr jŏt đŏng; rdâk njêng n'hanh pă an rlău 250 mblâm jay khăn quàng đỏ an ăp kon se jê̆ geh nău rêh jêr jŏt".

          Bộ trưởng Bộ Lao động Thương binh n'hanh Xã hội Đào Ngọc Dung an gĭt, ta trong kan mât njrăng kon se, lam dak hŏ rgum tĭng ƀư âk trong nchrăp, nău dơn kan, trong nkra njrăng, n'gang lơh tât săk jăn kon se; njrăng n'gang rmoh rmanh an kon se; ăp trong nkra rdâk lơh, hŭch bah tât khuch bah trôk nar lơh, rgâl duh nđik trôk nar tât kon se; mât njrăng kon se ta trôm mạng, mât chăm kon se geh nău rêh dŭt jêr jŏt mha êng:

       “Ma khay kan an kon se năm aơ, mpôl hên ŭch rŏng ăp u che, me bơ̆, ăp rnăk gĭt kloh nău dơn kan mât chăm, ntĭm nti, mât njrăng kon se, nsum ti rdâk njêng nău rêh tâm rnăk wâl uĕh, way uănh khlay, mât chăm, groi nđôi đăp mpăn an oh kon he, njrăng, n'gang tâm lah tâm janh rnăk wâl, tom mpet kon se, tât rmoh  rmanh, njrăng n'gang rmok dak an kon se. Ăp nuĭh n'hanh nsum mpôl ân lăp rglah ban saơ, mbơh gĭt, lah phong nuĭh tom mpet kon se tât ăp nhih pah kan dơi kan. Ăp nău tih mpeh nău dơi an kon se, lơn lah nău tih tom mpet kon se, ân dơi ăp nhih pah kan dơi kan n'hanh n'gâng kan tâm dâng nkra rmal ngăch, rmal dŭt lhăt n'hanh đăp mpăn ntop kơl yor ăp nău geh dŭt uĕh an kon se. Nău khlay lơn, tĭng rnăk, tĭng gưl ủy, n'gâng kan ăp gưl ân geh nău ntop kơl âk lơn, lor nchrăp kan nsum an ƀư ăp kôp n'hanh năn ngăch ăp trong nchrăp, trong kơl tâm trong nkra ăp nkô̆ nău mpeh kon se".

Nuĭh rblang: Điểu Thân