Âk khay ma aơ, rlau 700 rnăk rnoi Dao tâm thôn Đoàn Kết, xã Ia Piơr, nkuăl Chư Prông rêh nsum ma nau ƀô ôm tă bah 3 ntŭk rong sur mhe leo lăp kan. Nô Hoàng Văn Niên, tâm thôn Đoàn Kết mbơh, rnôk ƀô ôm ngăn lah ntơm bah bôk măng, kônh wa knŭng nchăng mpông dơm, mô lah put ma bokk put mbung rnôk hăn bĭch đŏng.

Rnôk aơ, tâm xã Ia Piơr geh 14 nau kan mât rong hŏ ndrel dôl ndâk. Xã tâm dăch ma n’har Ia Lâu geh 19 nau kan. Nô Hoàng Văn Niên rvê mpeh nau rêh bah rnăk vâl rnôk ma ăp nau kan mât rong lăp kan:

‘Rnôk ntŭk kan nchrăp kan ngăn, khân păng mbơh lah mô geh bô ôm, pă kan pah ân ƀon lan. Yơn rnôk aơ ri mô saơ geh nau kan, ma knŭng saơ bô ôm. Ƀa hin mhe geh đê̆ ntŭk lăp kan, jêh aơ ri ăp ntŭk êng êng kŏ ƀư kan đŏng ri mhâm blau ma rêh"”

Ndơn nau mbơh bah ƀon lan, bôk khay 4/2023, UBND xã Ia Piơr hŏ geh nar pah kan đah ntoh măt bah 3 ntŭk kan mât rong sur hŏ leo lăp kan. Nau nchih mbơh tâm nar pah kan, nchih kloh: Ntrong pă dak ân n’hoch ndrŏk ê jêh nkra, yơn geh ntŭk ri hŏ leo lăp rong geh 3 khay, rong ma rbăn mhâm sur sŏk puăch. Wa Bùi Văn Phụng, Bí thư Đảng uỷ xã Ia Piơr mbơh:

“Đă ăp n’gâng kan ba lơ, rnôk ăp ntŭk mât rong aơ jêh nkra, ri ndâk rmôt hăn mêt uănh ngăn, năl mbơh ngăn, lah đăp mpăn ri dĭng ân kan. Yơn rnôk aơ, ăp gưl n’gâng kan tâm nkuăl hôm jêr, nau bôk năp lah xã mô geh nŭih blau ƀư ngăn nau kan aơ, tal bar lah xã mô tŏng geh nau dơi”.

Rnôk aơ lam n’gor Gia Lai geh 46 nau kan mât rong geh ân ƀư ntuh kơl, tâm nê geh 16 nau kan lăp kan ngăn. Nau ƀư leo âk ăp ntŭk kan mât rong hŏ ntoh âk nau mô ueh jêh rnôk mêt uănh, kơp ƀư ngăn lah tâm dŭt năm 2022. Tĭmng nê, ăp nau kan knŭng geh ntŭk mât rong, mô geh ăp ntŭk kan dŏng êng kơt lah ntŭk ƀư nau njêng ndơ sa, ndơ ê nkra, mô lah ntŭk rklaih lơi ndŏk tă bah nơm rong mpa. Ndri ma, ê geh njêng luh âk ntil ndoh ndơ hao âk ndrel nau pă kan pah ân nŭih ƀon lan bah nkuăl.

 Êp nê, du đê̆ nau kan geh nau kơl an tă bah nau rgum ntuh kơl, yơn nau ndâk nkra jêh ma mô geh ƀư mât rong ma lŏ ân bu manh. Âk nau kan leo lăp kan knŭng ê geh tŏng dơi ăp nau ntrŭnh mpeh nau mât răk ntŭk ntu gŭ âm. Ngăn lah geh ntŭk knŭng ndâk ndrung gay ma rong, mô geh ntrong n’hoch lơi ndŏk ƀŏ.

Ăp bôk nau kan geh nau rgum rlau 43 rbăn mlâm, pă ma rbăn tất puăch sur ndrel dak toh tâm ăp năm. Yơn lah, knŭng rgop ân tơm prăk n’gor Gia Lai geh 17 rmen, ngăn lah tă bah ăp nau ân manh neh ndrel ăp rnoh prăk dŏng êng.

Gay ƀư rklaih ăp nau nkol aơ, UBND n’gor Gia Lai hŏ geh nau rđau đă N’gâng kan nchrăp kan ndrel ntuh kơl tâm rgop đah ăp ntŭk kan, n’gâng kan, nkuăl lŏ ntĭm mbơh ăp tơm ntuh kơl ƀư ân jêh ăp nau kan tĭng nau ntrŭnh, ƀư ăp nau ntrŭnh mpeh nau răk kloh ntŭk ntu, rgum sŏk lơi đah ăp tơm prăk soay đah nau kan. Wa Đinh Hữu Hoà, Groi Giám đốc ƀư N’gâng kan nchrăp kan ndrel ntuh kơl n’gor Gia Lai, mbơh:

‘Đah ăp nau kan mât rong, N’gâng kan nchrăp kan ndrel ntuh kơl râng kơl tâm nchră nau đah UBND n’gor ƀư rjăp lơn tâm nau rgum nau kan, knŭng rgum ăp nau kan têh mât rong ndâm ueh, dŏng tĭng ăp nau kan mhe ueh gay ma răk ueh ntŭk ntu gŭ âm ndrel ăp nau kan geh nsum ma nau ê nkra ăp ntil ndơ tă bah mât rong gay đăp mpăn geh rnoh, mô rgum ăp nau kan nchrah nchrai, nau kan lĕ jŏ ơm”.

Nau kan mât rong ƀư hôl khih ƀô tâm ntŭk ntu mô êng bah n’gor Gia Lai ma hôm geh âk tâm ăp n’gor êng bah Tây Nguyên. Knŭng êng nkuăl Cư Jút, n’gor Dak Nông geh 37 nau kan mât rong sur rgum, têh. Tâm nê âk ntŭk mât rong tâm rnoh aơ lơh khuch ntŭk mât rong, khuch ngăn tât nau rêh bah ƀon lan êp nê. Ngăn lah kơt ntŭk mât rong bah wa Lê Văn Hùng, tâm thôn Nam Tiến, xã Ea Pô, nkuăl Cư Jút geh nau dăng 2.400 mlâm sur. Bah nau ƀư kan, ntŭk mât rong hŏ ân n’hoch dak ƀŏ luh âk rlau ma nau an dơi tĭng nau ntrŭnh mbơh đă. Ndri ma, UBND n’gor Dak Nông hŏ ntrŭnh nau mhal prăk ntŭk kan aơ, đah rnoh 347,5 rkeh. Êng nau mhal prăk, UBND n’gor hôm nchâp đă Wa Hùng ân nsrŭng ăp nau kan ƀư, nsrŭng nkra nau kan mât rong ndrel ntrơn leo tât ntŭk êng ân tâm di./.