VOV4.M’nông: Rƀŏng tât Đại hội ntoh măt lam dak tal 12 bah Đoàn druh ndăm Cộng sản Hồ Chí Minh rơh rlau aơ, Rnâng kan Bí thư Trung ương Đoàn hŏ ƀư âk nau kan khlay. Tâm nê, geh ăp nau nchih nkra săk ntơ (logo), nau mprơ ngăn bah Đại hội ndrel vẽ ăp rup gay ma nkoch trêng ân Đại hội Đoàn lam dak tal 12.

            Rơh tâm rlong ƀư nau săk ntơ Đại hội lam dak tal 12 ntơm ƀư rgum geh rlau 200 nŭih rlong đah 368 nau ƀư njoăl tât tâm rlong. Tĭng nau đă, ăp nau rlong ân geh ntoh nau dơi, nau khlay bah Đại hội Đoàn lam dak, ƀư rjăp ăp nau ueh ntoh lư bah druh ndăm lah nau mpŏng, nau leo trong, nau nâp, nau tâm rnglăp, blau nau mhe, hun hao; Ntoh dơi nau ueh geh jêng ndrel hun hao bah Đoàn druh ndăm Cộng sản Hồ Chí Minh. Rnâng kan ƀư hŏ geh săch pă du giải Nhất, du giải Nhì, du giải pe, 4 giải khuyến khích ndrel du hê nŭih geh âk nau ƀư. Tâm nê, giải Nhất geh pă ân nau ƀư bah Vũ Hồng Quân, ta Hà Nội. Nau ƀư geh giải nhất geh Rnâng kan săch ƀư geh nau blau ueh, nơih, mhe, gleh, nâp, mra dơi ƀư ƀư phù hiệu gay ma yông rlơ̆, geh nkra tâm âk ntil ndơ ndrel geh ƀư tă bah âk ntil ndơ. Wa Vũ Hồng Quân, nŭih geh giải Nhấm nkoch:

            ‘Nau nkra bah gâp geh sŏk tă bah rup năr sĭm ntoh nau ŭch rlet rlau hao jêng bah đoàn druh ndăm, kŏ kơt lah gơih gơih bah mom ndăm hăn tât ăp nkuăl bah neh dak. Nau mĭn bôk năp rnôk ƀư nau nkra njêng aơ lah màu ndruh bah đoàn druh ndăm, màu bah nau mpŏng ŭch, nau hao jêng, nê kŏ lah màu bah mom ndăm, màu bah ntoh măt ân nau geh jêng bah mom ndăm ri gâp dŏng màu ndrih ƀư tơm ân logo aơ”.

            Tĭng Bí thư Trung ương Đoàn druh ndăm Cộng sản Hồ Chí Minh Nguyễn Tường Lâm: Logo geh giải nhất mra ntoh nau ngăn bah Đại hội Đoàn lam dak tal 12 ndrel geh mbơh tâm âk nau nkoch mbơh nau ndrel nau ueh mro ntơm bah nar aơ:

            ‘Logo aơ mra geh dŏng jŏ, ntơm bah rnôk aơ ân tât rnôk geh ƀư đại hội ndrel ba kơi đại hội. Phung hên mra ntrŭnh âk nau kan gay ma ntrŭt dăng nau kan nkoch mbơh mpeh logo njêng nau dơi dŏng ah đoàn viên đah nau geh ƀư bah nơm geh săch nar aơ. Êp nau rgâl Logo đại hội Đoàn vay ơm aơ ri mra lah logo đại hội Đoàn lam dak ndrel jêh nê đŏng lah tâm lôch năm kan 12 năm ba kơi tă mra lah logo aơ mra lŏ geh dŏng tâm âk nau kan bah Đoàn”.

            Mhe aơ, Rnâng kan Bí thư Trung ương Đoàn Hồ Chí Minh kŏ mbơh nau mprơ tơm bah Đại hội Đoàn lam dak tal 12. Nkre lah, rnê nkhôm ndrel mbơh 11 nau mprơ geh giải A ndrel pă bằng khên ndrel săm ƀŭt kơp dơn bah 29 nau mprơ geh giải B. Tĭng nê, nau mprơ “Sứ mệnh thanh niên” lah nau mprơ geh Hội đồng nghệ thuật đă dŏng ndrel Ban bí thư Trung ương Đoàn lam dak tal 12. Nau mprơ đah nau ndrĭng bah Quản Văn Hải, Nhcạ bah Quang Huy đah ăp nau mprơ ndrel ma ma er mprơ mom, ngăch yơn lah geh nau ntô̆ n’hao. Nhạc sĩ Quang Huy ntoh măt rmôt ndrĭng nau nkoch: Bol ma nŭih ndrĭng nau mô di lah du hê nŭih ƀư nau kan ndrĭng nau, yơn đah du hê nŭih geh nau blau ƀư cán bộ đoàn, nhạc sĩ rnơm lah geh nau mprơ ueh gay ma ndrĭng njêng nau mprơ ueh:

‘Gâp ndrĭng rnê ăp rup gui bah druh ndăm Cộng sản Hồ Chí Minh đah nau mprơ ueh, ntơm bah bôk năp lah nau ƀư rjăp, ryơk n’hao ndrel jêh nê lah lah nau mprơ nkoch tât nau ueh bah nau mprơ mom ngăch dăng ndrel đah âk nau ueh dăng bah rơh mhe”.

            Rnâng kan hŏ săch ndrel ndơn geh 131 nau mprơ bah 126 nŭih tă bah 43 n’gor tâm lam dak. Aơ lah ăp nau mprơ mhe, geh nau nkoch ndrel geh nsum ma nkô̆ nau bah nau kan Đoàn ndrel nau kan druh ndăm rnôk aơ. Tâm bôk nau kan, Rnâng kan kŏ săch pă giải A ndrel giải B ân ăp nŭih ndrĭng bah 40 nau. Nhạc sỹ Doãn Nguyên, nŭih bah rmôt săch nkhôm uănh năl: Ăp nau râng rlong rơh aơ geh ntô̆ n’hao nau kan, nau dơi bah Đoàn druh ndăm Hồ Chí Minh tâm druh ndăm ndrel tâm nau rêh, nkoch mbơh nuih n’hâm tâm rnglăp, leo trong, nau kơl an bah ăp rơh mom tâm nau ndâk njêng ndrel mât neh dak:

            ‘Nau mbơh tâm nau nchih mprơ dŭt n’hâm kloh, lah nau rêh ndrel nau leo lăp bah ăp rơh druh ndăm rnôk aơ, nau kan kơl an bah neh dak kloh ngăn, nchŏng kloh tâm 4-5 mnĭt ma nau mprơ ri geh săch ueh. Aơ lah nau ang bah rơh rgŏ jă tâm rơh aơ”.

            Jêh nau mbơh ndrel pă nau nkhôm bah rơh tâm rlong, Rnâng kan ƀư nau tâm rlong “Nau mprơ mom ndăm”, bonh đă ăp nŭih ndrĭng nau ntoh lư mprơ nau mprơ tơm bah Đại hội, njêng nau pâl ueh bah druh ndăm rhơn Đại hội Đoàn lam dak tal 12 tâm ăp nau dơi bah nau rêh.

            Ndrel ma nê, rơh rlau aơ, Trung ương Đoàn druh ndăm Cộng sản Hồ Chí Minh ƀư nau tâm rlong vẽ rup gay ma bonh đă, nkoch trêng Đại hội Đoàn lam dak tal 12. Nau ndrĭng rlong geh tâm dăch, ntoh dơi nkô̆ nau ndrel nuih n’hâm bah Đại hội ntoh măt lam dak Đoàn druh ndăm Cộng sản Hồ Chí Minh tal 12, kơt: nau ŭch, nau khlay bah Đại hội Đoàn lam dak, lah rjăp ăp nau nchih ntoh lư bah druh ndăm, nkô̆ nau, nau kan bah ntŭk kan Đoàn ndrel druh ndăm Việt Nam tâm rơh mhe; nau ueh ơm njêng ndrel hun hao bah Đoàn ndruh ndăm Cộng sản Hồ Chí Minh, mpeh ntŭk, nau kan ndrel ăp nau rgop bah ntŭk kan Đoàn ndruh ndăm Cộng sản Hồ Chí Minh ndrel mom ndăm lam dak tâm nau kan ndâk njêng ndrel mât neh dak./.

                        Nŭih rblang: H’Thi