Dak Lak rnôk aơ geh 115 ntŭk nglau n’gâr dak, geh nau mra roh đăp mpăn, yơn n’gor aơ dôl mâp nau jêr mpeh tơm prăk gay ma n’hao nkra. Âk ngăn ăp ntŭk n’gâr dak geh djơh khuch hô yor n’gar dak bah jŏ dak trăm, khuch mpeh chor, ler kơh, chah đang trong n’hoch ndrel ntŭk trong pơk hoch...Rnoh prăk gay ma ntuh kơl n’hao nkra mhe 115 n’gâr dak lĕ djơh khuch kơt aơ nklăp rlau 820 rmen.

Tâm nê, tơm prăk hŏ geh ntop pă nkra, n’hao nâp ân 12 ntŭk tâm năm 2024 bơi tât 56 rmen; tơm prăk nchrăp ntuh kơl nkra nâp ân 103 ntŭk yơn ê geh prăk ƀư rlau 760 rmen. Gay đăp mpăn tâm rnôk aơ, ăp ntŭk n’gâng kan hŏ đă nau huch lơi rnoh dak tâm nglau bah ăp ntŭk mra geh mô nâp aơ.

Bah năp nău tât krit nji bah trôk nar mih sial, n’gor Dak Nông ƀư ăp mpôl hăn ôp uănh ăp n’glău n’gâr dak gay geh trong rdâng lơh. Yơn lah, nău dŭt klach rvê lah lam n’gor mhe geh 30/256 n’glău n’gâr njêng n’hanh tĭng ƀư trong nchrăp rdâng lơh đah nô nău  jăch ndăn dơm.

N’gâng kan dơi kan n’gor năl geh 81 n’glău n’gâr khuch khat, tâm nê 24  n’glău n’gâr dak khuch khat hô, geh ma nău pling âk. Ăp n’glău n’gâr dja dôl geh rluh rlâm êng tĭng ntŭk chor bah lơ n’hanh chor bah dâng;  chor bah lơ mô hŏ tuh ma bê tông mô lah tuh nkra yơn hŏ jŭr khuch hô; âk n’glău n’gâr dak ndjoh ma n’hong neh geh dak rchoh ler bar ding. N’gor Dak Nông dôl dŭt ŭch geh nău mât uănh khlay ntop kơl bah Trung ương gay ơm njêng trong nchrăp rdâng lơh đah ăp nău tât ndal, nkra bah khuch khat ăp n’glău n’gâr dak bât.