Na nê̆, ta rơh rƀŭn nchră geh nău tât râng bâh 210 đại biểu ndơn kan ntoh lư an mpôl gĭt blău, ăp nuĭh kan khoa học, văn nghệ sĩ geh âk nău dơi ntoh lư tâm nău pah kan, tâm rgop âk ta trong rdâk njêng n’gâng kan khoa học công nghệ, ntĭm nti bâh neh dak n’hanh n’gâng kan văn hóa Việt Nam ueh mhe, geh âk nău ueh êng mpôl rnoi.

Ntoh ngơi ta rơh rƀŭn nchră, kruanh dak Võ Văn Thưởng mpơl nău lah ueh dŭt n’hâm tât ăp rơh nuĭh gĭt blău, nuĭh kan khoa học, văn nghệ sỹ, ăp nuĭh gĭt blău bâh neh dak lĕ tâm rgop nău mĭn n’hanh săk soan nău pah kan mô rlu đah nău tâm rŏng kon nuĭh n’hanh neh dak, knơm âk an lah, mpôl gĭt blău, nuĭh kan khoa hoc, văn nghệ sĩ Việt Nam dol ma dôl rêh n’hanh pah kan tâm dak mô lah dak bah dih, đah nău rŏng n’hanh nău dơn kan, nău gĭt blău n’hanh mĭn kan mhe lĕ geh tâm rgop an ngih dak tĭng êng trong bâh nơm, ndrel bun dăp, n’hao soan dăng tâm rnglăp lĕ mpôl rnoi n’hanh ăp nău khlăy ueh bâh văn hóa, kon nuĭh Việt Nam, njêng nău dăng têh kuăng, ndơ̆ neh dak he ăp nar lơ ma hun hao, têh dăng, hơm răm, đăp mpăn.