Nar aơ lah Nar kon se lam ntŭr neh, rnôk tâm nchră mpeh hun hao wăng sa rêh jêng kon nuĭh tâm ban kơt bah meng Quốc hội đŏng, âk đại biểu dăn đă ăp gưl, ăp n’gâng kan geh trong nkra geh nău tam njrăng n’gang bah tâm lơh kon se hăn nti, lơh sôt rmanh tât săk kon se, lơn lah njrăng, n’gang rmok dak tâm khay rlu nti. Tĭng âk nuĭh, tâm ăp năm dăch aơ, nuĭh tih lơh kon se, lơn lah kon se geh bu lơh rnôk hăn nti, lơh dong kon se tâm rnăk wâl, bol hŏ dơi mât kân yơn way rŭ hôch geh ma nău tât krit jêr.

Ăp nuĭh mĭn lah, ân n’hao dăng njrăng n’gang tâm lơh, tom mpet kon se tâm ăp nău  kan văn hoá, thể thao, pâl nđaih; an lor rdâk njêng ntŭk pâl rlưn, nău kan văn hoá, njroh mprơ, thể dục, thể thao an kon se gưl xã, lơn lah ăp xã geh nău rêh wăng sa dŭt jêr jŏt mha êng. Du đêt nuĭh uănh năl, nău khlay krêp dêh đah rnăk wâl, nhih nti n’hanh lam rêh jêng kon nuĭh tâm ntĭm nti nău blău rêh, nuih n’hâm uĕh lŏng, trong gŭ âm an kon se dơi uănh khlay âk lơn. Ăp ntŭk ntĭm nti ân ntrôl dăng pah kan nkoch trêng, njêng ntŭk gŭ rêh đăp mpăn ngăn an kon se.

Ôi aơ (1/6), Quốc hội tâm nchră tay ta hội trường mpeh uănh năl kơi ntop jêh geh tĭng ƀư trong nchrăp hun hao wăng sa- rêh jêng kon nuĭh n’hanh ngân sách ngih dak năm 2022; nô nău tĭng ƀư trong nchrăp hun hao wăng sa – rêh jêng kon nuĭh n’hanh ngân sách ngih dak ăp khay bôk năm 2023; Tâm nchră ta hội trường mpeh trong nchrăp ntuh kơl kơi ntop tơm prăk điều lệ an Ngân hàng Nông nghiệp n’hanh Phát triển nông thôn Việt Nam.