VOV4.M’nông-  Nar 2/8, n’gâng kan ntĭm n’hanh nti geh công văn njoăl an UBND ăp n’gor, nkuăl ƀon têh bâh Trung ương mpeh nău mbơh ƀư săch dŏng biên chế nai nti mầm non, phổ thông tĭng nău ntrŭnh  mbrô 72 bâh n’gâng kan chính trị. Tĭng nĕ, an lor săch dŏng nai nti ăp môn nti nti gay ma ƀư tĭng bôk nău kan ntĭm nti phổ thông năm 2018 n’hanh an lor săch dŏng nai nti mầm non an ăp ngih nti mầm non ta nkual wăng sa- rêh jêng jêr jŏt. Tĭng nău ntrŭnh mbrô 72 bâh n’gâng kan chính trị, lvang năm 2022-2026 ntop an bơi tât 66 rbăn biên chế nai nti, êng năm 2022-2023 ntop an klâp ma 28 rbăn biên chế nai nti mầm non, phổ thông ngih nti bâh ngih dak mât uănh. N’gâng kan ntĭm n’hanh nti dăn đă ăp n’gor, nkuăl ƀon têh rgum ăp trong kan gay ma mât đăp mpăn rnoh săch biên chế nai nti kơt: mbơh tơih na nê̆ mpeh nău săch dŏng biên chế, pah kan đah ăp ntŭk kan ntĭm n’hanh nti gay ma geh nău săch dŏng, tâm ôp ngơi đah ăp ntŭk êng gay ma geh tâm rgop săch dŏng tĭng di ăp môn nti tâm di đah nău kan.

          Nuĭh rblang: Thị Đoắt