Ăp du hê sinh viên, đoàn viên druh ndăm mbra du hê druh ndăm lah du hê “nuĭh ntơh măt” rêng lam ăp rnoh khlay văn hóa way ơm n’hanh săk tơm rnoi nuĭh tât băl mpôl tâm n’hanh bah dih dak. Aơ lah nău mpŏng bah kruanh rđău kan nkual ƀon têh Buôn Ma Thuột, n’gor Dak Lak ta bôk nău kan mâp măt, mpư rnê sinh viên, druh ndăm rnoi mpôl đê̆ n’hanh chroh rƀŭn ntoh lư năm 2024.

Ta bôk nău kan, tâm mông nar dăch dêh, răm mƀak, ăp đại biểu dơi ăp đại biểu dơi  tâm nđŭr n’hanh djăt ăp nău nkoch, nău ŭch rŏng, nău mpŏng geh bah ăp sinh viên n’hanh druh ndăm rnoi mpôl đê̆,  chroh rƀŭn ntoh lư.  Aơ lah ăp tơm nuĭh uĕh, geh âk nău dơi tâm kơt nti, tiăr nti tâm ban kơt ntơm njêng nău kan. Khân  păng ntơh măt an druh ndăm ta ntŭk nkoch luh ăp nău dăn đă mpeh trong kơl đah sinh viên, druh ndăm rnoi mpôl đê̆; ŭch rŏng sinh viên, druh ndăm dơi ntop kơl tât đah tơm prăk manh, joi geh nău kan.

Ta bôk nău kan, kruanh rđăukan du đêt đơn vị tâm ôp, nkoch mbơh na  nê̆ lơn mpeh ăp trong kơl ntrŭt nsôr an sinh viên, druh ndăm rnoi mpôl đê̆, lơn lah tâm trong ntĭm nti, nta joi nău  kan n’hanh hăn kan dak bah dih. Râng bôk nău kan, oh H Saronny Arul, sinh viên n’gâng kan tâm boh dak bah dih, Học viện Ngoại giao nkoch:

Ăp bôk nău kan kơt dja ri mbra njêng suan ntrôl an gâp kơt nti uĕh lơn n’hanh tiăr nti. Yor ăp kruanh rđău kan hŏ nkoch kloh lah djăt ma kơt nti an dŭt jăp uĕh lôch nê sĭt ta  aơ, lah geh nuĭh, lah du găr ntil huêng khlay n’hanh  mha êng an nkual ƀon têh n’hanh an n’gor he nơm. Yor ta aơ lah  hôm dŭt âk nuĭh dôl kâp ăp nuĭh kơt mpôl hên. Mpŏng lah jêh aơ tay mbra geh tay ăp rơh mâp măt gay dơi rgŏ jă nuih n’hâm bah ăp nuĭh kon se nti, sinh viên dôl  tiăr nti gŭ ngai jay.

Nkhêp geh rnôk  dja, UBND nkual ƀon têh Buôn Ma Thuột nkhôm an Giấy khen an 8 sinh viên geh nău dơi âk tâm kơt nti; Nkual ƀon têh Buôn Ma Thuột nkhôm rnê 11 sinh viên n’hanh 31 druh ndăm rnoi mpôl đê̆, chroh rƀŭn ntoh lư. Ntơh măt kruanh rđău kan ta ntŭk, wa Trần Đức Nhật, Groi kruanh UBND nkual ƀon  têh Buôn Ma Thuột ŭch rŏng ăp sinh viên, druh ndăm rnoi mpôl đê̆ mbra lah du hê nuĭh ntơh măt rêng lam săk ntơr văn hóa, rup gui kon nuĭh n’hanh nkual neh Buôn Ma Thuột lah êng n’hanh Dak  Lak lah nsum:

“Mpŏng lah ăp băl dơi nkhôm rnê nar aơ mbra lah ăp găr ntil rgop âk lơn đŏng an ƀon tơm Buôn Ma Thuột lah êng n’hanh n’gor Dak Lak lah nsum tâm let năp tay. Mpŏng lah ăp băl mbra lah ăp nuĭh ntơh măt, ăp găr ntil, lah ăp nuĭh ndu rup uĕh văn hóa way ơm, săk tơm bah nkual ƀon têh Buôn Ma Thuột tât đah băl mpôl tâm  n’hanh bah dih dak. Ăp băl mbra lah ăp  ntơh măt ntoh lư gay rgop rdâk njêng, nkoch n’hơ rup gui nkual ƀon têh Buôn Ma Thuột – nkual ƀon têh cà phê bah  lam ntŭr neh, tâm ban kơt rdâk njêng nkual ƀon têh nđĭr uĕh, ăp ntil ndơ gŭ rêh, ăp tŏng nău lư n’hanh săk tơm”.

Ntik uĕh nău  way ơm tâm rnglăp, rŏng dak bah rnoi nuĭh Việt Nam, tâm bah ri aơ, druh ndăm rnoi mpôl đê̆ n’hanh chroh rƀŭn nkual ƀon têh Buôn Ma Thuột, n’gor Dak Lak hŏ mô rlu nsrôih, tiăr nti n’hanh nsrôih rgop tâm rơh rdâk njêng n’hanh mât njrăng neh dak. Nar lơn ma âk druh ndăm rnoi mpôl đê̆ tĭng kơt nti ta ăp nhih nti Đại học, cao đẳng n’hanh trung học chuyên nghiệp ta lam dak, lôch nti âk sinh viên dơi joi geh nău kan n’hanh ƀư kruanh n’gâng tơm tâm Đảng, Ngih dak n’hanh ăp n’gâng kan, nsum mpôl ăp  gưl.

Lơn âk ăp băl lah ăp nuĭh jăp gơih nti, nsrôih tiăr nti, nsrôih nsan hao tâm  nău rêh. Nău nê  hŏ dơi năl saơ ngăn, nar lơn ma âk druh ndăm rnoi mpôl đê̆ tĭng nti  ta ăp nhih nti đại học, cao đẳng n’hanh trung học chuyên nghiệp lam  dak, lôch rnôk hăn nti âk sinh viên dơi tâm pă kan n’hanh mât ƀư jêng kruanh n’gâng tơm tâm nhih pah kan Đảng, Ngih dak n’hanh ăp n’gâng kan, nsum mpôl ăp gưl; hang rbăn druh ndăm nsrôih kơt nti, pah kan jan sa, tăch rgâl ƀư geh ndrŏng an săk nơm, rnăk wâl n’hanh lam rêh jêng kon nuĭh, rgop jut jăng ji ngot, n’hŭch ach o, n’hao nău rêh  nuĭh ƀon lan./.