Ta Công ty Cổ phần Thép Asean mpeh tâm Nkual công nghiệp Hòa Phú, ăp phân xưởng măy mŏk lĕ pah kan dŭt n’hâm. Tĭng wa Lê Thị Tuyết Hạ, Groi Tổng giám đốc công ty, nklăp 600 phung pah kan lĕ lăp kan tâm ăp nar bôk năm. Công ty lĕ dơi dơn âk sam ƀŭt nchăm ndơ bah ăp nuĭh, mpŏng ăp nău ntơm ƀư mhe uĕh lăng tâm năm 2024.

Jêh rnôk lôch rơh rlu nar ntơm năm mhe pah kan ăp gưl hăn ƀư tŏng ăp, bôk năm ri Ban Tổng giám đốc lì xì ntrŭt nsôr mbah rhơn tết bôk năm an lĕ rngôch oh nô. Ban kruanh mpŏng an ntŭk tăch rgâl dơi uĕh lăng, ăp ndơ ƀư ri dơi đah công ty mbra geh nkra njêng tăch rgâl đăp mpăn gay nuĭh pah kan geh nău kan, rnoh geh đăp mpăn.

Tâm ăp nar bôk năm Giáp Thìn đŏng, Công ty TNHH may mặc Lực Thiêm ta Rkum Công nghiệp Tân An 2 lĕ dơi dơn âk sam ƀŭt nchăm ndơ mhe. Wa Trần Trí Vỹ, Giám đốc Công ty an gĭt, 1.000 phung pah kan plơ̆ pah kan tay, tâm nĕ 95% lah nuĭh rnoi mpôl đêt lah bu ur. Aƀaơ, Công ty dôl ndăn săch dŏng nuĭh kan n’hanh pơk hvi ntŭk nkra njêng gay tâm di ăp sam ƀŭt nchăm ndơ mhe:

Doanh nghiệp nar 10 sa nkra hôm, nar ƀư bôk năp gâp hăn kan ri lĕ rngôch phung pah kan lăp kan geh 98%. Năm aơ sam ƀŭt nchăm ndơ gâp hao rlău năm bah năp nklăp 20%, nău aơ nta an doanh nghiệp dơi hun hao ngăch lơn. Aƀaơ, Công ty dôl săch nuĭh kan, nuĭh kan ta ntŭk dŭt âk, aƀaơ geh 1 rbăn nuih. Tâm 3 khay aơ, ntŭk kan mbra săch tay 300 nuĭh an tâm di đah sam ƀŭt nchrăm ndơ bah gâp.

Nău mbơh rhơn bah doanh nghiệp lĕ kơl ăp phung pah kan nsrôih lơn rnôk hăn kan tâm ăp nar bôk năm mhe. Yuh H’Theo Triết ta ƀon Jun, xă Yang Tao, nkuăl Lắk, aƀaơ ƀư phung pah kan ta Công TNHH may mặc Lực Thiêm an gĭt, mbra nsrôih ƀư uĕh nău kan bah nơm gay n’hao geh prăk:

Bah rnôk oh lăp công ty nău rêh bah oh dơi rgâl lơn n’hanh dơh geh bah Công ty uĕh đŏng. Lôch tết oh saơ ăp nuĭh dŭt rhơn, răm m’ak gay pah kan tay.

Tĭng wa Nguyễn Kim Tùng, Giám đốc Ban Mât uănh Rkum công nghiệp Tân An, aƀaơ Rkum công nghiệp geh 73 doanh nghiệp dôl pah kan, rnoh tŏng geh 100%. Ăp nar bôk năm 2024 mông nar pah kan ăp phân xưởng n’gŭr răm, đah nău nsrôih săk geh, n’hao uĕh nâp ndơ.

Tât rnôk aơ lah 100% doanh nghiệp lah ntơm năm mhe rhôm n’hanh rnoh phung pah kan bah năp Tết, jêh Tết mô geh rgâl âk n’hanh trong nchrăp tĭng di nău nchrăp ri tât 3 khay n’hanh 6 khay hao tay 2 rbăn nuĭh. Bôk năm saơ tâm rkum công nghiệp cán bộ, nuĭh pah kan n’hanh phung kan dŭt rhơn mông nar pah kan. Mpŏng n’hâm ƀư tâm năm 2024 wăng sa mô hôm jêr jŏt tay n’hanh ăp nuĭh pah kan rhơn m’ak n’hanh nsĭt tay nău geh n’hanh nău rêh an nuĭh ƀon lan uĕh lơn.

Năm 2024 đah âk nău mbơh răm rhơn đah doanh nghiệp, nuĭh pah kan ta Dak Lak nsĭt tay nău răm, nău mpŏng ŭch mpeh ăp nău lôch uĕh mhe tâm hun hao wăng sa rêh jêng, rgâl nău rêh nuĭh ƀon lan./.