VOV4.M'nông: Ôi 8/6, Bộ Giáo dục n'hanh Đào tạo ƀư rgum nchră pơk sŏng dăng mpeh pah kan ƀư rơh thi tốt nghiệp trung học phổ thông năm 2022. Râng tâm nchră geh Ƀan rđău đă thi bah 63 n'gor, nkual ƀon têh n'hanh ntơh măt ăp Bộ, đơn vị geh tât. Rơh thi tốt nghiệp trung học phổ thông năm aơ mbra ƀư tâm ăp nar 7 n'hanh 8/7 tât. Tât rnôk dja, Bộ Giáo dục n'hanh Đào tạo hŏ an dŏng ăp tŏng ăp si ƀŭt rđău đă, ntĭm nti mpeh rơh thi tốt nghiệp trung học phổ thông năm 2022.

Kơp tât 5h kêng măng nar 5/6, ăp đơn vị hŏ ƀư lôch jêh nău dơn Phiếu đăng ký râng thi đah lĕ rngôch rlău 1 rkeh 2 rbăn nuĭh râng đăng ký thi. Nău mbơh ta rnôk tâm nchră, ăp n'gor an gĭt, hŏ dŭt jêh bôk nău kan ntĭm nti an kon se jrô 12 tĭng trong nchrăp n'hanh aƀaơ dôl ƀư ôn tập. Ăp n'gor njêng Ƀan rđău đă thi gưl n'gor, gưl nkuâl da dê gay ƀư rơh thi du trong dŭt uĕh. Ăp nău kan nchrăp mpeh drăp ndơ, nuĭh kan an rơh thi dôl dơi an ƀư, đăp mpăn ƀư ndrel du rơh thi lam dak tĭng trong nchrăp hŏ ndơ̆ luh./.

Nuĭh rblang: Điểu Thân