VOV4.M'nông. Nar aơ 16/2, 2.656 mom ndăm bâh n’gor Gia Lai mbra ntơm hăn tahen n’hanh công an nhân dân. Tât rnôk aơ, ăp nuiĭh mom ndăm lĕ tât ta ntŭk ton gay ma ƀư test ngăch Covid-19 n’hanh sŏk mẫu xét nghiệm RT-PCR. Rnoh nuĭh mom ndăm aơ mbra geh ndơ̆ an ăp ntŭk kan: Quân đoàn 3, quân khu 5, Công an n’gor, Bộ chỉ huy Bộ đội biên phòng n’gor n’hanh Bộ chỉ huy quân sự n’gor. Tĭng rnoh kơp, rnoh mom ndăm hăn tahen năm aơ lôch nti đại học geh rlău 1,4%, đoàn viên geh rlău 76%, geh 22 nuĭh lah đảng viên. Năm aơ, tam rnoh 2.250 mom ndăm hăn tahen tĭng năm ton geh tât 61% lah rnoi đê̆. Gay ma ăp mom ndăm đăp mpăn hăn pah kan, ăp ntŭk lĕ tât ôp khâl, nsơm nuih n’hâm, rgum ƀư ueh nău kơl an rnăk vâl, tahen.

Năm 2022, n’gor Lâm Đồng dơi jao rnoh an săch n’hanh kuăl 1.150 nuĭh ƀon lan bu ndăm tâm rnoh năm deh hăn kahan. Tâm di săch, kuăl ƀon lan hăn kahan dơi ƀư tĭng Luật Nghĩa vụ quân sự năm 2015; tŏng ăp rnoh an, tâm di nău ŭch ndâk njêng kahan tâm nu nău mhe; nta njêng an cán bộ bah dâng an ăp ntŭk nkual jru ngai. Gay ƀư tĭng geh săk rnglăy săch kuăl ƀon lan hăn kahan năm 2022, Ban ntĭm rđău tahen ăp gưl lĕ tâm ôp tâm nchră an UBND ndrel gưl ƀư dăn tât ăp xă, phường, nkuăl têh, ăp ngih sam ƀŭt THPT, ntŭk ntĭm nti nău kan, ntĭm nău kan pah ta n’gor an lĕ rngôch nuĭh ƀon lan tŏng 17 năm deh. Trong kan săch kahan dơi ƀư tŏng rnoh nuĭh n’hanh đăp mpăn uĕh dăng tĭng nuih n’hâm ƀon lan ƀư tơm, tâm ban, kloh rah wah, đăp mpăn, ntêm nkrem; n’hao prêh nău kan bah ăp rmôt kan, êng nuĭh gay n’hao uĕh trong kan săch kahan.

Tĭng nău nchrăp, 170 nuĭh mom ndăm geh săch hăn tahen bâh nkuăl ƀon têh Kon Tum, n’gor Kon Tum geh pă ntŭk gŭ, ntŭk sa, gŭ rlu rgum ta ntŭk tiăr nti, bâh nar 11/2 tât nar dơn tahen năm 2022. Tâm rnôk aơ, ăp nuĭh mom ndăm geh săch geh tât râng ăp nău kan tiăr nti bah dih kơt lah nti thể dục ôi, 16 động tác võ thể dục ôi, điều lệnh ma ti dơm, ntĭm rtŭt mŭng phôi, nti mprơ n’hanh koh sŏk kơt nău ntrŭnh tahen, nkre lah leo ƀư ăp nău kan pâl rlưn, rlu rlău njêng nău gơih nđơr an mom ndăm ê lor hăn tahen. Đah nău nsrôih bâh gâl ủy, n’gâng kan n’hanh hội đồng nghĩa vụ quân sự nkuăl ƀon têh Kon Tum tâm nău kan mât uănh, an gŭ nglah êng rgum nuĭh mom ndăm ê lor hăn tahen, mbra ntop kơl gay ma n’gor Kon Tum ƀư lôch nău kan săch tahen năm 2022.

Nuĭh rblang: Thị Đoắt