VOV4.M’nông – Kêng măng 13/10, Hiệp hội Doanh nghiệp n’gor Dak Lak tâm rgop đah Hội Doanh nhân mom n’gor Dak Lak ƀư bôk nău kan Tâm mâp mbah rhơn di Nar Doanh nhân Việt Nam 13/10. Ta nar mâp, Kruanh Hiệp hội Doanh nghiệp n’gor mbơh nu nău tâm 9 khay năm 2022. Uănh ƀư ký ton kan ndrel lĕ rngôch đah Hiệp hội Doanh nghiệp n’gor Dak Lak n’hanh Hội doanh nhân mom n’gor Dak Lak. Dak Lak aƀaơ geh bơi 11.800 doanh nghiệp pah kan, dăp tal 22 lam dak n’hanh tal 2 tâm nkual Tây Nguyên.

Kruanh n’gor Dak Lak an nkao mbah rhơn ăp doanh nghiệp.

Đah nău hun hao ngăch mpeh âk, rmôt doanh nhân, doanh nghiệp lĕ geh âk nău rgop an hun hao wăng sa rêh jêng bah n’gor. Tĭng wa Huỳnh Văn Dũng, Kruanh Hiệp hội Doanh nghiệp n’gor Dak Lak, bah bôk năm tât aƀaơ Dak Lak lĕ ndâk njêng mhe rlău 1 rbăn doanh nghiệp, hao bơi 26% nkôp đah rơh aơ. Nău hun hao aơ mbra ntop tay soan dăng an nsum mpôl doanh nghiệp Dak Lak rgop an đăp mpăn n’hanh hao jêng wăng sa bah n’gor.

Di rơh kahgĭt nar Doanh nhân Việt Nam, kêng măng nar naơ 13/10, ta nkuăl ƀon têh Kon Tum, UBND n;gor Kon Tum ƀư rơh rƀŭn nchră doanh nghiệp tal 2. Aơ lah trong kan dŭt săk rnglăy gay ma n’gor Kon Tum doh rklaih ngăch ăp nău jêr, kŏ văk bâh doanh nghiệp rnôk uănh gĭt, uănh joi, ntuh kơl n’hanh tâm rgop rgâl mhe ntŭk pah kan ntuh kơl tăch rgâl ta n’gor.

Ntoh ngơi ta rơh rƀŭn nchră tâm nchră ngơi doanh nghiệp tal 2, wa Nguyễn Hữu Tháp, groi kruanh UBND n’gor Kon Tum lah na nê̆ , rnê ăp doanh nhân, doanh nghiệp lĕ nsrôih rlet rlău nău jêr, geh ăp nău tâm rgop khlăy tâm ndâk nsơm n’hanh hun hao wăng sa rêh jêng bâh n’gor lôch nuh srê Covid-19. Đah nău mĭn kloh rjăp, răng dăng, ta rơh rƀŭn nchră tâm nchră doanh nghiệp tal 2, ndơn kan du đê̆ doanh nghiệp lĕ dăn đă đah nuĭh leo kan n’gor Kon Tum âk nău dôl geh mâp tâm trong uănh gĭt, ntuh kơl n’hanh pah kan jan sa, tăch rgâl ta n’gor.

VOV Tây Nguyên

Nuĭh rblang: Y Sưng Phê Ja