“Luh trong dŭt klach công nông”, bah ơm hŏ way jêng bên bah nuĭh ƀon lan ăp n’gor Tây Nguyên mpeh ăp geh ma  nău roh đăp mpăn hăn ntung trong rŭ hôch bah ndeh công nông, ntil ndeh rdeng ndơ hăn luh kan mir ba mha êng ta nkual. Gay tâm ban nău ŭch geh khlay mpeh ndeh dŏng kan mir ba đah nău đăp mpăn hăn ntung trong, mpôl cảnh sát ntung trong, công an ăp xã tâm nkual hŏ geh ăp nău nsrôih gay n’hao nău đăp mpăn bah ndeh công nông n’hanh nău gĭt êng bah nuĭh ƀĭt ntil ndeh dja rnôk râng hăn ntung trong.

Lah nkual ƀon têh bah n’gor Dak Lak yơn ta nkual ƀon têh Buôn Ma Thuột, rnoh âk ndeh công nông rsong hăn nha hôm geh tât hang rbăn bôk đŏng, lơn lah ta ăp xã mpeh mper. Wa Y Thơm Kênh, thôn 1, xã Cư Êbur , nkual ƀon têh Buôn Ma Thuột an gĭt, bol tŏng geh prăk gay rvăt du bôk ndeh bán tải, yơn păng nha hôm dŏng ndeh công nông đŏng yor dơh dŏng bah ndeh. Rlău ma dŏng rdeng ndơ, ndeh dja hôm geh nău dơi xơr lĕ ma neh kro ntang n’hanh lŏ sre rnôk ntrŭp tay ndơ đŏng. Wa Y Thơm saơ ndeh công nông ntil ơm roh dŭt âk nău đăp mpăn, jêng lor rnôk rvăt ndeh mhe, păng hŏ djăt nău njrăng đă bah mpôl công an xã, ntuh kơl bơi rlău n’gul prăk rvăt ndeh dơi đăp mpăn  lơn:

“Rnôk ƀư ndeh dja ri công an lah hŏ lĕ hôm, ân ntrŭp ŭnh xi nhan, bah ma, bah kiău, mpip ndeh. Lĕ rngôch ntuh kơl lĕ 125 rkeh prăk. Ma ndeh dja mô kâp quay, aơ lah máy đề”.

Ngăn an saơ ta xã Cư Êbur, n’gor Dak Lak tâm ban kơt lam ăp ntŭk ta ăp n’gor Tây Nguyên, dŭt đêt ndeh công nông geh ăp tŏng ŭnh, mpip, xi-nhan. Tâm rnoh hang rhiăng rbăn ntil ndeh dja, dơn geh đêt ndeh râng rhŏ dŏng nchuăn rdeng ndơ dơm, way rdeng ndơ tuch tăm, ndơ dŏng tuch tăm, lŭ loih mon jay… dơi nuĭh tơm ndeh meng uănh tât nău đăp mpăn nâp uĕh. Hôm ƀa ƀă lah hăn luh tĭng khay tuch tăm dơm, ŭnh mpip kơt lah hŏ rŭng, dŭt roh đăp mpăn, ăp năm geh tâm tom ndeh khĭt nuĭh da dê. Lơn âk rơh tâm tom geh tât ndeh công nông rnôk bri nsrŭp măng, rnôk ntil ndeh dja hăn rŭ mông mpơl saơ săk. Gay hŭch bah geh ma nău tâm tom, ntơm bah bôk năm 2024, cảnh sát ntung trong n’hanh công an xã ta 2 n’gor Dak Lak, Dak Nông, hŏ ƀư âk rơh lĭr decal lơp chrêk an ndeh công nông ta n’gor, wăch rgum âk nuĭh tơm ndeh. Tĭng Đại úy Bùi Mạnh Tuấn, Groi kruanh Công an xã Cư ÊBur, nkual ƀon têh Buôn Ma Thuột, n’gor Dak Lak, lĭr decal lơp chrêk mô dơn lah trong nkra kỹ thuật ma hôm lah trong nkra nkoch trêng lam lĕ rngôch mpeh đăp mpăn hăn ntung trong đah ndeh công nông:

"Nău lĭr decal dja lah du trong ƀư gay mâp đah kônh wa ƀon lan. Ntơm bah nău lĭr decal dja gay nkoch trêng, rgŏ jă, ôp kuăl kônh wa rvăt năp êng ŭnh sol, ŭnh bah kơi, mpip ndeh…n’hao dăng pah kan ăp trong nkra đăp mpăn gay tâm rnôk mât dŏng, rsong hăn ndeh dơi đăp mpăn. Nău dja mbra dơi ƀư tĭng kơn, leo ƀư mbro, bah ir rmoh rmanh tâm tom ndeh.

Ta 5 n’gor Tây Nguyên aƀaơ geh nklăp 200.000 bôk ndeh công nông. Nău lĭr decal lơp chrêk an ntil ndeh dja dơi ƀư ntơm bah năm 2019, ta du đêt xã. Tât bôk năm aơ, trong nkra dja mơ dơi an ƀư lam ăp ntŭk, nkre đah pah kan nkoch trêng mpeh ăp quy định, nău way rnôk râng hăn ntung trong, lơn lah nău mô nchuăt rlău rnoh ngăch dơi an, mô rdeng nuĭh kalơ rbong ndeh; tĭng jăp der ndeh, rhot ndeh, teng trong di nău way … Thượng tá Phạm Quốc Lập – Kruanh Jrô kan Cảnh sát giao thông Công an n’gor Dak Nông an lah, tâm nô nău ngăn geh ta n’gor, aơ lah trong nkra geh nău tam ngăn:

"Lĭr decal lơp chrêk an ndeh càng, ndeh cày dja gay an ăp nuĭh râng hăn ntung trong lor nchrăp năl saơ ndeh hăn bah năp gay lor nchrăp njrăng n’gang, der bah ir tâm tom ndeh hăn ntung trong. Ndrel đah nê lah trong nkra nkoch trêng rgŏ jă, rmal ăp ndeh mô đăp mpăn tŏng uĕh mbra ƀư jêng geh ma nău tâm tom ndeh."

Bol hŏ geh nău tam âk tâm nău n’hao rnoh đăp mpăn bah ndeh công nông rnôk râng hăn ntung trong rnôk bri  măng, yơn lĭr decal lơp chrêk an ndeh dja mô di lah trong nkra jŏ jong. Lah ndơ dŏng tơm an nău kan tuch tăm luh mir jan ba, ndeh công nông way mơ̆ mih găng nar, pung bŏk, chŏl pih rêp, ăp păng lĭr lơp chrêk mbra ngăch chah khuch,  plôk n’hanh mô geh nău tam dŏng. Gay bah ir lơn đŏng geh ma nău tâm tom ndeh, ndeh công nông ta Tây Nguyên ân dơi mât kân lhăt ăp rnoh di kỹ thuật đăp mpăn, ntơm bah ntŭk tơm ntrŭp njêng.