VOV4.Mnông -Đah nău nsrôih mô an nuĭh ƀon lan mô geh Tết, ăp gâl kan n’gâng kan, ntŭk kan, n’gâng kan bâh n’gor Kon Tum bâh ta năp Tết bơi tât du khay lĕ ƀư uănh nđôi, nchih săk na nê̆ ăp rnăk geh nău rêh jêr jŏt an geh kơl an gay ma vơt Tết. Tết Nguyên đán Nhâm Dần năm aơ, bol ma nuh srê Covid-19 ta n’gor Kon Tum hôm nha geh ntưp âk, yơn đah nău rêh nsum tâm di ta nău mhe, 10 nkuăl, nkuăl ƀon têh bâh n’gor hôm nha geh mât ƀư nar tâm mâp nklâm banh chưng n’hanh ƀư leo du đê̆ nău kan vơt rhơn tết ueh răm, đăp mpăn vơt năm mhe. Nkoch mpeh nău mât kơl tết bâh n’gâng kan ta ntŭk an nuĭh ƀon lan vơt tết, wa A Síp, groi kruanh rnâng kan xã Đăk Ruồng, nkuăl Kon Rẫy an gĭt:

Ta năp tết, rnâng kan Hội đồng nhân dân, ủy ban nhân dân xã, ăp n’gâng kan ntŭk kan lĕ pah kan uănh nđôi tay ăp rnăk mô tŏng ndơ sa, jêr jŏt gay ma mbơh tơih tât Đảng ủy, Hội đồng tâm ban kơt mặt trận Tổ quốc Việt Nam xã gay ma geh bôk nău kan kơl an ndơ sông sa ngăch ndăn, tŏng ăp an ăp rnăk ach o, rnăk jêr jŏt, gay ma ăp nuĭh ƀon lan tâm xã Đăk Ruồng ăp nuĭh geh hơm răm, đăp mpăn vơt tết Nhâm Dần năm 2022. Aƀaơ, ƀon lan tâm xã Đăk Ruồng âk rnăk vâl lĕ nchrăp tŏng ăp ntil ndơ way ơm, ăp rnăk lĕ geh ƀư vơt sa tết hơm răm, mpêt nkrem n’hanh đăp mpăn, n’gâng kan xã mô an geh du rnăk mô tŏng ndơ sa tâm ăp nar Tết”.

Xă Dak Ndrung, nkuăl Dak Song, n’gor Dak Nông geh 4 ƀon rnoi mpôl đêt (lĕ rngôch lah nuĭh Bunong) geh njêng đah ăp ngih pah kan, ntŭk kan bah n’gor tât nkuăl. Tâm năm bah năp, rnôk srê Covid-19, ăp ntŭk kan njêng oh nô jŭr khâl, an ndơ, ntrŭt nsôr kônh wa rlet rlău jêr jŏt. Tâm nĕ, Viện KSND n’gor Dak Nông lĕ ƀư an 100 nklâm ndơ (dĭng lĕ rlău 30 rkeh prăk) an kônh wa ta Ƀon Bu Boong. Nô Điểu Minh-Kruanh UBMTTQ xă Dak Ndrung, nkuăl Dak Song an gĭt, di rơh Tết nguyên đan Nhâm Dần, ăp ntŭk njêng oh nô tât ôp khâl kônh wa:

“Tât tết, xă Dak Ndrung ri răm ngăn lah geh ntŭk njêng oh nô bah n’gor, nkuăl hăn khâl. Du ntŭk kan jŭr tât ƀon, rgop prăk rwăt sŭr an kônh wa. Tal 2 tay, ăp ntŭk kan njêng oh nô hăn khâl ăp bu ranh ƀon, kô ranh ƀon n’hanh tât khâl n’gâng kan ƀon lan. Tă bah nĕ nkoch trêng, ntĭm kônh wa pah kan jan sa, hun hao wăng sa. Khlay ngăn lah njrăng n’gang chôt srê Covid-19, kônh wa mô hăn nsong âk mâp nuĭh êng”.

Hôm ta xã Nkual ngai Kông Lơng Khơng, nkuăl Kbang, n’gor Gia Lai, nău nchrăp vơt tết Nhâm Dần lĕ ntoh n’gôr. Đoàn thanh niên lah mpôl kan tơm tâm nău kan mât kloh ueh ntŭk ntô gŭ rêh ê lor vơt năm mhe. Ta aơ geh ntŭk ntô kloh ueh, bâh geh nuĭh ƀon lan nsrôih tât râng ăp rơh rgŏ jă, nău kan tâm rlong rdâk njêng nkual ƀon lan mhe. Nô Đinh Văn Lộc, Bí thư đoàn xã Kông Lơng Khơng an gĭt, tâm ba năp nơh, đoàn xã lĕ tâm rgop đah ăp rnăk ƀon lan ƀư ntrơn rlău 20 ndrung n’gar kik djărr ndrôk rpu ngai đah jay gŭ. Kuĭh ntu jăng su ndok ndrel đah 20 ngih ŭm, ngih ach cho tâm di kloh ueh. Nchrăp vơt tết Nhâm Dần, Đoàn xã rgum lĕ rlău 20 đoàn viên mom ndăm donh ndŏk 5km trong hăn let xã, tăm mhe âk tơm si nđir gay ma mât kloh ueh ntuđk ntô.

“Đah nău kan lah Bí thư Đoàn xã, mpôl hên geh ntĭm đă tay chi đoàn thôn ƀon mbơh tơih rgŏ jă đoàn viên mom ndăm ƀư tĭng ueh nău kan nkra mhe ntŭk ntô, mât kloh ueh trong hăn tâm ƀon, ngih jay ueh kloh. Ŭch, tết năm aơ lĕ rngôch đoàn viên chi đoàn ăp thôn ƀon tâm rnglăp, ueh răm, mô geh ƀư tih ăp nău ntrŭnh bâh pháp luật. Mpôl he lĕ geh saơ, nuh srê Covid-19 dŭt jêr njrăng, hên lĕ n’anh dôl geh rgŏ jă tay đoàn viên mom ndăm ƀư tĭng ueh nău kan njrăng rdâng nuh srê Covid-19, ngăn lah ta rơh tết, gay ma ntop ăp nuĭh, ăp rnăk vơt sa tết ueh răm, săk soan ngăch dăng, pah kan hun hao”.

Ta xă Đạ Sar, nkuăl Lạc Dương, n’gor Lâm Đồng, bôl geh khuch chôt srê Covid-19 yơn yor cà phê khlay jêng nău rêh wăng sa bah kônh wa rnoi mpôl đêt ta ntŭk đăp mpăn n’hanh hao. Đah nău ndrel ty, tâm rnglăp bah nuĭh ƀon lan, nău mbơh ƀư nsum hun hao wăng sa n’hanh njrăng n’gang srê tâm nu nău mhe aƀaơ lĕ geh săk rnglăy uĕh, nuĭh ƀon lan răm rhơn wơt năm mhe. Wa Liêng Jrang Ha Rô Ky, Kruanh UBND xă Đạ Sar an gĭt:

“Năm 2020-2021, yor khuch bah chôt srê Covid-19 nsum đah lam dak, xă Đạ Sar khuch dŭt âk, bôl ndrĭ, kônh wa hôm e mât chăm cà phê hun hao nâm ơm. Năm Bah năp, rnoh geh bôl hŭch, ntop tay cà phê hao âk nkôp đah năm bah năp, jêng nău rêh bah nuĭh ƀon lan đăp mpăn. Wăng sa-rêh jêng bah xă hun hao tay, nuĭh ƀon lan răm n’hanh rhơn. Ndrel đah ăp trong ƀư tĭng nsum nkre hun hao wăng sa, nkre njrăng n’gang srê Covid-19 tam bah gưl bâh lơ, nău wât bah nuĭh ƀon lan đah nău kan nsum ƀon lan hao, nău ƀư tĭng hun hao wăng sa n’hanh njrăng n’gang srê nsĭt tay săk rnglăy uĕh, đăp mpăn ăp nău rƀŏng n’gluh. Bah yan cà phê dơi hao jêng nău tâm nar năm mhe aơ nuih n’hâm bah kônh wa dŭt rhơn”.

Tâm ban kơt nĕ đŏng, ƀon lan ăp mpôl rnoi nkuăl Dak Mil, n’gor Dak Nông năm aơ vơt tết ueh rhơn yor ndơ tuch tăm geh âk geh tăch rnoh khlăy. Ta Ƀon Bu Dak, xã Thuận An, ntŭk geh rlău 315 rnăk đah klâp ma 1.200 nuĭh, lĕ rngôch lah nuĭh Bunong, Nău geh sa tơm bâh ƀon lan knơm âk ta nău pah kan tăm cà phê n’hanh ba lŏ. Wa Y Bling Jing, Bí thư chi bộ ƀon Bu Dak an gĭt, năm aơ cà phê geh âk tăch khlay đŏng, nău kan ƀư dak bât ta Bu Dak ntơm nơh geh nkra mhe jêng lah tŏng dak tŏ an bar pe jât ha ba 2 yan, nău rêh bâh ƀon lan lĕ geh n’hao đŏng:

“Năm ơm lĕ lôch, năm mhe lĕ tât, ƀon lan lĕ dŭt rhơn gay ma hun hao nău wăng sa rêh jêng. Bol ma hôm nha jêr jŏt, yơn ƀon lan hôm nha nsrôih ndâk nsơm. Ta meng nĕ hôm nha geh nău kơl kan bâh Đảng, ngih dak n’hanh n’gâng kan ta ntŭk mpôl hên mât uănh tât ƀon lan. Mpôl hên mbơh tơih mât chăm săk soan, tâm nĕ ƀư tĭng nău ntrŭnh 5 K gay ma mât đăp mpăn, rnă njrăng. Ta rơh tết tâm ban kơt nĕ đŏng, gay ma mât săk soan an nơm n’hanh ntŭk rêh jêng, ƀon lan ndrel nsum ti njrăng rdâng nuh srê”.