VOV4.M’nông:   Jêh rnôk srê Covid-19 dơi nking n’gang, wăng sa-rêh jêng ta nkual Tây Nguyên lĕ geh âk nău saơ rdâk hao tay. Tâm nĕ, nău ƀư wăch rgum ntuh kơl geh săk rnglăy uĕh, sŏk an tơm prăk ta ăp n’gor geh rnoh hao jêng âk, trong kan đăp mpăn rêh jêng geh tŏng ăp.

Tĭng nău mbơh bah UBND n’gor Gia Lai, wăng sa-rêh jêng ta ntŭk 9 khay năm 2022 geh âk nău rdâk hao dăng. Tâm nĕ, rnoh doanh nghiệp mhe ndâk njêng n’hanh săk rnglăy wăch rgum ntuh kơl, geh săk rnglăy uĕh. Na nê̆, bah bôk năm tât aƀaơ, ta n’gor Gia Lai geh rlău 740 doanh nghiệp dơi ndâk njêng mhe (hao bơi 17% nkôp đah rơh năm 2021), đah dĭng lĕ prăk dăn ƀư rlău 7.400 rmen prăk. Mpeh wăch rgum ntuh kơl, UBND n’gor Gia Lai uănh an nău ntrŭnh ntuh kơl 6 nău nchrăp ƀư, đah dĭng lĕ prăk rlău 600 rmen prăk. 15 nău nchrăp ƀư êng, dĭng lĕ rlău 3.400 rmen prăk lĕ ntơm jêh sam ƀŭt sam tra, dôl dơi n’gor uănh mĭn tay. Tĭng wa Nguyễn Hữu Quế-Giám đốc N’gâng kan kế hoạch n’hanh Đầu tư n’gor Gia Lai, gay ntŭk ntô ntuh kơl kloh rah wah, tâm ban lơn, n’gor mhe ntrôl dăng rgâl samƀŭt hành chính, nkre nsrôih rgum nău nchrăp ƀư mô di nău ton:

        “Tâm 9 khay bôk năm lĕ lôch nău ƀư 4 nău nchrăp kan. Hôm ƀa ƀă, du đêt nău nchrăp ƀư dôl jă tay hăn pah kan gay jêh nkra rgâl samƀŭt ntuh kơl. Hôm 30 nău nchrăp ƀư bôl mbrơi, yơn dôl dơi an bah Luật ntuh kơl ri mpôl hên uănh nđôi tay, lah jŏ ir ri mbra lôch an ntuh kơl. N’gâng kan Kế hoạch n’hanh Đầu tư lĕ dăn nău rgop bah UBND n’gor an ntrŭnh rgâl nău ntrŭnh 3232 năm 2020, gay dơh lơn tâm rnôk mbơh ƀư ăp nău nchrăp ntuh kơl”.

Dak Lak mâp ăp nuĭh ntop kơl dak bah dih.

Geh tâm hao jêng wăch rgum đŏng, mhe aơ, n’gor Gia Lai an ndơ ƀư kuăl jă ntuh kơl lvang 2022-2025, đah dĭng lĕ 35 nău nchrăp ƀư têh rlău 8.300 rmen prăk mpeh tâm ăp nău kan ndâk ƀư ntung trong; công nghiệp nkret njêng ndơ lŏ mir- si glê n’hanh nkra njêng ndơ ƀư ngih wâl, ndơ dŏng; lŏ mir-tăm bri; ntĭm nti, văn hóa, thể thao n’hanh pâl nđaih.

Ta Dak lak, 9 khay năm 2022, nău kan soay n’gor Dak Lak lĕ sŏk soay rlău rnoh nchrăp rlău 24% nkôp đah rơh aơ năm e, rlău âk rnoh an trong nchrăp. Na nê̆, tâm 1.000 rmen prăk nkôp đah rơh aơ năm e. Săk rnglăy nĕ yor jêh srê Covid-19 dơi uănh nđôi, ăp doanh nghiệp ntơm đăp mpăn nău ƀư nkra njêng tăch rgâl nkre n’ăp nău geh hao âk. Rnoh hao geh tâm ăp doanh nghiệp têh kơt: Bia-dak njŭng, ŭnh nar nkra njêng điện sial, măt nar, tăch n’gluh ndơ lŏ mir, geh prăk êng nuĭh... Wa Bùi Văn Chuẩn-Cục trưởng Cục soay n’gor Dak Lak an gĭt, rnoh an sŏk ndơ̆ tơm prăk năm aơ 4.700 rmen prăk lĕ sŏk geh trong nchrăp. Nău ŭch mhe n’gluh an 3 khay hôm bah kơi lah rlău nklăp 700 rmen prăk.

“Mpôl hên n’hao tay ăp trong ntop kơl doanh nghiệp mbơh ƀư ăp nău kơl n’hŭch, njong, kơl ăp doanh nghiệp rdâk hao tay gay hao jêng geh ndơ ndơ̆ soay. Tal 2, mbơh ƀư mât uănh tay điện tử. Rlău ma nĕ, mpôl hên mbra mbơh ƀư ăp ntŭk sŏk mhe ntoh, mbơh ƀư ăp trong sŏk, njrăng n’gang roh rui, nchoeng nkual ăp rmôt sŏk geh ntŭk rmeh têh roh rui gay ơm mkra. N’hanh n’glêh dŭt, mpôl hên hôm e mât nău ƀư ăp Ban ntĭm rđău njrăng n’gang roh sŏk soay bah n’gor, ăp nkuăl, nkual têh n’hanh nkual ƀon têh gay tŏng ăp sŏk tŏng rnoh an bah Trung ương n’hanh n’gor jao”.

Gia Lai kuăl jă ntuh kơl Nkual Ntêm nkrem sinh quyển Cao nguyên

Bah meng ntrôl dăng nkra njêng-tăch rgâl, hun hao wăng sa, ăp n’gor tâm nkual Tây Nguyên uănh tât đŏng trong kan đăp mpăn rêh jêng. Mhe aơ, UBND n’gor Dak Lak lĕ ƀư rƀŭn nchră mâp ăp nuĭh ntuh kơl dak bah dih. Ntoh ngơi ta rƀŭn nchră, wa Võ Văn Cảnh, Groi kruanh UBND n’gor Dak Lak mĭn lah, n’gor nchrăp nta an nău uĕh ngăn gay ăp rmôt kan, nuĭh ntop kơl dak bah dih, ntop kơl n’gor tâm năm tât:

“UBND n’gor kơt ăp n’gâng kan, ban, nău kan bah n’gor Dak Lak mbra ntĭm rđău ăp nuĭh tơm nău nchrăp ƀư tâm rgop rjăp lơn tay đah ăp nuĭh, ntrôl dăng nkra rgâl hành chính gay ăp bôk nău kan, nău nchrăp ƀư dơi ƀư tĭng ngăch lơn, săk rnglăy lơn n’hanh ngăn ngên lơn. Yor rĭ gâp mpŏng ăp rmôt lĕ n’hanh dôl kan ndrel đah Dak Lak uănh n’gor lah du hê kan ndrel hăn ngên n’hanh nsing nơm, n’hao lơn tay ăp bôk nău kan, nău nchrăp ƀư, rgop rblang dŭt n’hâm an hun hao ăp ntil wăng sa-rêh jêng bah n’gor”.

 Tĭng nău mbơh, 2 năm bah năp, n’gor lĕ rgŏ jă geh rlău 6,5 rkeh đôlar tĭng bôk nău kan n’hao kan ndrel n’hanh ntrŭt ngăch rgŏ jă ntop kơl bah dih chính phủ. Tâm nĕ, kơp tât khay 8 năm aơ, UBND n’gor lĕ uănh an wơt dơn 51 ntil ndơ ntop kơl đah dĭng lĕ kuăl jă geh 3,7 rkeh đôlar. Aƀaơ hôm 7 ntil ndơ ntop kơl đah dĭng lĕ ton bơi 2,9 rkeh đôlar lĕ geh nău mbơh ntop kơl. Ăp ntŭk ntop kơl rgum tâm ăp xă nkual jru ngai, nkual dŭt jêr jŏt ta ăp nkuăl geh rnoh rnăk ach o âk ngăn n’gor kơt Lắk, Krông Bông, Mdrak, Buôn Đôn, Ea Súp. Nău kan ntop kơl âk lah dak si, ntĭm nti, ntŭk ntô gŭ âm, hun hao wăng sa-rêh jêng n’hanh mkra ăp nău rêh jêng.

VOV Tây Nguyên

Nuĭh rblang: Y Sưng Phê Ja