Ntơm bah 20 năm bah năp, ndăn neh bri bah rnăk nơm ndrel ƀon lan, wa Hà Ngọc Hợp tâm thôn Lương Thịnh, xã Tân Thịnh, nkuăl ƀon têh Yên Bái hŏ rong sŭt. Ăp năm êp aơ, ndơn saơ nau ŭch dŏng dak sŭt âk, wa Hợp rong âk tĭng ăp năm. Tât rnôk aơ, rnăk wa gehr lau 100 pŭm, geh rnôk tât 150 pŭm, ân geh ma rhiăng rkeh prăk tâm du năm.

            Wa Hợp nkoch, rong sŭt ân ntuh kơl âk prăk, du thùng rong ntuh nklăp du rkeh, ân gơih, ân nsôih ndrel gĭt nau rêh, nau jôp sa bah ong tĭng ăp rnôk, ăp yan. Rlau ma nê, nŭih rong ân gĭt ntil kao, yan kao luh, yan ong ân jôp kao jêng sŭt, nkuăl geh âk kao. Gay ma tâm pleh ntŭk rong tât ntŭk geh dak sŭt âk. Ndrel ma nê, Kŏ ân geh gĭt nau nkra pŭm, pă mpôl gay ma nkah bah sŭt mpar du:

            ‘Rong đê̆ ri bơi tât bar jêt năm yơn lah nkoch tât nau rong ân geh nau dơi văng sa săk tam ri bah rnôk aơ nklăp 7 năm rnăk hên mơ rgum rong âk. Rong ti ân nkah njrăng, kơl njrăng kon mhe deh ro, nơm ân mêt uănh ân n’hêl mơ dơi”.

            Plŏ sĭt tă bah nkuăl neh tâm lơh ta Tây Nguyên năm 1976, tahen sôt rmanh Nguyễn Minh Đông tâm thôn Hạnh Phúc, xã Y xan, nkuăl Trấn Yên, n’gor Yên Bái ntơm nau ƀư hun hao văng sa. Rnôk nê, nkre ƀư kruanh rmôt kan tuch tăm tâm boh nsum, nkre rdâng ma ăp nau ji yor geh khuch bah tâm lơh tâm săk, wa Đông ndrel ur kon nsôih mât nau rêh ndrel răk rong oh kon.

            Wa Đông mbơh, nklăp 10 năm bah năp, rnôk nkuăl bonh đă ntrơn rgâl tơm tăm, mpa rong, rnăk păng ntrơn 2 ha neh yôk tăm bum gay tăm tơm quế. Tât rnôk aơ, ntơm bah rnôk koh n’gĭng, du năm wa geh bơi tât 100 rkeh. Săk wa Đông mro mĭn, lah tahen Wa Hồ ri moh nau jêr kŏ nsôih rlet, rnôk aơ nau rêh ueh, mô dơi ân geh ji ngot ach o, mô dơi ƀư mbăk jâk bah rnăk vâl ndrel nau rêh:

            ‘Gâp ŭch ngăn nau ngơi bah Wa lah “Tahen sôt rmanh yơn mô di lah mô dơi kan”, lah tahen ri moh nau kan kŏ ƀư ân jêh, janh mĭn, janh kan, mô klach nau jêr, moh nau jêr kŏ dơi ƀư, bonh đă ur kon nsôih kan”.

            Rnôk aơ rmôt tahen ơm n’gor Yên Bái geh rlau 36.500 nŭih, râng rƀŭn tâm rlau 1.400 ntŭk. Gay ƀư ueh nau kan bah tahen ơm tâm rnôk mhe, rmôt tahen ơm n’gor Yên Bái vay rđau ăp rmôt kan ƀư ueh nau tâm rlong, ăp nau bonh đă yor nkuăl ƀư, rgop nau ndrel gưl uỷ, n’gâng kan ndrel ƀon lan ƀư ueh nau dơi bah nau kan chính trị geh jao.

            Ngăn lah, nau kan “Tahen tâm kơl n’huch ach o, pah kan văng sa blau” geh ƀư ngăch, tâm di, ngăn, rƀŏng hun hao văng sa rêh jêng bah nkuăl ndrel nau kan, nau dơi bah ăp nŭih. Wa Vũ Văn Huyên, Groi Kruanh rmôt tahen ơm nkuăl Yên Bình, n’gor Yân Bái mbơh, êp nau ndăn tu tơm ndrel nau kơl an bah Trung ương, bah n’gor ndrel nkuăl gay ndâk, hun hao nau tuch tăm, tăch rgâl tâm di, rmôt kan kŏ tâm rgop ma ăp gưl n’gâng kan ƀư jrâu ntĭm nti mpeh nau mât rong, nkoch mbơh, bonh đă ƀư tĭng nau kan mhe, nau kan prêh lăp tuch tăm ân geh săk tam kơt nau ŭch:

            ‘Phung hên hŏ bonh đă tahen ơm hun hao văng sa đah âk nau kan ndrel nau ƀư ueh, nsôih hao jêng ndrŏng. Phung hên ƀư ueh rmôt kan tăch rgâl bah rmôt tahen ơm bah nkuăl, bonh đă tahen ơm, oh kon ndrel ƀon lan hun hao văng sa”.

            Ngăch, blau, nsĭt âk nau dơi tâm nau kan ƀư văng sa, ăp tahen ơm Yên Bái nar aơ hŏ ndrel dôl rgop nau mô đêt tâm nau rêh n’huch ach o nâp nâl, ndâk njêng ƀon lan mhe ndrel đô thị mhe tâm nkuăl, rgop nau leo Yên Bái hun hao ngăch, nâp nala tŭng trong “drih, tâm ban, ăp ntil ndrel ueh nâp”./.