Nklang ntŭk dak lêng ngai, gôl dak Cô Lin kơt lah du n’gâng ntoh nklang nkuăl dak lêng. Ntŭk n’gâng nê geh ăp tahen ntơ lah “lục giác đài”. Gôl dak aơ klơ san hô băm dak, ndri ma nau rêh bah cán bộ tahen hôm âk nau jêr. Đah bri duh nar hô, ăp năm cán bộ tahen gôl dak Cô Lin vơt 6 khay bri duh nar ndrel 6 khay mih. Ăp rnôk dak lêng n’gănh, sial dăng khuch ngăn âk nau kan bah dak lêng, yơn lah mô rvê nau jêr, ăp tahen mro mât nâp nkuăl trôk, nkuăl dak lêng bah neh dak. Thiếu tá Nguyễn Xuân Duy, rđau kan gôl dak Cô Lin, ngơi:

            ‘Ăp rơh cán bộ, tahen gôl dak Cô Lin kŏ mât rjăp nau vay ơm bah gôl dak ndrel ngăn lah nau kan; mro mât nâp kŏ kơt lah ƀư ueh nau vay ơm tâm rnôk ntĭm nti tahen, mbơh ndrel ntĭm nti, nau kan, rgop nau mât đăp mpăn nkuăl neh bah gôl dak, nkuăl ma nơm geh mât ƀư”.

            Tâm ăp năm rlau aơ, cán bộ tahen tâm ăp gôl dak tâm Trường Sa mô ân roh nkô̆ nau kan, mro rklaih nau tât, ăp duk dak ba dih lăp tih tâm nkuăl dak lêng bah dak nơm. Tĭng Trung tá Trần Danh Hoàng, rđau kan kruanh gôl dak Sinh Tồn: Cán bộ, tahen pah kan tâm gôl dak mô geh nar rlu, mra tâm lơh lah nau kan bôk năp. Ăp nau tât tâm dak lêng kŏ geh kơp dơn, uănh ndrel mbơh năn gay geh nau rklaih năn, mô ân geh nau tât ndrat ndal:

            ‘Phung hên hăn tât ta gôl dak ƀư nau kan, aơ lah nau rnơm ndrel nau kan ueh rjăp bah tahen lah êng ndrel kon nŭih Việt lah nsum. Rđau kan bah gôl dak ntĭm nti oh nô năl aơ lah nting mham, lah neh tơm bah u che. Nau kan bah ăp kơn rnôk hăn kan ta Trường Sa lah ân geh ƀư jêh nau kan rlau bar, rlau pe tŏ, mro mrăng nsôih, nsôih mô rlu gay ân neh dak, ân ƀon lan tâm neh kơh đăp mpăn lơn. Phung hên mro mât rjăp n’gâr phao, mro lah ntŭk nsing rnơm ngăn ân ƀon lan joi ka tâm dak lêng”.

            Tâm gôl dak Trường Sa, mih nar pă jêng 2 yan, yan vai ndrel yan mih. Yor mô geh dak dơl ndri ma nau dŏng dak mih tâm gôl dak têm ngăn. Tâm yan vai, ăp cán bộ tahen knŭng dŏng ntơm 3-5 lít dak du nar gay ma dŏng. Ndri ma, tâm gôl dak mro ndrih ƀrâng tơm si ndrel ăp mir byăp ăp ntil ndrih, geh màu ndrih nê lah âk ngăn n’hâm soan, dak rhal bah ăp kơn cán bộ, tahen ta aơ. Thiếu tá Võ Văn Hiệp, gôl dak Đá Đông A mbơh: Rdâng đah ăp nau jêr, cán bộ, tahen Trường Sa ntơm bah rơh aơ tât rơh êng tâm nkoch ăp nau kan gay ma dơi “rlet nar, rlet mih”.

‘Bol ma jêr jŏt, yơn jêh mông ntĭm nti nau kan hên ndăn mông gay ma tăm byăp. Dak dŏng ri hên têm nkrem ngăn, lôch pach măt lŏ tŏ tơm si. Mô lah geh mông măng ri hên ang ŭnh pil gay ma nhŭp ndrŭng sa byăp. Màu ndrih bah tơm si, bah nkao si...ân hên bah oi nau lêt rgănh jêh lôch ƀư kan. Nau mĭn kơt lah nơm tâm dăch ma neh kơh lơn”.

 Ndơn geh nau khuch ngăn bah bri duh nar, sial, phŭt tât ndal, tâm gôl dak ngăn lah san hô ndrel choih nglang, dak njĭng ri knŭng dŏng dak mih. Yơn lah, nơm ân saơ n’hêl ăp mbor dyăp rkâl, byăp cải, nông, rpuăl, play mbŭng...dŭt âk play, ăp mir yơm si ndrih, tơm kao njêng nau ueh, ân saơ nau blau, nau gơih bah ăp tahen tâm gôl dak. Bol ma nau rêh nuih n’hâm âk nau pah pât rđil neh kơh, yơn nau mĭn ban cán bộ, tahen tâm ăp gôl dak mro năl nau kan tâm lơh, mât neh nkuăl neh dak lêng, gôl dak ndrel neh dak lêng bah dak nơm. Thượng tá Nguyễn Công Chính, Chính trị viên gôl dak Trường Sa mbơh: Geh pah kan tâm gôl dak Trường Sa lah nau rhơn, nau ntô̆ n’hao bah cán bộ, tahen:

‘Phung hên mro mbơh rjăp nau kan geh jao ndrel mro gĭt năl rjăp ngăn mpeh nau ơm ueh bah rmôt kan, nau roh hoach, nau kơl an bah ăp rơh mbŏ, nô hăn lor. Phung hên mro rhơn mpeh nau ơm nê ndrel mro tâm nkah nsum gay ma ƀư nâp nâl ndrle ƀư ueh lơn tay nau vay ơm bah rmôt kan Trường Sa janh dăng. Ăp cán bộ tahen Trường Sa mro nsôih mât nkuăl gôl dak, nkuăl neh dak lêng bah neh dak. Mro ƀư nâp nau kan “gôl dak lah ngih, dak lêng lah ƀon tơm” nsôih mât ăp blah neh, dak lêng huêng khlay bah neh dal”.

 Rnôk hôm rêh, Kruanh Hồ Chí Minh tă ntĭnh: “Bah năp nơh nơm knŭng heh măng ndrel bri, rnôk aơ nơm geh nar, geh trôk, geh dak lêng. Dak lêng bah nơm jong ngăn, ueh ngăn, nơm ân blau mât păng; cán bộ, tahen ndrel ƀon lan nkuăl gôl dak Trường Sa mro tâm rnglăp du nuih n’hâm, rlet nau jêr, mro nkah, mât nâp n’gâr phao, mra tâm lơh prêh, ƀư jêh ăp nau kan mât nâp nkuăl neh dak, dak lêng bah dak nơm./.