Ôi lơ 22/8, kruanh n’gâng kan nchră nău đah dak bah dih Bùi Thanh Sơn n’hanh kruanh n’gâng kan nchră nău đah dak bah dih Australia leo kan rơh rƀŭn nchră kruanh n’gâng kan nchră nău đah dak bah dih Việt Nam- Australia tal 5 di rơh wa Peni O ong tât khâl ngăn Việt Nam tal 2. Aơ lah nău kan geh mât ƀa ƀơ ăp năm đah 2 kruanh n’gâng kan nchră nău đah dak bah dih.

Ta rơh rƀŭn nchră, 2 ding rgum tâm mbơh mpeh nău mbơh tơih tâm boh kan ndrel lĕ rngôch Việt Nam- Australia. Uănh tay ba năp nơh, tâm kơl kan wăng sa- tăch rgâl bar dak hun hao âk, tĭng nĕ prăk geh tăch rgâl đah 2 dak năm 2022 lĕ geh bơi tât 16 rmen đolar, ndơ̆ Việt Nam jêng dak kan ndrel tăch rgâl têh tal 10 bâh Australia n’hanh Australia jêng dak tăch rgâl ndrel têh tal 7 bâh Việt Nam. Ăp trong kan tâm kơl mhe kơt tâm rdâng đah rgâl trôk nar mih sial, rgâl ŭnh nar dôl geh mât uănh ntrôl kan; tâm nĕ geh kơl an 105 rkeh đolar Australia AUD an Việt Nam gay ma rdâk njêng ndơ dŏng tâm rdâng đah rgâl trôk nar mih sial n’hanh hun hao ŭnh nar kloh ueh. Kruanh n’gâng kan nchră nău đah dak bah dih Australia uănh khlăy tâm kơl kan n’hanh kơl nău ƀư ndranh bâh ASEAN; tâm ban ŭch ntrôl tay tâm kơl kan yor nău hun hao nâp nâl ta nkual dak me Mekong, ton mbra kơl an Việt Nam tâm rdâng đah rgâl trôk nar mih sial n’hanh hun hao ŭnh nar kloh ueh.