Tâm bah ri aơ nơh ta 2 n'gor Gia Lai n'hanh Kon Tum, mpôl kan dơi kan năl geh âk mbro rơh lơh n'hang bri. Lơn lah, ta n'gor Kon Tum, mhe aơ mpôl công an hŏ ban saơ du rnoh si âk dơi bôr tâm choih n'hanh tâm mir cao su.

N'gul khay 2/2023, pơk hvi ôp uănh bah nău nhŭp ndeh rdeng 21 njăr si ta nkual Thủy điện Đak Pi Hao II (kâng n'har nkuâl Ia Pa), mpôl kan dơi kan nkuâl Kông Chro, n'gor Gia Lai ban nhŭp 7 tơm si ta tiểu khu 780 neh bri tă bah Công ty TNHH MTV Lâm nghiệp Ia Pa mât. Lôch nê, n'gâng kan dơi kan ban nhŭp ta tiểu khu 792 mpeh bri mât bah Công ty TNHH MTV Lâm nghiệp Kông Hde đŏng. Ta ntŭk ban nhŭp, rhiăng tơm khuăr, căm xe, nting ka geh kăl chôt, lĕ rngôch rnoh si hŏ rdeng luh bah bri da dê. Rblang nkô̆ nău mbrơi ban saơ, nking nchăng nău lơh n'hang bri, wa Lê Văn Thuỷ- Giám đốc Công ty TNHH MTV Lâm nghiệp Kông Hde dơn ngăn đŏng nău ŭanh lhơ:

        "Mbơh kloh rvah đah cán bộ lah moh geh ntil nău ri mbơh đah kruanh công ty gay nkra n'hanh mbơh gưl bah lơ nê. Yơn geh rnôk, cán bộ, công nhân viên mĭn lah nuĭh ƀon lan ta ntŭk joi si gay ƀư jay jêng uănh lhơ". Nô nău bri geh kăl n'hang ta âk ntŭk êng êng ta n'gor Gia Lai, kơt Kbang, Chư Prông, Chư Sê… Kêng dŭt khay 2/2023, mpôl kan dơi kan nkuâl Kbang ôp uănh, ban saơ ta tiểu khu 114, mpeh neh bri bah Công ty TNHH MTV lâm nghiệp Sơ Pai mât geh 16 tơm si trong rvoal têh ntơm bah 40cm-90cm geh kăl chôt. Wa Nguyễn Văn Hợi- Giám đốc Công ty TNHH MTV lâm nghiệp Sơ Pai, nkuâl Kbang lah:

         "Pah kan mât njrăng bri ăp năm mhe aơ mâp dŭt âk jêr jŏt. Mpôl mât njrăng bri way mâp jêr jŏt tâm trong joi tŏng nuĭh kan. Nuĭh ƀon lan ŭch muĭh tay ăp neh bri công ty mât, aƀaơ hŏ jêng săr. Nuĭh ƀon lan muĭh lăp lĕ tâm neh bri, ƀư mpet jâk an công ty, geh ăp tơm mô geh rnoh khlay dŏng yơn ăp nuĭh hôm kăl chôt gay jêng ntŭk duh hô đŏng"

Lơn lah, bôk khay 3/2023, mpôl Công an n'gor Kon Tum hŏ ban saơ mbŭch si âk tâm kơh choih bah meng dak me Đăk Pxi, mpeh xã Đăk Pxi, nkuâl Đăk Hà. Ntŭk tơm rhôp choih dja lah bah Công ty TNHH 87. Tâm rnoh si mpôn dơi mpôl Công an ban saơ geh 2 mặt phản, 4 blon, 11 njăr si mhe geh kăl n'hanh 5 tơm si hŏ ntrăm jŏ nar ta nâm dak. Lĕ rngôch rnoh si ban saơ geh njăr jong n'hanh trong rvoal têh da dê. Gay njâm măt mpôl kan dơi kan mpôl ntŭng lơh si mpôn si ma trong bôr ta nâm choih da dê. Yơn lah geh du đêt si mhe geh kăl rdeng nsĭt bah bri mpôl ntŭng si an mpơl bah lơ tâm kơh choih mô lah mô năn mpôn, rdeng hôch.

Dŭt njrăng lah ntŭk kơh choih mpôn si ntŭng ngai đah nhih pah kan UBND xã nklăp rlău 1km yơn n'gâng kan ta ntŭk mô gĭt đê̆. Wa Trần Phước Tuấn, Kruanh UBND xã Đăk Pxi lah rjăp: bah năp rơh mpôl Công an ban saơ ntŭk bun si ntŭng, n'gâng kan xã way ƀư hăn rsong uănh, ntru lơh n'hanh pah kan mât njrăng bri đăp mpăn mô geh ntil nău tih:

        "Xã hŏ njêng ăp rmôt rgop âk n'gâng kan way hăn rsong, ntru lơh mât njrăng bri tâm ban kơt njêng 2 ntŭk gŭ kâp njrăng 2 trong me lah trong Tỉnh lộ 677 n'hanh trong der dak bŭk. Tâm bah ri aơ ri dơn pah kan mât njrăng dơm.   

Rlău ma rnoh si mpôl kan dơi kan ban saơ tâm mbŭch choih bah Công ty TNHH 87 bah meng dak me Đăk Pxi, mpeh xã Đăk Pxi, nkuâl Đăk Hà, hôm geh mbŭch si têh ban saơ tâm mir cao su ngai đah nê nklăp 300m, đah 2 ntŭk rgum bun si. Ta ntŭk rgum bun bôk năp geh lĕ rngôch 7 blon si têh. Ta ntŭk rgum tâl bar geh 4 blon si têh, jê̆ êng êng. Tĭng du đêt tơm nău lư, rnoh si tâm mir cao su lah si tă bah mpôl ntŭng lơh si mpôn roh tâm ntŭk bun choih bah Công ty TNHH 87 bah meng dak me Đăk Pxi.

Rnôk nkah tât si ntŭng mpôl kan dơi kan nhŭp kân, du hê kruanh rđău kan Chi Cục kiểm lâm n'gor Kon Tum nkoch tât rnoh si 6 blon, 11 njăr si rêh mhe ntŭng kăl n'hanh 5 tơm si ban saơ hŏ ntrăm jŏ nar ta nâm dak tâm ntŭk rgum bun soih nê dơm mô saơ nkoch tât rnoh si mpôl ntŭng lơh mpôn tâm mir cao su. Nuĭh dja an gĭt aƀaơ nô nău dôl dơi mpôl Công an ôp uănh ƀư kloh tay, mpeh bah mpôl kiểm lâm dơn geh nău  kan nsum dơm jêng mô geh nău lư na nê̆ mpeh rnoh âk n'hanh ntil si geh sŏk mplơ̆.

         Pơk hvi ôp ŭanh, mpôl kan dơi kan n'gor Kon Tum bôk năp hŏ ban saơ tâm Tiểu khu 327, xã Đăk Pxi geh 22 tơm si geh kăl chôt. Yơn lah mô hŏ dơi năl rnoh si geh kăl tâm bri n'hanh rnoh âk si geh mpôn hôch tâm mbŭch choih geh tât nsum lah mô. Nô nău dôl dơi mpôl kan dơi kan n'gor Kon Tum ôp uănh ƀư kloh tay.