Ta nar tâm nchră, nuĭh ƀon lan nkoch nău nsing nơm đah nău rđău, ƀĭt joet bah kruanh n’gor Lâm Đồng tâm rnôk n’gor rdâng đah âk jêr jŏt, ntŭl rlong. Nkre, mpŏng ŭch n’gor Lâm Đồng an rgum hun hao têh dăng ta nău pâl nđaih n’hanh lŏ mir; ntrôl dăng rgâl mrô, wăng sa mrô; uănh khlay ntuh kơl ntung trong, ngăn lah ăp nău nchrăp ƀư trong ndeh hăn ngăch kơt Tân Phú-Bảo Lộc, Bảo Lộc-Liên Khương n’hanh Đà Lạt-Nha Trang gay dơh boăt nthoi nkual, tâm n’gor, ntrôl wăng sa-rêh jêng hun hao.

Kruanh UBND n’gor Lâm Đồng Trần Hồng Thái mĭn lah Lâm Đồng dôl tâm lvang pơk trong têh gay hun hao, dôl nsrôih ƀư trong hăn ngăch pơk mpông hăn mpeh bah dâng, ăp trong nthoi nkual Tây Nguyên, Đông Nam bộ, Nam Trung bộ. Wa Trần Hồng Thái an gĭt, n’gor Lâm Đồng ntơm ƀư trong têh hăn ngăch. Dơi geh trong hăn mhe geh nău hun hao têh dăng. Tâm 2-3 năm tât, n’gor Lâm Đồng mbra kơl lor hun hao ntung trong.

Ta nar tâm nchră đŏng, Kruanh UBND n’gor Lâm Đồng lĕ tâm nchră đah ƀon lan mpeh nău kơl lor hun hao công nghiệp, nău rhŏ, pâl nđaih, lŏ mir, công nghệ mhe, rgâl mrô, ntĭm nti nuĭh kan, wăch rgum ntuh kơl, wăng sa uĕh nđĭr, ntŭk ntô gŭ âm, dak si, ntĭm nti tâm năm tât bah n’gor.

Ndrel đah nĕ, nuĭh ƀon lan nkoch đŏng, dăn đă, đă kruanh n’gor Lâm Đồng n’hao lơn tay trong kan mât uănh ndơ geh ơm-ntŭk ntô gŭ âm, ntrôl ngăch sŏk neh, ƀư ntŭk gŭ mhe, trơn ntŭk gŭ ăp nău nchrăp ƀư khlay, hun hao jay gŭ kon nuĭh, pă an sam ƀŭt kơp dơn dŏng neh...

Tâm nĕ, nău dăp rgum n’gul gâl n’hanh jŏ jong, ƀư mpŭng lir drăp ndơ ơm n’hanh ƀư mbrơi nău hun hao bah n’gor an ơm dơi dôh rklaih. Wa Păng Ting Sin, ta nkuăl têh Lạc Dương, nkuăl Lạc Dương, n’gor Lâm Đồng lah:

Ta nkuăl têh Lạc Dương mpôl hên geh dŭt âk dăp rgum nkĭng nkăng n’hanh jŏ jong, geh dăp rgum jŏ jong tât 20 năm hôm yơn he mô hŏ mbơh ƀư. Mpŏng ŭch têh ngăn bah nuĭh ƀon lan lah ăp dăp rgum mô geh săk rnglăy, mô di ri an jăng lơi, n’hanh lah geh dăp rgum an mbơh ƀư dâl.  

Rlău 20 nău rgop bah ăp đại biểu ta nar tâm nchră lĕ ntĭm ăp jêr jŏt rnôk dăp rgum khoảng sản khuch tât nău geh bah nuĭh ƀon lan tâm nău pă sam ƀŭt kơp dơn dŏng neh; an geh trong nchrŏng jong gay mât nău geh an nuĭh ƀon lan mât ndrôk dak toh jêh nău hang rhiăng mlâm ndrôk dak toh ta n’gor lĕ khĭt jêh chuh vaccine, dăp rgum nkĭng n’gang, mât uănh ntŭk ntô gŭ âm. Bah meng nĕ, ăp đại biểu ngăn ngên an rgum hun hao 2 nău kan têh bah n’gor Lâm Đồng lah pâl nđaih n’hanh lŏ mir, ngăn lah lŏ mir công nghệ mhe, gĭt blău mhe; ntrôl dăng rgâl mrô.

Ntoh ngơi n’glôn jêh tâm nchră, wa Nguyễn Thái Học, Nău dơi ƀư Bí thư N’gor ủy Lâm Đồng mĭn lah, kruanh n’gor Lâm Đồng djăt lĕ rngôch ăp nău rgop, dăn đă, bah đại biểu ăp rơh kơn nuĭh ƀon lan. Nkre ton mbra rgum dôh rklaih ăp jêr jŏt, wăk kol aơ gay ntrôl Lâm Đồng hun hao lĕ rngôch, nâp nâl.

Gâp đă Văn phòng N’gor ủy tâm rgop đah Văn phòng UBND n’gor rgum tŏng ăp âk nău đă bah ăp đại biểu n’hanh mbơh an ăp n’gâng kan, nău kan, ăp ntŭk geh nău kan uănh mĭn tay mkra, mbơh săk rnglăy an Rnâng kan N’gor ủy. Geh âk nău mpeh tâm nău dơi mkra bah kruanh n’gor mbra uănh mĭn tay mkra, moh nău dơi mkra bah Trung ương ri n’gor mbra dăn đă.

Nău dơi ƀư Bí thư N’gor ủy Lâm Đồng Nguyễn Thái Học mĭn lah ton têh dăng bah rnâng kan N’gor ủy, Ban Thường vụ N’gor ủy nsrôih tâm rnglăp, dŭt n’hâm, yor nău hun hao bah n’gor Lâm Đồng; pah kan lĕ đah nău kan, di, n’hanh kloh uĕh; nsrôih rgâl ăp cán bộ ƀư nking n’gang nău hun hao bah n’gor.