Di nkah 89 năm nar Báo chí cách mạng Việt Nam, kêng măng 16/6, ta ngih kan Quốc hội, Kruanh Quốc hội Vương Đình Huệ mâp măt rđau kan Ban Tuyên giáo Trung ương, Bộ thông tin ndrel Truyền thông, Hội Nhà báo Việt Nam, ăp nhà báo ơm, ntoh măt bah ăp ntŭk kan báo chí lah nŭih kan nsum tâm rmôt Sơ khảo ndrel Chung khảo nau tâm rlong Diên Hồng tal bôk năp, rđau kan du đê̆ ntŭk kan báo chí ta Trung ương ndrel nkuăl.

Kruanh Quốc hội Vương Đình Huệ lah rjăp, Quốc hội mro kơl an ƀư jêh mpeh ntrong kan, nau kan đah ntrong kan nkoch mbơh nau, báo chí. Tâm rơh tât, Kruanh Quốc hội Vương Đình Huệ đă báo chí ân lŏ mâp nâp nau kan, nau dơi lah ngoai tâm ăp ntŭk kan khlay, rgop nau ƀư nâp ndrel rgâl mhe Ngih dak pháp quyền xã hội chủ nghĩa Việt Nam, tâm di đah nau geh dơi hun hao đăp mpăn ndrel geh nau ueh bah rơh aơ, mât ndrel hun hao ăp ntil nau kan rgâl mhe du trong ăp ntil, tâm ban, tâm rnglăp lam ntur neh đah nau mpŏng Việt Nam nâp dăng năm 2045./.