VOV4.M’nông:  Lah Bí thư Chi bộ, nkre ƀư Kruanh thôn ƀon Chơ Rơng 2, (xă Đăk Ta Ley, nkuăl Mang Yang, n’gor Gia Lai), wa Gôh, nuĭh Bana rvê mro m’hâm ƀư gay ntrŭt nsôr ƀon lan ntrôl dăng hun hao wăng sa, n’hao nău rêh. Đah nău mât uĕh hăn ntrong leo bah đảng viên, wa Gôh ndrel ăp đồng chí tâm chi bộ lĕ rgâl bah nău mĭn tât trong ƀư bah kônh wa.

Tât khâl ƀon Chơ Rơng 2 tâm bôk năm 2022, njok trog bah quốc lộ 19 hăn tâm ƀon lah uĕh nđĭr bah cà phê, ndrel ăp jay têh uĕh tâm nkrĭp. Kruanh thôn Gôh leo mpôl hên lăp tâm jay têh uĕh mhe ƀư 500 rkeh prăk bah wa Blứi. Mô geh nuĭh mĭn, aơ lah du rnăk knŭng mhe rklaih ach o tă aơ 3 năm. Wa Blứi nkoch, aơ lah du rnăk geh neh mir gay tăm cà phê, ba lŏ yơn săk rnglăy wăng sa mô âk. Bah rnôk dơi Kruanh thôn Gôh ntop kơl mpeh kỹ thuật tăm n’hanh mât chăm cà phê, nta an kônh wa râng ăp jrô tiăr nti bah thôn, xă, kônh wa lĕ ntơm dơi rgâl trong tăm cà phê, hun hao tay mât rong. Jêh âk năm nsrôih, rnăk bah wa Blứi lĕ jêng rnăk sâm geh tâm thôn. wa Blứi an gĭt tay:

Băng: “Gâp nti dŭt âk nău, bah năp mô tăm cà phê, aƀaơ tăm cà phê, tiêu, mât ndrôk... Tâm ƀon Chrơng 2 mpôl hên dơi pă 12 mlâm ndrôk me, rnôk ndrôk deh ri an kon bê rnăk wng mât, hôm ndrôk ntil mât tay, trong ƀư aơ dŭt uĕh. Aƀaơ geh âk jrô nti mpeh tăm cà phê, tiêu, mât rong ndrôk, pă ba ntil lŏ wai, gâp nsrôih pah kan jan sa, nti nsơm ăp naư mhe gay kơl kônh wa ƀon lan”.

Lvang bah năm 2018-2020, bí thư chi bộ Gôh lĕ tâm rgop đah Rmôt bu ur bah ƀon nkoch trêng, rgŏ jă nuĭh ƀonb lan tâm thôn nsrôih ƀư tĭng bôk nău kan ndâk njêng ƀon lan mhe đah trong way ƀư ngih dak ntop kơl nuĭh ƀon lanb ndrel ƀư. Nuĭh ƀon lan rgop prăk n’hanh nar luh ndâk ƀư ngih văn hóa thôn, ƀư trong bê tông nâp nâl, rbông dak. Rgŏ jă ăp rnăk râng ăp naư nchrăp ƀư, ntrong kan hun hao wăng sa. Wa Kem, Chi hội trưởng Chi hội bu ur ƀon Chrơng 2 an gĭt:

Băng: “Đồng chí lah nuĭh bbư dŭt uĕh, hăn lor tâm ăp nău kan, dŭt tâm di đah ƀon lan n’hanh dơi ƀon lan ryơk ƀư tĭng. Săk gâp lah Chi hội trưởng bu ur saơ đồng chí dŭt leo ntrong, săk gâp nti đŏng âk nău uĕh bah đồng chí, nti ƀư cà phê, tiêu geh săk rnglăy âk lơn. Jêh rnôk tâm ƀon geh nău ri rgŏ jă ăp nuĭh, na nê̆ lah Kruanh rmôt bah 7 rmôt tâm ƀon ndrel râng rƀŭn tâm nchră, dŭt tâm rnglăp”.

Wa Nguyễn Thanh Tâm, Bí thư Đảng ủy xă Đăk Ta Ley, nkuăl Mang Yang uănh lah: Tâm ăp năm bah năp, ăp nău kan lah Bí thư chi Bộ, kruanh ƀư kruanh thôn, đồng chí Gôh nkoch trêng an kônh wa ƀon Chrơng 2 tĭng uĕh nău ntrŭnh, trong hăn bah Đảng, nău kơl, pháp luật bah Ngih dak, tâm rnglăp tâm hun hao wăng sa n’hanh râng tŏng ăp nău ƀư ntrong leo yor xă ƀư. Tâm trong kan ndâk njêng Đảng, đồng chí kruanh Chi bộ mbơh ƀư geh săk rnglăy nău nti n’hanh ƀư tĭng Wa đah ăp nău na nê̆, ngăn ngên, nsĭt tay nău uĕh an ƀon lan.

Băng: “Đah nău ƀư Bí thư chi bộ nkre ƀư kruanh thôn, đồng chí Gôh dŭt n’hâm, ngăch prăl, lơn lah dơi ƀư Bí thư chi bộ tâm trong kan ntĭm rđău, ƀĭt joet, ƀư tĭng nău kan đah ƀon. Bah meng nĕ đah nău ƀư kruanh ƀon ri đồng chí dŭt n’hâm, kơl an kônh wa ƀon lan ta ƀon, yor nê đồng chí Gôh dơi geh naư nsing nơm bah kônh wa tâm ƀon đah nău ƀư Bí thư chi bộ nkre ƀơ kruanh thôn. Tă bah ƀư tĭng nău kan bơi 3 năm, đồng chí lĕ ƀư uĕh nău kan bah nơm”.

Aƀaơ, ƀơ Chrơng 2 lĕ jêh ăp rnoh ndơ ƀư mpeh ƀon lan mhe, n’ăp lĕ 2 rnoh ndơ ƀư jêr ngăn đah nkual rnoi mpôl Bahnar lah rnoh rnăk ach o n’hanh ntŭk ntô gŭ âm, nău rêh bah 176 rnăk tâm ƀon lĕ dơi hao, rnoh rnăk ach o knŭng bah dâng 10 rnăk. Tĭng wa Gôh, dơi ƀư nău jêr aơ, ndrel đah nău uănh bah Ngih dak n’hanh gưl bah lơ ri ăp đảng viên tâm chi bộ dơi ƀư ntrong leo bah nơm.

Băng: “Gâp lah du hê đảng viên he an hăn lor, ƀư leo, ntrong leo an kônh wa nti tĭng. Nău khlay lơn lah trong nău ngơi bah he an ngăn ngên gay kônh wa wât, n’hanh he lah ri an ƀư, rnôk kônh wa saơ ƀư săk rnglăy hôm kônh wa mư djăt n’hanh ƀư tĭng”.

Êng Bí thư Gôh n’hanh nsum mpôl đảng viên ta Chí bộ ƀon Gôh lĕ ntrong leo đah nuih n’hâm lĕ nău kan, janh mĭn, janh ƀư, dŭt n’hâm đah nău kan nsum bah ƀon. Nsum mpôl chi bộ lĕ ngăn ngên nti tĭng Wa Hồ-“Mih nău uĕh an ƀon lan an ƀư dŭt n’hâm”. Đảng viên ƀon Gôh hăn lor, nuĭh ƀon Gôh ndrel nsrôih ƀư sa, dôl nta an nău rgâl ăp nar dŭt n’hâm./.

          Nuĭh rblang: Y Sưng Phê Ja